Imani Yako Inategemea Nini?

Kuamini kumefasiriwa kuwa ‘kukubali jambo kuwa la kweli, au halisi.’ Hati ya shirika la Umoja wa Mataifa ya Universal Declaration of Human Rights, inalinda “haki [ya kila mtu] ya kuwa na uhuru wa kufikiri, wa dhamiri na wa dini.” Haki hiyo yatia ndani uhuru “wa [mtu] kubadili dini au imani yake” akitaka kufanya hivyo.

HATA HIVYO, kwa nini mtu atake kubadili dini au imani yake? Ni jambo la kawaida watu kusema kwamba “nina imani yangu, na ninaridhika nayo.” Hata wengi wanahisi kwamba imani isiyo ya kweli haiwezi kumdhuru mtu. Kwa mfano, mtu anayeamini kwamba dunia ni tambarare hawezi kudhuriwa na imani hiyo au kumdhuru mtu mwingine. Wengine husema “hatupaswi kubishana na wengine kwa sababu tu imani yao inatofautiana na yetu.” Je, hilo ni jambo la busara sikuzote? Je, daktari atakubaliana na mmoja wa wafanyakazi wenzake anayeamini kwamba ni sawa kugusa maiti kisha kwenda moja kwa moja kuwatibu wagonjwa kwenye wadi?

Imani ya kidini isiyo ya kweli imesababisha madhara makubwa sana katika historia. Fikiria tisho lililotokea wakati viongozi wa kidini “walipowachochea Wakristo washupavu kutenda jeuri kwa ukatili” wakati wa mapambano yaliyoitwa Krusedi Takatifu za Enzi za Kati. Au wazia “Wakristo” wenye bunduki wa siku hizi ambao walipigana katika vita vya wenyewe kwa wenyewe hivi majuzi, na ambao ni “sawa na wapiganaji wa enzi za kati walioandika majina ya watakatifu kwenye panga zao, na kubandika picha za Bikira kwenye vitako vya bunduki zao.” Wakristo hao wote washupavu waliamini kwamba walikuwa wanafanya jambo lililo sawa. Hata hivyo, katika pambano hili na mapambano mengine ya kidini, kulikuwa na kasoro kubwa sana.

 Kwa nini kuna vita na vurugu nyingi? Biblia inajibu kwamba Shetani Ibilisi ‘anaiongoza vibaya dunia nzima inayokaliwa.’ (Ufunuo 12:9; 2 Wakorintho 4:4; 11:3) Mtume Paulo alionya ya kuwa inasikitikisha kwamba watu wengi wa dini ‘wangeangamia’ kwa sababu ya kudanganywa na Shetani, ambaye ‘angetenda kazi yenye nguvu na mambo ya ajabu pamoja na udanganyo.’ Paulo alisema kwamba watu kama hao “hawakukubali upendo wa ile kweli ili wapate kuokolewa” na kwa hiyo ‘wangeuamini uwongo.’ (2 Wathesalonike 2:9-12) Unaweza kufanya nini ili usiamini uwongo kwa urahisi? Kwa kweli, imani yako inategemea nini?

Je, Umelelewa Katika Imani Hiyo?

Labda umelelewa katika imani ya familia yenu. Hilo laweza kuwa jambo zuri. Mungu anataka wazazi wawafundishe watoto wao. (Kumbukumbu la Torati 6:4-9; 11:18-21) Kwa mfano, kijana Timotheo alinufaika sana kwa kumsikiliza mama yake na nyanya yake. (2 Timotheo 1:5; 3:14, 15) Maandiko hututia moyo tuheshimu imani ya wazazi. (Mithali 1:8; Waefeso 6:1) Lakini je, Muumba wako alikusudia uamini mambo fulani kwa sababu tu wazazi wako wanayaamini? Kwa kweli kushikilia imani na mambo yaliyofanywa na vizazi vilivyopita bila kufikiri kwaweza kuwa hatari.—Zaburi 78:8; Amosi 2:4.

Mwanamke Msamaria aliyekutana na Yesu Kristo alikuwa amelelewa na kuamini kwamba dini ya Wasamaria ndiyo ya kweli. (Yohana 4:20) Yesu aliheshimu uhuru wa mwanamke huyo wa kuchagua jambo alilotaka kuamini, lakini alimwambia pia: “Mwaabudu kile msichojua.” Kwa kweli imani yake ya kidini haikuwa ya kweli, na Yesu alimwambia kwamba anapaswa kubadili imani yake iwapo atamwabudu Mungu kwa njia inayokubalika—“kwa roho na kweli.” Badala ya kushikilia imani ambayo yamkini aliithamini, baada ya muda, yeye na wengine wangelazimika kuwa ‘watiifu kwa imani’ iliyofunuliwa kupitia Yesu Kristo.—Yohana 4:21-24, 39-41; Matendo 6:7.

Je, Umefundishwa Kukubali Imani ya Wataalamu?

Walimu na wataalamu wengi katika nyanja za pekee zinazohusu ujuzi fulani wanastahili heshima kubwa. Hata hivyo, historia ina mifano mingi ya walimu mashuhuri waliokosea kabisa. Kwa mfano, kuhusu vitabu viwili vya sayansi vilivyoandikwa na mwanafalsafa Mgiriki Aristotle, mwanahistoria Bertrand Russell alisema kwamba “kwa maoni ya sayansi ya kisasa, ni nadra sana kukubali sentensi hata moja kutoka kwenye vitabu hivyo.” Hata wataalamu wa siku hizi mara nyingi hufikia mikataa yenye makosa kabisa. Mnamo mwaka wa 1895, mwanasayansi Mwingereza Lord Kelvin alisisitiza hivi kwa uhakika: “Ni vigumu sana kutengeneza chombo kinachoruka angani ambacho ni kizito kuliko hewa.” Kwa hiyo, mtu mwenye hekima haamini bila msingi wowote kwamba jambo fulani ni la kweli kwa sababu tu limesemwa na mwalimu fulani mashuhuri.—Zaburi 146:3.

