“Je, Mungu Huwahukumu Watu Wachomeke Katika Moto wa Mateso?”

“Je, nyinyi mnajifunza theolojia?”

Swali hilo liliwashangaza Joel na Carl. Wanaume hao wawili vijana—wanaofanya kazi ya kujitolea kwenye makao makuu ya Mashahidi wa Yehova huko Brooklyn, New York—walikuwa wakichunguza vitabu katika duka la vitabu. Joel alipochunguza fahirisi za Biblia, Carl alimweleza juu ya mazungumzo aliyokuwa nayo katika huduma ya shambani. Mwanamume aliyesimama karibu nao alianza kuongea nao kwa kuwa alikuwa amesikia baadhi ya mambo waliyokuwa wanazungumzia.

Hata hivyo, jambo muhimu kwa mwanamume huyo halikuwa kujua ikiwa vijana hao wawili walijifunza theolojia, bali alikuwa na swali lililomhusu yeye binafsi. Akaeleza hivi: “Mimi ni Myahudi, na baadhi ya marafiki wangu Wakristo wameniambia kwamba nitachomwa katika moto wa mateso kwa sababu Wayahudi walimkataa Yesu. Jambo hilo hunisumbua sana. Haielekei Mungu wa upendo angeweza kwa haki kutoa adhabu hiyo. Je, Mungu huwahukumu watu wachomeke katika moto wa mateso?”

Joel na Carl walimwambia huyo mwanamume mwenye moyo mweupe kwamba wao huchukua funzo lao la Biblia kwa uzito. Walimwonyesha katika Maandiko kwamba wafu hawajui lolote na kwamba wanalala usingizi katika kifo wakingojea ufufuo. Kwa hiyo, hawateswi wala kuchomeka katika moto wa mateso. (Zaburi 146:3, 4; Mhubiri 9:5, 10; Danieli 12:13; Yohana 11:11-14, 23-26) Baada ya mazungumzo yao yaliyoendelea kwa muda wa dakika 45, mwanamume huyo aliwapa Joel na Carl anwani yake na kuomba habari zaidi kuhusu jambo hilo.

Ikiwa kuna moto wa mateso, je, mtu angeomba kupelekwa huko? Mzee wa kale, Ayubu, alipotaka kuepuka mateso yake maishani, aliomba hivi: “Ni nani atakayetimiza ombi langu, kwamba unihifadhi motoni [hell katika Kiingereza], na kunificha hadi hasira yako ipite?” (Ayubu 14:13, Douay Version, italiki ni zetu.) Kwa wazi, Ayubu hakuamini kwamba angeteswa baada ya kifo chake. Badala yake alitaka kupata ulinzi. Kifo ni hali ya kutokuwapo, na watu wote wanaokufa wanakwenda kwenye kaburi la kawaida la wanadamu wote linalotajwa katika Biblia.

Ukitaka habari zaidi kuhusu kile kinachotupata tunapokufa na tumaini la wafu, tunakukaribisha kwa uchangamfu kutuandikia kama vile inavyoelezwa hapa chini.