Simameni Mkiwa Kamili na kwa Usadikisho Imara

‘Tazama! Umati Mkubwa!’

SWALI hili lilikuwa limewatatanisha watumishi wa Yehova kwa miaka mingi. Walikuwa wamejaribu kupata jibu la Kimaandiko kwa muda mrefu. Lilikuwa limetokeza mijadala mingi. Hata hivyo, hatimaye katika mwaka wa 1935 kwenye mkusanyiko wa Washington, D.C. jibu la Biblia lilipatikana likasisimua sana wasikilizaji.

Mijadala hiyo yote ilisababishwa na swali moja: “Mkutano mkubwa” (Union Version), au “umati mkubwa” (Tafsiri ya Ulimwengu Mpya), ambao unatajwa katika Ufunuo 7:9, ni nani? Je, kundi hilo la waamini wangeishi mbinguni?

Swali la Muda Mrefu

Tangu siku za mtume Yohana hadi wakati wetu, Wakristo walikuwa wametatanishwa kuhusu “mkutano mkubwa.” Wanafunzi wa Biblia waliamini kwamba umati mkubwa ulikuwa kundi la pili la waamini wenye tumaini la kwenda mbinguni, watu ambao walijua ukweli wa Biblia lakini hawakuwa na bidii katika kazi ya kuhubiri.

Hata hivyo, baadhi ya watu walioshirikiana na Wakristo watiwa-mafuta walikuwa wenye bidii sana katika kazi ya kuhubiri. Hawakuwa na tumaini la kwenda mbinguni. Tumaini lao lilipatana na hotuba ya watu wote iliyotolewa na watu wa Yehova tangu mwaka wa 1918 hadi 1922. Hotuba hiyo ilikuwa na kichwa “Mamilioni Wanaoishi Sasa Hawatakufa Kamwe.” Hao wangepokea baraka ya uhai udumuo milele duniani.

Toleo la Kiingereza la Mnara wa Mlinzi la Oktoba 15, 1923, lilizungumzia mfano ambao Yesu alitoa juu ya kondoo na mbuzi likisema hivi: “Kondoo huwakilisha watu wote wa mataifa, ambao hawajazaliwa kwa roho lakini wanapenda uadilifu. Hao hukubali akilini Yesu Kristo kuwa Bwana na kutarajia na kutumaini maisha bora chini ya utawala wake.”—Mathayo 25:31-46.

Uelewevu Waongezeka

Katika mwaka wa 1931, Kitabu cha Kwanza cha Vindication (Utetezi), kilizungumzia Ezekieli sura ya 9. Kitabu hicho kilionyesha kwamba wale ambao waliwekwa alama katika vipaji vya nyuso zao waokoke mwisho wa ulimwengu huu, ndio wale kondoo wa mfano wa Yesu. Kitabu cha Tatu cha Vindication, (kilichochapishwa katika mwaka wa 1932), kilifafanua mtazamo mnyofu wa moyoni wa Yehonadabu, mwanamume asiyekuwa Mwisraeli. Ili aambatane naye kuona bidii yake ya kuwaua waabudu wote wa sanamu, Yehonadabu aliingia katika gari la Mfalme Yehu wa Israeli aliyetiwa mafuta. (2 Wafalme 10:15-28) Kitabu hicho kilisema hivi: “Yehonadabu aliwakilisha au alikuwa mfano wa kiunabii wa kundi la watu ambao sasa wako duniani [ambao] hawaungi mkono tengenezo la Shetani, nao huchukua msimamo wao kwa upande wa uadilifu. Hao ni wale ambao Bwana atawaokoa wakati wa Har-Magedoni, na kuwalinda wakati wa dhiki hiyo, na kuwapa uhai udumuo milele duniani. Hao ni kundi la ‘kondoo.’”

Katika mwaka wa 1934, gazeti la Mnara wa Mlinzi lilieleza kinaganaga kwamba Wakristo walio na tumaini la kuishi milele duniani wanapaswa kujiweka wakfu kwa Yehova na kubatizwa. Uelewevu kuhusu kundi hilo la kidunia ulizidi kuongezeka.—Mithali 4:18.

Uelewevu Ulio Wazi

Andiko la Ufunuo 7:9-17 lilielekea kueleweka wazi. (Zaburi 97:11) Gazeti la Mnara wa Mlinzi lilikuwa limesema kwamba mkusanyiko uliofanywa Washington, D.C. Marekani kutoka Mei 30 hadi Juni 3, 1935, “[unge]fariji na kunufaisha sana” wale ambao walifananishwa na Yehonadabu. Na hivyo ndivyo ilivyokuwa!

Katika hotuba yenye kusisimua kuhu su “Mkutano Mkubwa” iliyosikilizwa na watu 20,000, J. F. Rutherford alitoa uthibitisho wa Kimaandiko kwamba “kondoo wengine” wa siku zetu ndio “umati mkubwa” unaozungumziwa katika Ufunuo 7:9. (Yohana 10:16) Alipofikia kilele cha hotuba yake, msemaji alisema: “Tafadhali, nyote mlio na tumaini la kuishi milele duniani simameni.” Wengi wa wasikilizaji waliposimama, Ndugu Rutherford alisema: “Tazama! Mkutano Mkubwa!” Kwanza wasikilizaji walikaa kimya, kisha wakashangilia kwa vigelegele. Kesho yake, Mashahidi wa Yehova wapya 840 walibatizwa, na wengi wao walikuwa wa umati mkubwa.

Wengi Walikuwapo

Kabla ya mwaka wa 1935, wengi wa wale waliokubali ujumbe wa Biblia na kuonyesha bidii katika kazi ya kuhubiri habari njema, walikuwa na tumaini la kuishi milele katika dunia Paradiso. Hawakuwa na tamaa ya kwenda mbinguni, kwa kuwa Mungu hakuwa amewapa tumaini la kuishi mbinguni. Kujitambulisha kwao kuwa washiriki wa umati mkubwa wa kondoo wengine, kulionyesha kwamba mwito wa kuwa mshiriki wa kundi la 144,000 ulikuwa karibu umetimizwa kufikia mwaka wa 1935.—Ufunuo 7:4.

Wakati Vita ya Pili ya Ulimwengu ilipoanza, Shetani Ibilisi alijaribu juu chini kuzuia washiriki wa umati mkubwa wasikusanywe. Kazi ya kuhubiri Ufalme ilizuiwa katika nchi nyingi. Katika pindi hiyo yenye huzuni, kabla tu ya kifo chake katika Januari 1942, Ndugu J. F. Rutherford alisema hivi: “Yaelekea ‘mkutano mkubwa’ hautakuwa mkubwa sana.”

Lakini kwa baraka za Mungu, mambo yamekuwa tofauti na vile alivyofikiri. Watiwa-mafuta na wenzao, wale kondoo wengine, wamekuwa wakitimiza utume wao wa kufanya wanafunzi ‘wakiwa wamesimama kamili na kwa usadikisho imara.’ (Wakolosai 4:12; Mathayo 24:14; 28:19, 20) Kufikia mwaka wa 1946 kulikuwa na Mashahidi wa Yehova 176,456 duniani na wengi wao walikuwa washiriki wa umati mkubwa. Katika mwaka wa 2000, zaidi ya Mashahidi 6,000,000 walikuwa wakimtumikia Yehova kwa uaminifu katika nchi 235—kwa kweli huo ni umati mkubwa! Nao waendelea kuongezeka.