Mashahidi wa Yehova Wasonga Mbele Wakiwa na Usadikisho Imara!

Ripoti ya Mkutano wa Kila Mwaka

KATIKA siku hizi zenye shaka, Mashahidi wa Yehova wamejitokeza kuwa Wakristo wenye usadikisho imara. Jambo hilo lilidhihirishwa wakati wa mkutano wa kila mwaka wa shirika la Watch Tower Bible and Tract Society of Pennsylvania, uliofanywa Jumamosi, Oktoba 7, 2000, kwenye Jumba la Kusanyiko la Mashahidi wa Yehova la Jersey City, New Jersey. *

Katika maneno yake ya ufunguzi, mwenyekiti, John E. Barr, mshiriki wa Baraza Linaloongoza la Mashahidi wa Yehova, alisema: “Kati ya watu wengi sana duniani, sisi tunajua na kuamini kwamba Mwana mpendwa wa Yehova, Kristo Yesu, sasa ametawazwa mbinguni na anatawala katikati ya adui zake.” Uthibitisho wa usadikisho huo imara ulitolewa katika ripoti sita zenye kusisimua kutoka hapa na pale ulimwenguni.

Kushinda Uwasiliani-Roho Kupitia Kweli ya Biblia Nchini Haiti

Uwasiliani-roho umeenea sana huko Haiti. “Kwa kawaida,” akasimulia John Norman, mratibu wa Halmashauri ya Ofisi ya Tawi, “watu hutumia uchawi ili kujikinga.” Mchawi mmoja alianza kuwa na shaka wakati alipopoteza mguu wake kwenye aksidenti. ‘Ninawezaje kupoteza mguu ilhali ninakingwa na roho?’ akawaza. Kama watu wengine wengi, mtu huyu alifundishwa kweli na Mashahidi wa Yehova, akasaidiwa kuachana na uwasiliani-roho. Uwezekano wa ukuzi nchini Haiti wadhihirishwa na ukweli kwamba, idadi ya waliohudhuria Ukumbusho wa kifo cha Kristo Aprili 19, 2000 ilikuwa mara nne zaidi ya idadi ya wahubiri nchini humo.

Bidii Katika Eneo Kubwa la Korea

Asilimia 40 ya Mashahidi wa Yehova nchini Korea ni watumishi wa wakati wote. “Kukiwa na jeshi kubwa kama hilo,” akasema Milton Hamilton, mratibu wa Halmashauri ya Ofisi ya Tawi, “eneo letu lenye watu zaidi ya milioni 47 huhubiriwa mara moja hivi kwa mwezi.” Ukuzi katika makutaniko ya lugha ya ishara ni wa kutokeza sana. Katika mzunguko mmoja wa lugha ya ishara, mafunzo ya Biblia 800 yanaongozwa. Hiyo ni wastani wa mwanafunzi mmoja kwa mhubiri mmoja. Kwa kusikitisha, ndugu vijana wanaendelea kufungwa jela kwa sababu ya msimamo wao wa kutopendelea upande wowote. Ingawa hivyo, Wakristo hao hutendewa vyema, na mara nyingi hupewa kazi zinazohitaji uaminifu.

 Kutimiza Mahitaji ya Ukuzi Nchini Mexico

Kilele cha wahubiri wa Ufalme 533,665 waliripoti utumishi wa shambani nchini Mexico mnamo Agosti 2000. Watu waliohudhuria Ukumbusho walikuwa mara tatu zaidi ya idadi hiyo. “Mradi wetu mwaka huu ni kujenga Majumba ya Ufalme 240 zaidi,” akasema Robert Tracy, mratibu wa Halmashauri ya Ofisi ya Tawi. “Na bado,” akaongeza, “twahitaji mengine mengi.”

Vijana miongoni mwa Mashahidi wa Yehova nchini Mexico wana mfano mzuri. Kasisi mmoja Mkatoliki alisema hivi kuhusu kijana fulani: “Ningependa kuwa na kijana mmoja tu kama yeye miongoni mwa wafuasi wangu. Ninavutiwa na watu hawa kwa sababu ya azimio lao thabiti na jinsi wanavyotumia Biblia kwa hekima. Wamemtetea Mungu, hata kwa kuhatarisha maisha yao.”

