“Yehova Amekuwa Mwema Sana Kwangu!”

JIONI yenye kupendeza ya Machi 1985, wanaume na wanawake wanaofanya kazi katika Idara ya Uandikaji kwenye makao makuu ya Mashahidi wa Yehova huko New York, Marekani, walishuhudia tukio muhimu. Karl. F. Klein alikuwa ametumikia akiwa mtumishi wa wakati wote kwa muda wa miaka 60. Ndugu Klein alisema hivi kwa shauku: “Yehova amekuwa mwema sana kwangu!” Alisema kwamba alipendezwa sana na andiko la Biblia la Zaburi 37:4. Baadaye, aliwafurahisha wote kwa kuwapigia ala ya muziki inayoitwa fidla.

Katika miaka 15 iliyofuata, Ndugu Klein aliendelea kutumikia akiwa mshiriki wa idara ya uandikaji na pia katika Baraza Linaloongoza la Mashahidi wa Yehova. Kisha, Januari 3, 2001, Ndugu Klein alimaliza mwendo wake wa kidunia akiwa na umri wa miaka 95.

Karl alizaliwa nchini Ujerumani. Familia yao ilihamia Marekani, na Karl akakulia katika kitongoji cha Chicago, Illinois. Walipokuwa wachanga, Karl na ndugu yake mdogo Ted, walipendezwa sana na Biblia. Karl alibatizwa mwaka wa 1918, na aliposikia mambo yenye kusisimua kwenye mkusanyiko wa Wanafunzi wa Biblia mwaka wa 1922 yalimchochea apendezwe daima na huduma ya shambani. Hakutaka hata juma moja lipite kabla hajashiriki katika kazi ya kuhubiri, na aliendelea kufanya hivyo hata katika majuma ya mwisho-mwisho kabla hajafa.

Karl alijiunga na washiriki wa makao makuu katika mwaka wa 1925, na mwanzoni alifanya kazi katika matbaa. Alipendezwa sana na muziki na kwa miaka kadhaa alipiga fidla katika okestra iliyokuwa muhimu sana katika matangazo ya redio ya Kikristo. Baadaye, alifanya kazi katika Idara ya Utumishi, na alifurahia hasa ushirika pamoja na mwangalizi wake, T. J. Sullivan. Wakati huohuo, Ted alifunga ndoa kisha yeye na mkewe Doris, wakaanza utumishi wa mishonari nchini Puerto Rico.

Karl Klein alifanya kazi katika Idara ya Uandikaji kwa muda wa nusu karne, ambapo alisaidia sana kwa sababu alipenda kufanya utafiti na alikuwa na ujuzi mwingi sana wa Biblia. Katika mwaka wa 1963, Karl alimwoa Margareta, mishonari Mjerumani aliyekuwa akitumikia nchini Bolivia. Kwa msaada wenye upendo wa mke wake, hasa kwa sababu alikuwa na matatizo ya afya, aliendelea kufanya kazi muda mrefu baada ya kupitisha umri ambao wengi hustaafu. Asili ya Karl ya kusema mambo waziwazi pamoja na shauku aliyokuwa nayo akiwa mwanamuziki, ilimsaidia kutoa hotuba nzuri sana kwenye makutaniko na mikusanyiko. Muda mfupi kabla hajafa, aliongoza mazungumzo ya andiko la siku asubuhi katika familia kubwa ya Betheli ya New York, na mazungumzo hayo yalipendeza na kunufaisha wote.

Wasomaji wengi wa kawaida wa Mnara wa Mlinzi watakumbuka simulizi la maisha lenye kuvutia la Ndugu Klein, ambalo lilichapishwa katika toleo la Oktoba 1, 1984. Utafurahia kusoma au kusoma tena simulizi hilo, ukikumbuka kwamba mwandishi wake alitumia miaka kumi na mitano na zaidi akiwa Mkristo mwaminifu na aliyejitoa.

Akiwa mmoja wa watiwa-mafuta wa Bwana, Ndugu Klein alitamani kwa moyo wote kutawala pamoja na Kristo mbinguni. Tuna kila sababu ya kuamini kwamba sasa Yehova amemtimizia tamaa hiyo.—Luka 22:28-30.

[Picha katika ukurasa wa 31]

Karl, mwaka wa 1943 akiwa na T. J. Sullivan na Ted na Doris

[Picha katika ukurasa wa 31]

Karl na Margareta, Oktoba 2000