“Baraka ya Bwana Hutajirisha”

SOTE tungependa kubarikiwa. Baraka huleta “furaha, hali njema, au ufanisi.” Kila baraka ya kweli na yenye kudumu hutoka kwa Yehova, Muumba wetu mwenye upendo, kwa kuwa yeye ni Mpaji wa “kila zawadi njema na kila upaji mkamilifu.” (Yakobo 1:17) Yeye huwabariki wanadamu wote, hata wale wasiomjua. Yesu alisema hivi kuhusu Babake: “Yeye hufanya jua lake lichomoze juu ya watu waovu na wema na kufanya mvua inyeshe juu ya watu waadilifu na wasio waadilifu.” (Mathayo 5:45) Hata hivyo, Yehova huwaonyesha hangaiko la pekee wale wampendao.—Kumbukumbu la Torati 28:1-14; Ayubu 1:1; 42:12.

Mtunga-zaburi aliandika: ‘BWANA hatawanyima kitu chema hao waendao kwa ukamilifu.’ (Zaburi 84:11) Naam, wale wanaomtumikia Yehova huishi maisha yenye kuthawabisha na yenye kusudi. Wanajua kwamba “baraka ya BWANA hutajirisha, wala hachanganyi huzuni nayo.” Biblia pia husema: “Waliobarikiwa na [Yehova] watairithi nchi.” (Mithali 10:22; Zaburi 37:22, 29) Hiyo itakuwa baraka iliyoje!

Tunawezaje kupokea baraka za Yehova? Kwanza, tunahitaji kusitawisha sifa zinazompendeza. (Kumbukumbu la Torati 30:16, 19, 20; Mika 6:8) Mifano ya watumishi watatu wa zamani wa Yehova itatusaidia kuelewa jambo hilo.

Yehova Huwabariki Watumishi Wake

Noa alikuwa mtumishi mwenye kutokeza wa Mungu. Kwenye andiko la Mwanzo 6:8, tunasoma: “Nuhu [“Noa,” NW] alipata neema machoni pa BWANA.” Kwa nini? Kwa kuwa Noa alikuwa mtiifu. Masimulizi hayo yanasema: ‘Noa alikwenda pamoja na Mungu.’ Noa alifuata kanuni za uadilifu za Yehova na kutii amri zake. Hata ingawa wakati huo ulimwengu ulikuwa umejaa jeuri na upotovu, Noa alichochewa ‘kufanya sawa-sawa na vyote alivyomwamuru Mungu, hivyo ndivyo alivyofanya.’ (Mwanzo 6:9, 22) Kwa sababu hiyo, Yehova alimwagiza Noa ajenge “safina kwa ajili ya kuokoa watu wa nyumbani mwake.” (Waebrania 11:7) Kwa njia hiyo, Noa na familia yake—na kupitia kwao wanadamu wote—waliokoka uharibifu wa kizazi hicho. Naye Noa alikufa akiwa na tumaini la kufufuliwa na matazamio ya kupata uhai udumuo milele katika dunia paradiso. Alipata baraka nyingi kama nini!

Abrahamu pia alikuwa na sifa zilizompendeza Yehova. Kati ya sifa hizo, imani ndiyo iliyokuwa yenye kutokeza zaidi. (Waebrania 11:8-10) Abrahamu aliacha maisha yenye starehe huko Uru na baadaye Harani kwa sababu alikuwa na imani katika ahadi ya Yehova kwamba mbegu yake ingeongezeka na kubariki mataifa yote. (Mwanzo 12:2, 3) Licha ya miaka mingi ya majaribu, imani yake ilithawabishwa, mwana wake Isaka alipozaliwa. Kupitia kwake, Abrahamu akawa babu wa taifa teule la Mungu, Israeli, na hatimaye akawa babu ya Mesiya. (Waroma 4:19-21) Isitoshe, yeye ndiye “baba ya wote wale walio na imani,” naye alikuja kuitwa  “rafiki ya Yehova.” (Waroma 4:11; Yakobo 2:23; Wagalatia 3:7, 29) Maisha yake yalikuwa yenye kusudi na yenye baraka kama nini!

