Jinsi Baraza Linaloongoza Linavyotofautiana na Shirika la Kisheria

MIKUTANO ya kila mwaka ya shirika la Watch Tower Bible and Tract Society of Pennsylvania imekuwa ikifanywa tangu Januari mwaka wa 1885. Kukusanywa kwa Wakristo watiwa-mafuta kulipokuwa kunaendelea mwishoni mwa karne ya 19, waelekezi na wasimamizi wa shirika hilo walikuwa na tumaini la kimbingu. Kusema kweli, mambo yamekuwa hivyo karibu sikuzote.

Lakini kuna wakati ambapo mambo yalikuwa tofauti. Mwaka 1940, Hayden C. Covington—ambaye wakati huo alikuwa wakili wa Sosaiti na mmoja wa “kondoo wengine,” mwenye tumaini la kidunia—alichaguliwa kuwa mwelekezi wa Sosaiti. (Yohana 10:16) Alitumikia akiwa makamu-msimamizi wa Sosaiti kuanzia 1942 hadi 1945. Wakati huo, Ndugu Covington alijiuzulu kazi ya uelekezi ili kutimiza yale ambayo wakati huo yalionekana kuwa mapenzi ya Yehova—kwamba waelekezi na wasimamizi wote wa shirika la Pennsylvania wawe Wakristo watiwa-mafuta. Lyman A. Swingle alichukua mahali pa Hayden C. Covington kwenye baraza la waelekezi, naye Frederick W. Franz akachaguliwa kuwa makamu-msimamizi.

Kwa nini watumishi wa Yehova waliamini kwamba waelekezi na wasimamizi wote wa shirika la Watch Tower Bible and Tract Society of Pennsylvania walipasa kuwa Wakristo watiwa-mafuta? Kwa sababu wakati huo, baraza la waelekezi na wasimamizi wa shirika la Pennsylvania lilihusiana kwa ukaribu na Baraza Linaloongoza la Mashahidi wa Yehova, ambalo sikuzote limefanyizwa na wanaume watiwa-mafuta pekee.

Mkutano Muhimu wa Kila Mwaka

Kwenye mkutano wa kila mwaka uliofanywa Oktoba 2, 1944, huko Pittsburgh, washiriki wa shirika la Pennsylvania walipitisha maazimio sita wakirekebisha mkataba wa shirika hilo. Mkataba huo ulikuwa umeruhusu wenye kuchanga fedha kwa ajili ya kazi ya Sosaiti wapewe hisa za kupiga kura, lakini rekebisho la tatu likaondoa ruhusa hiyo. Ripoti kuhusu mkutano huo wa kila mwaka ilisema: “Wanachama wa Sosaiti hawatazidi 500 . . . Kila anayechaguliwa apaswa kuwa mtumishi wa wakati wote wa Sosaiti au mtumishi wa muda wa kampuni [kutaniko] la Mashahidi wa Yehova na apaswa kuonyesha roho ya Bwana.”

Baadaye, waelekezi wa Sosaiti wangechaguliwa kwenye nyadhifa zao na watu waliojitoa kabisa kwa Yehova, bila kujali ni kiasi gani cha fedha walichochanga kuendeleza kazi ya Ufalme. Jambo hilo lilipatana na marekebisho ya hatua kwa hatua yaliyotabiriwa kwenye Isaya 60:17, ambapo twasoma: “Badala ya shaba nitaleta dhahabu, na badala; ya chuma nitaleta fedha, na badala ya mti, shaba, na badala ya mawe, chuma; tena nitawafanya wasimamizi wako wawe amani, na hao wakutozao fedha [“wagawa-kazi,” NW] kuwa haki.” Ukirejezea “wasimamizi” na “wagawa-kazi,” unabii huo ulitaja maendeleo katika taratibu za kitengenezo miongoni mwa watu wa Yehova.

Hatua hiyo muhimu ya kulifanya tengenezo liwe na mpango wa kitheokrasi ilikoma mwishoni mwa “jioni na asubuhi elfu mbili na mia tatu,” zilizotajwa kwenye Danieli 8:14. Wakati huo, “patakatifu” ‘palitakaswa.’

