Wanaomba Msaada
Wanaomba Msaada
“MUNGU amenisahau!” alilalamika mwanamke Mbrazili. Baada ya kifo cha ghafula cha mume wake, alihisi kwamba maisha yake hayana kusudi tena.Je,umewahi kujaribu kumfariji mtu aliye na huzuni kiasi hicho, au mtu anayeomba msaada?
Watu wengine hufa moyo kiasi cha kujiua—na baadhi yao ni vijana. Gazeti la Folha de S. Paulo lasema kuwa uchunguzi nchini Brazili waonyesha kwamba “kujiua kwa vijana kumeongezeka kwa asilimia 26.” Fikiria kisa cha Walter, * kijana wa São Paulo. Walter hakuwa na wazazi, wala makao, wala mahali pa faragha, wala marafiki wa kweli. Ili kukomesha taabu zake, Walter aliamua kujirusha kutoka darajani.
Edna, mama asiye na mwenzi wa ndoa, alikuwa na watoto wawili alipokutana na mwanamume mwingine. Baada tu ya mwezi mmoja walianza kuishi pamoja katika nyumba ya mama ya mwanamume huyo, ambaye alijishughulisha na mambo ya uwasiliani-roho, na alikuwa mlevi. Edna alipata mtoto mwingine, akaanza kunywa kupindukia, akashuka moyo sana hivi kwamba alijaribu kujiua. Mwishowe akapoteza haki ya kulea watoto wake.
Namna gani wazee? Maria alikuwa mtu aliyependa kujifurahisha na kuongea sana. Hata hivyo, alipoendelea kuzeeka alianza kuwa na wasiwasi juu ya kazi yake ya uuguzi kwa kuwa alihofia angefanya makosa. Akashuka moyo. Baada ya kujaribu kujitibu, alikwenda kumwona daktari, na matibabu aliyopata yalimsaidia. Lakini alipofutwa kazi akiwa na umri wa miaka 57, alishuka moyo sana kiasi cha kwamba hakuona suluhisho lolote la matatizo yake. Maria alianza kufikiria kujiua.
“Asilimia 10 hivi ya watu wote ambao wameshuka moyo hujaribu kujiua,” asema Profesa José Alberto Del Porto wa Chuo Kikuu cha São Paulo. “Ni vigumu kuamini kwamba watu ambao wamejiua ni wengi kuliko wale ambao wameuawa, lakini kwa kusikitisha, ndivyo ilivyo,” asema Dakt. David Satcher, ofisa mkuu wa kitiba wa Marekani.
Wakati mwingine, kujaribu kujiua ni njia ya kuomba msaada. Bila shaka, jamaa na marafiki wanataka kuwasaidia wale ambao wamepoteza tumaini. Haitasaidia kusema maneno kama: “Usijihurumie,”“Kuna wengi wenye taabu nyingi kuliko zako” au, “Sisi sote tunahuzunika mara kwa mara.” Badala yake, kwa nini usijaribu kuwa rafiki wa kweli na msikilizaji mwenye kujali? Ndiyo, jaribu kumsaidia yule ambaye amekufa moyo kuona kwamba maisha yana kusudi.
Mwandikaji Mfaransa Voltaire aliandika hivi: “Mtu ambaye kwa ghafula anajiua leo kwa sababu ya kushuka moyo, angalitaka kuishi, angalingoja juma moja.” Basi, watu ambao wamekata tamaa wawezaje kutambua kwamba maisha yana kusudi?
[Maelezo ya Chini]
^ fu. 3 Baadhi ya majina yamebadilishwa.
[Picha katika ukurasa wa 3]
Idadi yenye kuongezeka ya vijana na watu wazima wanajiua
[Picha katika ukurasa wa 4]
Unawezaje kumsaidia mtu ambaye amepoteza tumaini?