Fikiria pia Musa, aliyekuwa mtu mwaminifu. Mojawapo kati ya sifa zake zenye kutokeza ni uthamini wake wa mambo ya kiroho. Musa alikataa utajiri wote wa Misri naye “aliendelea akiwa imara kama ambaye anaona Yeye asiyeonekana.” (Waebrania 11:27) Baada ya kukaa Midiani kwa miaka 40, alirudi Misri akiwa mzee na kumkabili kijasiri Farao, mtawala mkuu zaidi wa wakati huo, akitaka ndugu zake waachiliwe. (Kutoka 7:1-7) Aliona yale mapigo kumi, kugawanywa kwa Bahari Nyekundu, na kuharibiwa kwa majeshi ya Farao. Yehova alimtumia kuwapa Waisraeli Sheria na kuwa mpatanishi katika agano Lake na taifa hilo jipya. Musa aliongoza taifa la Israeli nyikani kwa muda wa miaka 40. Maisha yake yalikuwa na kusudi halisi, naye alifurahia migawo mingi yenye thamani.

Baraka Leo

Masimulizi hayo yanaonyesha kwamba maisha ya wale wanaomtumikia Mungu yana kusudi kikweli. Watu wa Yehova hubarikiwa sana wanapositawisha sifa kama vile utii, imani, na uthamini kwa mambo ya kiroho.

Tunabarikiwaje? Sisi tunaweza ‘kukimbilia wema wa BWANA’ huku wengi katika Jumuiya ya Wakristo wakipatwa na njaa ya kiroho.  (Yeremia 31:12) Kupitia Yesu Kristo na “mtumwa mwaminifu na mwenye busara,” Yehova ameandaa chakula kingi sana cha kiroho ambacho hutusaidia kudumu katika ‘barabara inayoongoza kuingia katika uhai.’ (Mathayo 7:13, 14; 24:45; Yohana 17:3) Tunapata baraka nyingi pia kwa kushirikiana na ndugu zetu Wakristo. Tunapata furaha nyingi kwenye mikutano na katika pindi nyinginezo tunapokuwa pamoja na ndugu zetu ambao hujitahidi sana kuvaa “utu mpya.” (Wakolosai 3:8-10; Zaburi 133:1) Hata hivyo, baraka iliyo kuu zaidi ni pendeleo lenye thamani la kuwa na uhusiano wa kibinafsi na Yehova Mungu na kufuata hatua za Mwana wake, Kristo Yesu.—Waroma 5:1, 8; Wafilipi 3:8.

Kwa kufikiria baraka hizo, sisi hutambua kwamba utumishi wetu kwa Mungu una thamani kubwa. Labda tutafikiria mfano wa Yesu wa mfanya-biashara msafiri aliyetafuta lulu nzuri. Yesu alisema hivi kuhusu mtu huyo: “Akiisha kupata lulu moja ya thamani ya juu, alienda zake na mara hiyo akauza vitu vyote alivyokuwa navyo na kuinunua.” (Mathayo 13:46) Bila shaka, sisi huhisi hivyo kuhusu uhusiano wetu na Mungu, pendeleo letu la kumtumikia, ushirika wetu wa Kikristo, tumaini letu la Kikristo, na baraka nyingine zote zinazohusiana na imani yetu. Hakuna jambo jingine lenye thamani zaidi katika maisha yetu kuliko mambo hayo.

Mrudishie Yehova

Kwa kuwa tunatambua kwamba Yehova ndiye Mpaji wa kila zawadi njema, mioyo yetu huchochewa kushukuru kwa baraka ambazo  sisi hupokea. Tunawezaje kufanya hivyo? Njia moja ni kuwasaidia wengine wafurahie baraka hizo. (Mathayo 28:19) Ili kufanya hivyo, Mashahidi wa Yehova wanawatembelea majirani wao kwa bidii katika nchi zaidi ya 230. Wafanyapo hivyo, wao hutumia rasilimali zao chache—ambazo ni wakati, nguvu, na mali—ili kuwasaidia wengine ‘waje kwenye ujuzi sahihi wa kweli.’—1 Timotheo 2:4.

Fikiria mapainia wanaoishi huko Glendale, California, Marekani. Kila Jumamosi asubuhi wao husafiri umbali wa kilometa 100 kwenda na kurudi ili kutembelea gereza fulani. Ingawa mapainia hao hutumia muda wa saa chache kila wanapotembelea wafungwa kwenye gereza hilo, wao hawavunjiki moyo. Mmoja wao anasema: “Inathawabisha sana kutumikia katika eneo hili la pekee. Tunafanya hivyo kwa furaha nyingi.Tuna watu wengi sana wenye kupendezwa hivi kwamba hatuwezi kujifunza nao wote. Sasa tunajifunza na watu watano, na wengine wanne wameomba funzo la Biblia.”