Hata hivyo, baada ya mkutano huo muhimu wa kila mwaka uliofanywa mwaka wa 1944, swali muhimu lilibaki. Kwa kuwa wakati huo Baraza Linaloongoza lilihusiana kwa ukaribu na shirika la Pennsylvania lenye baraza la waelekezi saba, je, hilo lilimaanisha kwamba Baraza Linaloongoza halingeweza kamwe kufanyizwa na Wakristo watiwa-mafuta zaidi ya saba? Isitoshe, kwa  kuwa waelekezi hao wanachaguliwa na washiriki wa shirika hilo, je, washiriki hao walikuwa wakichagua washiriki wa Baraza Linaloongoza kwenye mikutano hiyo kila mwaka? Je, waelekezi na wasimamizi wa shirika la Watch Tower Bible and Tract Society of Pennsylvania na washiriki wa Baraza Linaloongoza ni kitu kimoja au kuna tofauti?

Mkutano Mwingine wa Kila Mwaka Usioweza Kusahaulika

Maswali hayo yalijibiwa kwenye mkutano wa kila mwaka uliofanywa Oktoba 1, 1971. Pindi hiyo, mmoja wa wasemaji alitaja kwamba baraza linaloongoza la “mtumwa mwaminifu na mwenye busara” lilitangulia shirika la Watch Tower Bible and Tract Society of Pennsylvania kwa mamia ya miaka. (Mathayo 24:45-47) Baraza linaloongoza lilianzishwa siku ya Pentekoste mwaka wa 33 W.K., zaidi ya karne 18 kabla ya shirika la Pennsylvania kuanzishwa. Mwanzoni, baraza linaloongoza lilikuwa na mitume 12 wala si wanaume 7. Ni dhahiri kwamba idadi yake iliongezeka baadaye, kwa kuwa “mitume na wanaume wazee katika Yerusalemu” walikuwa wanaongoza.—Matendo 15:2.

Mwaka wa 1971, msemaji huyohuyo alieleza kwamba washiriki wa shirika la Watch Tower Society hawangeweza kuwachagua washiriki waliotiwa-mafuta wa Baraza Linaloongoza. Kwa nini? “Kwa sababu,” akasema, “baraza linaloongoza la jamii ya ‘mtumwa’ haliwekwi rasmi na mwanadamu yeyote. Linawekwa rasmi na . . . Yesu Kristo, aliye Kichwa cha kutaniko la kweli la Kikristo na Bwana na Bwana-Mkubwa wa jamii ya ‘mtumwa mwaminifu na mwenye busara.’” Basi, ni wazi kwamba washiriki wa Baraza Linaloongoza hawawezi kuchaguliwa kwenye nyadhifa zao na washiriki wa shirika lolote la kisheria.

Akiendelea na mazungumzo yake, msemaji alitoa taarifa hii muhimu sana: “Baraza linaloongoza halina wasimamizi kama Baraza la Waelekezi wa Sosaiti, yaani, msimamizi, makamu-msimamizi, mwandishi-mweka-hazina na msaidizi wa mwandishi-mweka-hazina. Lina mwenyekiti tu.” Kwa miaka mingi, msimamizi wa shirika la Pennsylvania alikuwa pia mshiriki muhimu wa Baraza Linaloongoza. Hali zingebadilika. Wajibu wa washiriki wa Baraza Linaloongoza ungekuwa sawa japo hawangekuwa na uzoefu na uwezo sawa. Msemaji aliongezea hivi: “Mshiriki yeyote wa baraza linaloongoza anaweza kuwa mwenyekiti wake bila wakati huohuo kuwa msimamizi wa . . . Sosaiti . . . Inategemea utaratibu wa baraza linaloongoza ambao wadhifa wa mwenyekiti huchukuliwa kwa zamu.”

Kwenye mkutano huo wa kila mwaka usioweza kusahaulika mwaka wa 1971, tofauti kati ya washiriki watiwa-mafuta kwa roho wa Baraza Linaloongoza na waelekezi wa shirika la Pennsylvania ilionyeshwa waziwazi. Lakini, washiriki wa Baraza Linaloongoza waliendelea kutumikia wakiwa waelekezi na wasimamizi wa Sosaiti. Hata hivyo, leo swali hili lazuka: Je, kuna sababu yoyote ya Kimaandiko inayoonyesha kwamba ni lazima waelekezi wa shirika la Watch Tower Bible and Tract Society of Pennsylvania wawe washiriki wa Baraza Linaloongoza?