Twapaswa kuwa na tahadhari hiyohiyo kuhusu elimu ya kidini. Mtume Paulo alielimishwa vizuri na walimu wake wa kidini na alikuwa “mwenye bidii zaidi sana kwa mapokeo ya baba [zake].” Hata hivyo, kwa kweli bidii yake kwa ajili ya imani ya kimapokeo ya wazazi wake wa kale, ilifanya apatwe na matatizo mengi. Ilifanya ‘alinyanyase kutaniko la Mungu na kuliangamiza kabisa.’ (Wagalatia 1:13, 14; Yohana 16:2, 3) Jambo lililokuwa baya hata zaidi ni kwamba, kwa muda mrefu, Paulo aliendelea “kupiga teke dhidi ya michokoo,” huku akipinga uvutano ambao ungemwongoza amwamini Yesu Kristo. Ilibidi Yesu aingilie kati kwa njia yenye kutokeza ili kumchochea Paulo abadili imani yake.—Matendo 9:1-6; 26:14.

Je, Unaathiriwa na Vyombo vya Habari?

Labda imani yako imeathiriwa sana na vyombo vya habari. Watu wengi wanafurahi kwamba kuna uhuru wa kusema katika vyombo vya habari ambavyo huwapa habari zinazoweza kuwa zenye manufaa. Hata hivyo, kuna watu fulani mashuhuri ambao wanaweza  kutumia vibaya vyombo vya habari na mara nyingi wamefanya hivyo. Mara nyingi vyombo hivyo huwa na habari zenye ubaguzi zinazoweza kuathiri kufikiri kwako bila wewe kujua.

Kwa kuongezea, ili kuvutia watu wengi zaidi, vyombo vya habari vina mwelekeo wa kukazia mambo yenye kusisimua na yasiyo ya kawaida. Mambo ambayo hayangeweza kuchapishwa magazetini ili kusomwa na umma miaka michache tu iliyopita, sasa ni mambo ya kawaida. Viwango vya mwenendo vinavyojulikana vinazidi kuzorota polepole. Fikira za watu zinazidi kupotoka hatua kwa hatua. Wanaanza kuamini kwamba “uovu ni wema, na kwamba wema ni uovu.”—Isaya 5:20; 1 Wakorintho 6:9, 10.

Kupata Msingi Thabiti wa Imani

Kuamini mawazo na falsafa za wanadamu kunalinganishwa na kujenga juu ya mchanga. (Mathayo 7:26; 1 Wakorintho 1:19, 20) Kwa hiyo, basi, imani yako yapasa kutegemea nini? Kwa kuwa Mungu amekupa uwezo wa akili wa kuchunguza vitu vinavyokuzunguka na kuuliza maswali yanayohusu mambo ya kiroho, je, si jambo la akili kwamba angeandaa pia njia ya kupata majibu sahihi kwa maswali yako? (1 Yohana 5:20) Naam, bila shaka angefanya hivyo! Hata hivyo, unaweza kuthibitishaje mambo ya kweli au halisi kuhusiana na ibada? Hatuwezi kusita kusema kwamba Neno la Mungu, Biblia, ndilo huandaa msingi pekee wa kupata uthibitisho huo.—Yohana 17:17; 2 Timotheo 3:16, 17.

Mtu fulani atasema, “ngoja kidogo, je, vurugu na vita duniani havijasababishwa na watu ambao wana Biblia?” Ni kweli kwamba viongozi wa kidini wanaodai kwamba wanaiamini Biblia wametokeza mawazo mengi yenye kutatanisha na yasiyopatana. Hii ni kwa sababu kwa kweli imani yao haitegemei Biblia. Mtume Petro anawataja kuwa “manabii wasio wa kweli” na “walimu wasio wa kweli” ambao wangetokeza “mafarakano yenye kuangamiza.” Petro asema kwamba, kwa sababu ya mwenendo wao, “njia ya kweli itasemewa kwa maneno yenye kuudhi.” (2 Petro 2:1, 2) Hata hivyo, Petro aandika, “tuna neno la unabii likiwa limefanywa hakika zaidi; na mnafanya vema kulikazia uangalifu kama vile kwa taa yenye kung’aa mahali penye giza.”—2 Petro 1:19; Zaburi 119:105.

Biblia hututia moyo tulinganishe imani yetu na mafundisho yake. (1 Yohana 4:1) Mamilioni ya wasomaji wa gazeti hili wanaweza kuthibitisha kwamba kufanya hivyo kumewasaidia wafanye maisha yao yawe na kusudi na yawe matulivu zaidi. Kwa hiyo uwe kama Waberoya wenye akili ya uelekevu. ‘Chunguza Maandiko kwa uangalifu kila siku’ kabla hujaamua jambo utakaloamini. (Matendo 17:11) Mashahidi wa Yehova watafurahi kukusaidia ili ufanye hivyo. Bila shaka, ni uamuzi wako kuamini jambo utakalo. Hata hivyo, ni jambo la busara kuhakikisha kwamba imani yako haiathiriwi na hekima na tamaa za wanadamu, bali na Neno la Mungu la kweli lililofunuliwa.—1 Wathesalonike 2:13; 5:21.

[Picha katika ukurasa wa 6]

Unaweza kutegemeza imani yako katika Biblia ukiwa na uhakika