Wahudumu Wakristo wenye bidii wanafurahi kujitolea kufanya kazi hii inayookoa uhai. Wao huonyesha mtazamo wa Yesu aliyesema: “Mlipokea bure, toeni bure.” (Mathayo 10:8) Mamilioni ya watu wanashiriki utumishi huo usio na ubinafsi duniani, na kwa sababu hiyo, watu wengi wenye mioyo minyofu wanaitikia na kuwa wanafunzi. Katika miaka mitano tu iliyopita, watu wapatao milioni 1.7 wameweka maisha yao wakfu kwa Yehova. Ili kutimiza mahitaji ya watu hao wanaozidi kuongezeka, Biblia na vichapo vinavyotegemea Biblia vinahitajiwa. Majumba ya Ufalme mapya na majumba mengine ya kukutania yanahitajiwa pia. Pesa za kugharimia mahitaji hayo hutoka wapi? Zote hutokana na michango ya hiari.

Kwa sababu ya hali mbaya za kiuchumi katika sehemu fulani za ulimwengu, wengi hujitahidi sana kuandalia familia zao mahitaji muhimu tu ya maisha. Gazeti New Scientist linasema kwamba watu bilioni moja hutumia angalau asilimia 70 ya mapato yao kununua chakula. Hali ya wengi wa ndugu zetu iko hivyo. Bila msaada wa waamini wenzao, hawawezi kununua vitu kama vichapo vya Kikristo au kujenga Majumba ya Ufalme yanayofaa.

Bila shaka, hilo halimaanishi kwamba ndugu hao wangependa kuwatwika wengine mzigo wao. Lakini wanahitaji msaada. Musa alisema hivi alipowatia moyo Waisraeli watoe michango ya vitu vya kimwili ili kumshukuru Yehova kwa baraka walizopata: “Kila mtu na atoe kama awezavyo, kwa kadiri ya baraka ya BWANA, Mungu wako, alivyokupa.” (Kumbukumbu la Torati 16:17) Hivyo, Yesu alipomwona mjane mmoja akitoa “sarafu ndogo mbili za thamani ndogo sana” kwenye hekalu, alimsifu kwa wanafunzi wake. Mjane huyo alifanya alivyoweza. (Luka 21:2, 3) Vivyo hivyo, Wakristo walio maskini hufanya wanavyoweza. Na kukiwepo upungufu, michango ya Wakristo wenzao ambao si maskini sana inaweza kuusawazisha.—2 Wakorintho 8:13-15.

Tunapomrudishia Mungu katika njia hizo, ni muhimu kuwa na nia ifaayo. (2 Wakorintho 8:12) Paulo alisema: “Acheni kila mmoja afanye kama vile ameazimia moyoni mwake, si kwa kinyongo au kwa shurutisho, kwa maana Mungu hupenda mpaji mchangamfu.” (2 Wakorintho 9:7) Kwa kutoa kwa hiari kutoka moyoni, tunategemeza upanuzi wa tengenezo la Mungu unaoendelea sasa na kuzidisha furaha yetu pia.—Matendo 20:35.

Kushiriki katika kazi ya kuhubiri na kutoa michango ya hiari ni njia mbili tunazoweza kumpa Yehova ili kuonyesha shukrani kwa baraka zake. Na inatia moyo kama nini kujua kwamba Yehova anataka kuwabariki watu wengi zaidi wenye mioyo minyofu ambao sasa huenda hata hawamjui! (2 Petro 3:9) Kwa hiyo, na tuendelee kutumia rasilimali zetu katika utumishi wa Mungu ili kupata watu wenye mioyo minyofu na kuwasaidia wasitawishe sifa kama vile utii, imani, na uthamini. Kwa njia hiyo, tutafurahi kuwasaidia ‘waonje waone ya kuwa BWANA yu mwema.’—Zaburi 34:8.

[Sanduku katika ukurasa wa 28, 29]

Njia Ambazo Watu Fulani Huchagua Kutoa Michango

MICHANGO KWA AJILI YA KAZI YA ULIMWENGUNI POTE

Wengi huweka kando, au hupangia kiasi cha pesa ambazo wao hutia katika masanduku ya michango yaliyoandikwa “Michango kwa Kazi ya Ulimwenguni Pote—Mathayo 24:14.”

