Somo Kutokana na Mtende

ENSAIKLOPEDIA moja ya Biblia inasema kwamba mtende ‘una kivuli cha umbo chenye kuvutia sana.’ Nyakati za Biblia na hata leo, mitende inapamba Bonde la Mto Nile la Misri, nayo hutoa kivuli chenye kuburudisha kando-kando ya chemchemi za Jangwa la Negeb.

Mtende hukua ukiwa umenyooka kabisa sawa na miti mingine ya jamii hiyo. Mitende mingine hufikia kimo cha meta 30 na huendelea kuzaa matunda kwa miaka 150. Naam, mtende ni wenye kuvutia na huzaa sana. Mtende huzaa mafungu kadhaa ya tende kila mwaka. Fungu moja tu linaweza kuwa na tende 1,000. Mwandishi mmoja aliandika hivi kuhusu tende: ‘Wale ambao hula tu tende zilizokaushwa zinazouzwa madukani hawajui utamu halisi wa tende zilizotoka tu kuchumwa.’

Kwa kufaa, Biblia hufananisha watu fulani na mitende. Kama mtende wenye kuzaa sana, mtu apaswa kuwa na mwenendo mzuri kiadili na apaswa kuendelea kuzaa matunda mazuri ili kumpendeza Mungu. (Mathayo 7:17-20) Kwa sababu hiyo, michoro ya mitende ilitumiwa kupamba hekalu la Solomoni na pia hekalu ambalo Ezekieli aliona katika njozi. (1 Wafalme 6:29, 32, 35; Ezekieli 40:14-16, 20, 22) Hivyo, ni lazima mtu awe na sifa zenye kupendeza kama mtende ili ibada yake ikubalike kwa Mungu. Neno la Mungu lasema: “Mwenye haki atasitawi kama mtende.”—Zaburi 92:12.