Jibu ni la. Kuna mashirika mengine ya kisheria, mbali na shirika la Pennsylvania, ambayo hutumiwa na Mashahidi wa Yehova. Mojawapo ni shirika la Watchtower Bible and Tract Society of New York, Incorporated. Shirika hilo hurahisisha kazi yetu huko Marekani. Ni wazi kwamba Yehova amebariki shirika hilo, ingawa wengi wa waelekezi na wasimamizi wake wamekuwa wa “kondoo wengine.” Shirika la International Bible Students Association linatumiwa huko Uingereza. Mashirika mengine ya kisheria yanatumiwa kuendeleza masilahi ya Ufalme katika nchi nyinginezo. Yote husaidia kwa upatano na hutimiza jukumu fulani katika kuhubiriwa kwa habari njema duniani kote. Bila kujali yako wapi au waelekezi na wasimamizi ni nani, mashirika hayo yanaelekezwa kitheokrasi nayo hutumiwa na Baraza Linaloongoza. Hivyo, mashirika hayo yamegawiwa kazi ya kufanya ili kuendeleza masilahi ya Ufalme.

Ni vyema kuwa na mashirika ya kisheria. Kuwa na mashirika hayo huonyesha kwamba tunatii sheria za mahali tunapoishi na za kitaifa, kama vile Neno la Mungu litakavyo. (Yeremia 32:11; Waroma 13:1) Mashirika ya kisheria hurahisisha kazi yetu ya kueneza ujumbe wa Ufalme  kwa kuchapa Biblia, vitabu, magazeti, broshua, na vichapo vinginevyo. Mashirika hayo pia hutumika yakiwa vyombo vya kisheria vya kushughulikia mambo yanayohusiana na umilikaji wa mali, shughuli za utoaji misaada, mikataba kwa ajili ya matumizi ya mahali pa kufanyia mikusanyiko, na kadhalika. Tunashukuru kwa huduma za mashirika hayo ya kisheria.

Jina la Yehova Lapata Umaarufu

Katika mwaka wa 1944, Kifungu cha Pili cha mkataba wa Watch Tower Bible and Tract Society of Pennsylvania kilirekebishwa ili kukazia makusudi ya shirika hilo. Kulingana na mkataba huo, makusudi ya Sosaiti yanatia ndani kusudi hili muhimu: “Kuhubiri gospeli ya ufalme wa Mungu chini ya Kristo Yesu kwa mataifa yote ikiwa ushahidi kwa jina, neno na mamlaka kuu kupita yote ya Mungu Mweza Yote YEHOVA.”

Tangu mwaka wa 1926 “mtumwa mwaminifu” amelipa jina la Yehova umaarufu. Mwaka wa 1931 ambapo Wanafunzi wa Biblia walikubali kirasmi kuitwa Mashahidi wa Yehova, wastahili sana kukumbukwa. (Isaya 43:10-12) Vichapo vya Sosaiti ambavyo vimekazia jina la Mungu vyatia ndani vitabu, Jehovah (1934), “Let Your Name Be Sanctified” (1961), na “The Nations Shall Know That I Am Jehovah”—How? (1971).

Ni lazima tutaje hasa Biblia ya New World Translation of the Holy Scriptures, iliyochapishwa ikiwa nzima katika Kiingereza mwaka wa 1960. Ina jina la Yehova katika kila sehemu ambapo tetragramatoni zinaonekana katika Maandiko ya Kiebrania. Tafsiri hii pia ina jina la Mungu katika sehemu 237 katika Maandiko ya Kigiriki ya Kikristo ambapo uchunguzi wa makini ulionyesha kwamba jina hilo lilipaswa kuwepo. Tunashukuru kama nini kwamba, katika njia mbalimbali, Yehova amemruhusu “mtumwa” na Baraza Linaloongoza la mtumwa huyo kutumia zana zake za uchapishaji na mashirika ya kisheria kujulisha jina lake duniani kote!

