Jinsi Wanawake Wawili Walivyoathiriwa na Ujane

SANDRA ni mjane anayeishi Australia. Sandra alishtuka sana mume wake alipokufa miaka kadhaa iliyopita. “Nilikabili wakati mgumu sana nilipotambua kwamba nimempoteza kwa ghafula mwenzi wangu na rafiki yangu mkubwa. Kwa kweli siwezi kukumbuka jinsi nilivyorudi nyumbani kutoka hospitalini au mambo niliyofanya siku hiyo. Majuma machache yaliyofuata, hofu yangu iligeuka kuwa maumivu ya daima.”

Sandra ana rafiki mwenye umri mkubwa zaidi anayeitwa Elaine, ambaye amekuwa mjane kwa miaka sita hivi. Elaine alimtunza mume wake David, kwa muda wa miezi sita kabla hajafa kwa kansa. Alikuwa na huzuni nyingi sana hivi kwamba muda mfupi baada ya mume wake kufa, alipatwa na upofu wa muda. Miaka miwili baadaye, alizimia hadharani. Daktari wake hakuona dalili ya ugonjwa wowote. Hata hivyo, aligundua kwamba Elaine alikuwa na huzuni nyingi sana moyoni, kwa hiyo akapendekeza kwamba arudi nyumbani na kujaribu sana kulia. “Ilinichukua muda kukabiliana na huzuni yangu,” akiri Elaine, huku akiongezea kusema kwamba alipohisi upweke, “alienda kwenye chumba cha kulala na kujifunika kichwa kwa nguo za David.”

Naam, kifo cha mwenzi mpendwa chaweza kuwa na matokeo mbalimbali, kwa kuwa ujane wahusisha mengi zaidi ya kuishi tu bila mume. Kwa mfano, kwa kipindi fulani, Sandra alihisi kwamba utu wake ulikuwa umebadilika kabisa. Sawa na wajane wengine wengi waliokuwa wamefiwa karibuni, yeye pia alikuwa na wasiwasi na kukosa usalama. Sandra akumbuka hivi: “Kwa kuwa mume wangu ndiye aliyekuwa akiamua mambo, niliachwa peke yangu kwa ghafula kufanya maamuzi hayo. Usingizi wangu ulivurugika. Nilichoka sana. Sikujua la kufanya.”

Kila siku, kuna watu wanaopatwa na hali kama ya Sandra na Elaine ulimwenguni pote. Kwa ujumla, ugonjwa, aksidenti, vita, maangamizi ya kikabila, na jeuri vinachangia ongezeko la idadi ya wajane. * Wengi wa wanawake hao huvumilia huzuni hiyo bila kuionyesha, pasipo kujua la kufanya. Marafiki na watu wa jamaa wanaweza kufanya nini ili kusaidia wale wanaofanya marekebisho maishani ili wakabiliane na ujane? Makala ifuatayo ina madokezo kadhaa yanayoweza kusaidia.

[Maelezo ya Chini]