Uaminifu-Maadili Katikati ya Machafuko Huko Sierra Leone

Tangu Aprili 1991, wakati vita vya wenyewe kwa wenyewe vilipozuka huko Sierra Leone, maelfu ya watu wameuawa, wakajeruhiwa, au kulemezwa. “Vita na shida zimeathiri watu sana,” akaripoti, Bill Cowan, mratibu wa Halmashauri ya Ofisi ya Tawi. “Wengi waliokuwa na ubaridi kuelekea ujumbe wetu sasa husikiliza kwa upendezi. Ni jambo la kawaida kwa watu kuja kwenye Majumba yetu ya Ufalme kuhudhuria mkutano wao wa kwanza bila hata kualikwa. Mara nyingi ndugu husimamishwa barabarani na watu wanaotaka funzo la Biblia.” Licha ya hali ya msukosuko inayoendelea huko Sierra Leone, kazi ya kuhubiri Ufalme inazaa matunda huko.

Programu Kubwa Sana ya Ujenzi Nchini Afrika Kusini

Wakati huu, kuna uhitaji wa Majumba ya Ufalme elfu kadhaa katika eneo linalosimamiwa na ofisi ya tawi huko Afrika Kusini. Tayari majumba mengi sana yamejengwa. “Badala ya kukutania ndani ya banda au chini ya mti, kama walivyokuwa wakifanya hapo awali, ndugu zetu wanaweza kukutania mahali pafaapo, wakiwa na viti vifaavyo,” akasema John Kikot, mshiriki wa Halmashauri ya Ofisi ya Tawi. “Ingawa mengi ya Majumba hayo ya Ufalme hayakujengwa kwa gharama kubwa, kwa kawaida majengo hayo ndiyo yenye kuvutia zaidi katika maeneo yalikojengwa. Katika maeneo mengine, imeonwa kwamba baada ya kujenga Jumba la Ufalme, hudhurio la kutaniko huongezeka zaidi ya mara mbili mwaka unaofuata.”

Kizazi Kipya cha Mashahidi Huko Ukrainia

Wakati wa mwaka wa utumishi wa 2000, nchi hii ilikuwa na kilele cha wahubiri 112,720. Zaidi ya wahubiri 50,000 kati yao wamejifunza kweli ya Biblia katika miaka mitano iliyopita. “Kwa kweli, Yehova ametokeza kizazi kipya cha Mashahidi chipukizi ili kutangaza jina lake!” akasema John Didur, mratibu wa Halmashauri ya Ofisi ya Tawi. “Katika miaka miwili iliyopita,” akaendelea kusema, “tumeangusha magazeti zaidi ya milioni 50, idadi iliyo sawa na idadi ya watu nchini. Sisi hupokea wastani wa barua elfu moja kila mwezi kutoka kwa watu wenye kupendezwa wakiomba habari zaidi.”

Mambo Mengine Yenye Kusisimua ya Programu Hiyo

Daniel Sydlik, mshiriki wa Baraza Linaloongoza, alitoa hotuba yenye kuvutia. Makala “Jinsi Baraza Linaloongoza Linavyotofautiana na Shirika la Kisheria,” ambayo imo katika gazeti hili, inategemea habari hiyo yenye kuarifu.

Theodore Jaracz wa Baraza Linaloongoza alitoa hotuba yenye kuamsha fikira yenye kichwa “Waangalizi na Watumishi wa Huduma Huwekwa Rasmi Kitheokrasi.” Mojawapo ya makala katika gazeti hili yategemea habari hiyo.

Mkutano huo wa kila mwaka ulitia ndani pia hotuba yenye kusisimua iliyotolewa na mshiriki wa Baraza Linaloongoza David Splane kuhusu andiko la mwaka wa 2001. Andiko hilo linalotegemea maneno ya mtume Paulo, lasema: ‘Simameni mkiwa kamili na kwa usadikisho imara katika mapenzi yote ya Mungu.’ (Wakolosai 4:12) Mashahidi wa Yehova ulimwenguni kote wameazimia kufanya hivyo huku wakihubiri kwa uaminifu habari njema za Ufalme wa Mungu duniani kote.—Mathayo 24:14.

[Maelezo ya Chini]