Kugawanywa kwa Neno la Mungu Kwaendelezwa

Watu wa Yehova wametoa ushahidi kuhusu jina lake bila kukoma na wamelitetea Neno lake kwa kuchapisha na kugawanya mamilioni ya vichapo vinavyotegemea Biblia na pia Biblia yenyewe. Katika miaka ya mapema ya 1900, shirika la Watch Tower Society lilipata haki ya kumiliki Biblia ya The Emphatic Diaglott, chapa ya Benjamin Wilson ya Maandiko ya Kigiriki ya Kikristo iliyoandikwa katika Kiingereza na Kigiriki. Sosaiti ilichapisha toleo la Wanafunzi wa Biblia la tafsiri ya King James Version, iliyotia ndani nyongeza yenye kurasa 500. Ilichapisha King James Version ikiwa na marejezo ya pambizoni mwaka wa 1942. Kisha mwaka wa 1944 Sosaiti ikaanza kuchapa American Standard Version ya mwaka wa 1901, ambayo hutumia jina la Mungu. Jina la Yehova pia lilikuwa sehemu muhimu ya The Bible in Living English, ya Stephen T. Byington, iliyochapishwa na Sosaiti mwaka wa 1972.

Mashirika ya kisheria yanayotumiwa na Mashahidi wa Yehova yamesaidia kuchapa na kugawanya tafsiri zote hizo za Biblia. Lakini jambo lenye kutokeza zaidi limekuwa ushirikiano wa karibu kati ya shirika la Watch Tower Society na kikundi cha Mashahidi watiwa-mafuta wa Yehova wanaofanyiza Halmashauri ya Tafsiri ya Biblia ya Ulimwengu Mpya. Twafurahi kwamba, sasa nakala zaidi ya 106,400,000 za tafsiri hiyo, ikiwa nzima au sehemu, zimechapishwa katika lugha 38. Kwa kweli shirika la Watch Tower Bible and Tract Society of Pennsylvania ni sosaiti ya Biblia!

“Mtumwa mwaminifu” ‘amewekwa rasmi juu ya mali zote za bwana-mkubwa wake.’ Mali hizo zatia ndani majengo kwenye makao makuu katika Jimbo la New York, Marekani, na ofisi za tawi 110 ambazo sasa zinafanya kazi ulimwengu ni kote. Washiriki wa jamii ya mtumwa wanajua kwamba watahitajiwa kutoa hesabu kuhusu njia ambayo wametumia kile ambacho wamekabidhiwa. (Mathayo 25:14-30) Lakini jambo hilo halimzuii ‘mtumwa’ huyo kuruhusu wanaume wenye sifa za kustahili kutoka miongoni mwa “kondoo wengine” washughulikie majukumu ya kisheria na ya usimamizi. Kwa kweli, jambo hilo huwawezesha washiriki wa Baraza Linaloongoza kutumia wakati mwingi zaidi “kwa sala na kwa huduma ya neno.”—Matendo 6:4.

Maadamu hali katika ulimwengu zaruhusu, Baraza Linaloongoza, likiwakilisha “mtumwa mwaminifu na mwenye busara,” litatumia mashirika ya kisheria. Mashirika hayo yanafaa sana, lakini si ya lazima kabisa. Ikiwa shirika la kisheria linavunjwa kwa amri ya serikali, bado kazi ya kuhubiri itaendelea. Hata leo, katika nchi ambapo kuna vizuizi na mashirika ya kisheria hayatumiwi, ujumbe wa Ufalme unatangazwa, wanafunzi wanafanywa, na ongezeko la kitheokrasi linaendelea. Hayo yanatukia kwa sababu Mashahidi wa Yehova hupanda na kutia maji, naye ‘Mungu hufuliza kuikuza.’—1 Wakorintho 3:6, 7.

Tunatazamia wakati ujao tukiwa na hakika kwamba Yehova atashughulikia mahitaji ya kiroho na kimwili ya watu wake. Yeye na Mwana wake Yesu Kristo, wataendelea kutoa mwongozo na utegemezo kutoka mbinguni unaohitajiwa ili kukamilisha kazi ya kuhubiri Ufalme. Bila shaka, yote tunayotimiza tukiwa watumishi wa Mungu hutimizwa ‘si kwa uwezo, wala si kwa nguvu, bali ni kwa roho ya Yehova.’ (Zekaria 4:6) Hivyo, tunasali kupata msaada wa Mungu, tukijua kwamba kwa nguvu ambazo Yehova hutoa, tutaweza kumaliza kazi ambayo ametupa kufanya wakati huu wa mwisho!