Sisi Ni Namna ya Watu Walio na Imani

Kuhubiri Ufalme Katika Uwanda wa Altiplano Huko Peru

KATIKATI ya safu za milima ya mashariki na magharibi ya Mlima Andes—mpakani mwa Bolivia na Peru—kuna uwanda wa Altiplano. Jina hilo lamaanisha “uwanda wa juu.” Sehemu kubwa ya uwanda huo imo nchini Bolivia.

Uwanda wa Altiplano una upana wa kilometa 100 na urefu wa kilometa 1,000, na wastani wa mwinuko wake ni meta 3,700 juu ya usawa wa bahari. Unaposafiri kwa ndege kutoka Lima, mji mkuu wa Peru, ulioko pwani, unapita juu ya volkano iitwayo El Misti, iliyofunikwa kwa theluji na inayotokezea juu ya mawingu na kufikia kimo cha meta 5,822. Milima iliyo mbali ya, Nevado Ampato na Nevado Coropuna, ambayo imefunikwa na theluji, ina vilele vyenye kimo cha zaidi ya meta 6,000. Ghafula unaona uwanda mkubwa, Altiplano, uliopo sehemu ya kusini mwa Peru.

Mji mkuu wa Altiplano nchini Peru ni Puno. Mji huo uko upande wa kaskazini-magharibi ya Ziwa Titicaca ambalo ni ziwa lililo juu zaidi ulimwenguni linaloweza kupitika kwa chombo. Wageni wanahitaji muda kuzoea hewa katika eneo hilo kwa sababu ya mwinuko wake wa zaidi ya kilometa tatu. Wahindi wa Quechua na Aymara wanaishi kando ya Ziwa Titicaca. Waweza kuwaona wakifanya kazi kwenye mashamba yao madogo, wakiwa wamevaa nguo zao zenye rangi nyekundu, kijani kibichi, au samawati. Ingawa Kihispania ndiyo lugha kuu ya Peru, lugha za Kiquechua na Kiaymara zinatumiwa pia Altiplano.

Kuongoza Kazi ya Kuhubiri

Hivi karibuni, watu wengi wanyenyekevu wanaofanya kazi kwa bidii na wanaosema lugha za Kiquechua na Kiaymara wamepata ujuzi sahihi wa kweli ya Biblia. Hayo hasa ni matokeo ya baraka za Yehova juu ya jitihada zenye bidii za wahubiri wa wakati wote wa Ufalme wanaotumikia kama mapainia wa pekee.

Kwa mfano, mapainia wa pekee José na Silvia walipewa mgawo wa kwenda mjini Putina, umbali wa kilometa 50 kutoka Ziwa Titicaca. Baada ya muda wa miezi miwili, Silvia alikuwa akiongoza mafunzo ya Biblia ya nyumbani 16, naye José aliongoza 14. Katika muda wa miezi sita tu wahubiri wa kutaniko waliongezeka kutoka 23 kufikia 41. Wakati uleule hudhurio liliongezeka kutoka 48 kufikia kilele cha 132.

“Tunapoanzisha mikutano ya kutaniko katika sehemu hizi za mbali tumeona ni vizuri kuanza na Mkutano wa Watu Wote na Funzo la Kitabu la Kutaniko. Jambo hilo linasaidia wapya wanaopendezwa kuanza kuhudhuria mikutano,” José asema.

Painia mmoja na dada yake walianzisha kazi ya kuhubiri habari njema katika sehemu ya Muñani, umbali wa kilometa 20 kutoka Putina. Walianzisha funzo la Biblia pamoja na mtu asiyeona anayeitwa Lucio. * Lucio alimwalika ndugu yake Miguel, ambaye ni mishonari wa kawaida wa Kanisa Katoliki na kiongozi wa jumuiya katika eneo la karibu. Rafiki mmoja alipomwuliza Miguel kwa nini alienda Muñani kila juma, alisema yeye huenda kujifunza juu ya Yehova na Neno lake. Ndipo swali hili lilizuka: “Kwa nini hatujifunzi Biblia hapa?” Muda si muda, Mashahidi walianza kufanya mikutano sehemu hiyo kwa sababu ya kupendezwa kwa watu wa jumuiya ya Miguel.

Miguel alianza kuzungumza na wengine juu ya yale aliyojifunza. Namna gani wadhifa wake kama mishonari wa kawaida wa Kanisa Katoliki na kaimu wa gavana? Katika mkutano mmoja kwenye ukumbi wa jumuiya, alitangaza kwamba amejiuzulu kazi ya mishonari ya Kanisa Katoliki. Je, mtu mwingine angeteuliwa? Msikilizaji mmoja alisema hivi: “Je, tunahitaji  mishonari mwingine hali tunajifunza kweli?” Bila shaka alirejezea mambo ambayo Mashahidi wa Yehova waliwafundisha. Mtu mwingine akaongeza hivi: “Hatuwezi kukubali ujiuzulu peke yako. Kwa nini tusijiuzulu sisi sote?” Ndipo wote waliohudhuria wakapaaza sauti kwa umoja: “Sisi sote tunajiuzulu!”

Punde si punde misalaba yenye mfano wa Yesu na sanamu zilizungumzwa kwenye mkutano wa jumuiya. Mwanamume mmoja aliomba wahudhuriaji wote wasome Kumbukumbu la Torati 7:25 lisemalo hivi: “Sanamu za kuchonga za miungu yao mtaziteketeza kwa moto; usitamani fedha wala dhahabu iliyo juu yao, wala usiitwae iwe yako usije ukanaswa nayo; kwa maana ni machukizo kwa BWANA, Mungu wako.”

Ndipo mwanamume huyo akaomba wote waliopendelea kuchoma sanamu zote wainue mikono. Wote waliinua mikono mara moja. (Matendo 19:19, 20) Wakati huu jamaa 23 kati ya jamaa 25 za jumuiya hiyo zinajifunza Neno la Mungu. Watu wawili wanatumikia kama wahubiri wasiobatizwa, na ndoa tano zinatazamiwa kuhalalishwa ili wenzi hao wawe na msimamo safi mbele ya Yehova.—Tito 3:1; Waebrania 13:4.

Kufundisha kwa Kutumia Kaseti

Kwa sababu watu wengi huko Altiplano hawajui kusoma, vidio na kaseti za Watch Tower za lugha za wenyeji ni msaada mkubwa—hata kwa kuongoza mafunzo ya Biblia ya nyumbani. Painia wa pekee aitwaye Dora anatumia kaseti anapoongoza funzo akitumia broshua Mungu Anataka Tufanye Nini? Baada ya kusikiliza fungu, anamwuliza mwanafunzi wa Biblia maswali juu ya mambo ambayo ametoka tu kusikia.

Sehemu za broshua Anataka katika lugha ya Kiquechua hutangazwa kwa ukawaida katika kipindi cha redio ya hapo na vilevile sehemu za gazeti Amkeni! la Kihispania. Kwa hiyo, wengi wametambua ujumbe wa Ufalme na wanataka kujua zaidi Mashahidi wa Yehova wanapowatembelea nyumbani.

Altiplano haujulikani sana ulimwenguni, lakini Mungu anaujua. Kwa sababu ya upendo wa Yehova kwa wanadamu, watu wengi wanaoishi juu sana katika uwanda wa Altiplano wa Milima ya Andes wanapata kuwa sehemu ya umati unaoleta utukufu kwenye nyumba yake ya ibada ya kweli yenye fahari.—Hagai 2:7.

[Maelezo ya Chini]