Kila mwezi makutaniko hupeleka kiasi hicho kwenye makao makuu ya Mashahidi wa Yehova huko Brooklyn, New York, au kwenye ofisi ya tawi ya kwao. Michango ya hiari ya pesa inaweza pia kupelekwa moja kwa moja kwa Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, au kwenye ofisi ya tawi ya nchi yako. Vito au mali nyingine zenye thamani zaweza kutolewa pia. Barua fupi inayotaarifu kwamba hiyo ni zawadi ya moja kwa moja inapasa kuambatana na michango hiyo.

MPANGO WA MICHANGO YENYE MASHARTI

Pesa zinaweza kuchangwa kukiwa na mpango maalumu kwamba, kukiwa na uhitaji wa kibinafsi, zinaweza kurudishwa kwa mtoaji. Kwa habari zaidi, tafadhali wasiliana na Treasurer’s Office kwa kutumia anwani iliyoonyeshwa hapa.

UTOAJI ULIOPANGWA

Mbali na zawadi za pesa za moja kwa moja na michango ya pesa yenye masharti, kuna njia nyinginezo za kutoa kwa ajili ya utumishi wa Ufalme wa ulimwenguni pote. Hizo zatia ndani:

Bima: Watch Tower Society yaweza kutajwa kuwa mfaidikaji wa hati ya bima ya maisha au katika mpango wa kustaafu kazi/malipo ya uzeeni.

Akiba za Benki: Akiba za benki, hati za amana, au akiba za pesa za kustaafu za mtu mmoja-mmoja zaweza kuwekwa zikiwa amana kwa ajili ya au kuweza kulipwa wakati wa kifo kwa Watch Tower Society, kulingana na matakwa ya benki za kwenu.

Hisa na Dhamana: Hisa na dhamana zinaweza kupewa Watch Tower Society zikiwa zawadi ya moja kwa moja.

Mali Ambayo Haiwezi Kuhamishwa: Mtu anaweza kuipa Watch Tower Society mali ambazo haziwezi kuhamishwa (mashamba na nyumba) zinazoweza kuuzwa au anaweza kuipa Sosaiti shamba, huku yeye mwenyewe akiendelea kuishi katika shamba hilo hadi kifo chake. Julisha ofisi ya tawi katika nchi yako kabla ya kuipa hati yoyote ya mashamba na nyumba.

Wasia na Amana: Watch Tower Society inaweza kuachiwa urithi wa mali au pesa kwa njia ya wasia wenye kutekelezwa kisheria, au Sosaiti inaweza kutajwa kuwa mfaidikaji wa mkataba wa amana. Amana inayofaidi tengenezo la kidini inaweza kuwa na faida fulani kwa habari ya ulipaji kodi.

Kama vile mtajo “utoaji uliopangwa” unavyodokeza, michango ya aina hii kwa kawaida hutaka mtoaji afanye mipango fulani. Ili kuwasaidia watu wanaotamani kusaidia kazi inayofanywa na Mashahidi wa Yehova ulimwenguni pote kupitia aina fulani ya utoaji uliopangwa, Sosaiti imetayarisha broshua ya Kiingereza na Kihispania yenye kichwa Charitable Planning to Benefit Kingdom Service Worldwide. Broshua hiyo iliandikwa kufuatia maswali mengi yaliyopokewa kuhusu zawadi, wasia, na amana. Pia ina habari za ziada zenye mafaa juu ya mipango ya mashamba na nyumba, ya kifedha, na kodi. Nayo imekusudiwa kuwasaidia watu wa Marekani, wanaopanga kutoa zawadi ya kipekee sasa au kuacha wasia wanapokufa, wateue njia zenye matokeo na zenye kufaa zaidi kwa kufikiria hali za familia na za kibinafsi. Unaweza kupata broshua hii kwa kuiomba moja kwa moja kwenye Ofisi ya Utoaji Uliopangwa.

Baada ya kusoma broshua hiyo na kushauriana na Ofisi ya Utoaji Uliopangwa, watu wengi wameweza kuwasaidia Mashahidi wa Yehova ulimwenguni pote na wakati uleule kupata faida kubwa zaidi kwa habari ya ulipaji kodi. