Upasuaji Bila Damu “Mbinu Kuu ya Kitiba Inayozidi Kutumiwa”

CHINI ya kichwa “Upasuaji ‘Bila Damu,’” gazeti Maclean’s liliripoti kwamba madaktari katika nchi nzima ya Kanada wamekuwa “wakisitawisha mbinu mpya, ambazo katika miaka mitano iliyopita zimefanya ule unaoitwa upasuaji bila damu kuwa mbinu kuu ya kitiba inayozidi kutumiwa.” Mmoja wao ni Brian Muirhead, ambaye ni daktari wa nusukaputi katika Kituo cha Sayansi ya Afya cha Winnipeg. Ni nini kilichomchochea kufanya utafiti wa tiba badala isiyohusisha damu?

Mnamo mwaka wa 1986, Dakt. Muirhead alikubali kazi ngumu ya kumfanyia upasuaji mwanamume mmoja mwenye umri wa miaka 70 mwenye kidonda cha tumbo kilichokuwa kikivuja damu, na ambaye kwa sababu ya imani yake inayotegemea Biblia akiwa mmoja wa Mashahidi wa Yehova, aliomba atibiwe bila kutiwa damu mishipani. (Matendo 15:28, 29) Dakt. Muirhead “alitumia njia isiyotumiwa sana ya kumtia mgonjwa umajimaji wenye chumvi ili kuzuia msukumo wa damu usishuke,” laripoti Maclean’s. “Mbinu hiyo ilifaulu, nayo ikamsadikisha Muirhead hata zaidi kwamba ‘tunatia watu wengi sana damu mishipani. Nafikiri wakati umewadia wa kutafuta njia badala.’”

“Hangaiko la kupata damu wakati ujao—na hofu ya wagonjwa wengi ya kuambukizwa virusi vinavyoleta maradhi kwa kutiwa damu mishipani,” ndiyo mambo yaliyochochea utafiti ufanywe wa tiba ya upasuaji bila damu. Kwa sababu ya utafiti uliofanywa na madaktari wabunifu, watu wengine mbali na Mashahidi wa Yehova wamenufaika. “Mbali na kufanya isiwe lazima watu wengi watiwe damu mishipani, upasuaji bila damu hupunguza hatari—hata iwe ni kwa kiasi kidogo—za kupatwa na maambukizo kutokana na damu yenye virusi,” lasema Maclean’s. Hata damu “isiyo na virusi” yaweza kuleta hatari ya maambukizo ya muda kwa kukandamiza mfumo wa kinga wa mgonjwa.

Ni nini kinachofanya Mashahidi wa Yehova wawe na itikadi thabiti kuhusu tiba badala isiyohusisha damu? Huenda ukapendezwa kusoma broshua Damu Yaweza Kuokoaje Uhai Wako? Mashahidi wa Yehova watafurahi kuizungumzia pamoja nawe.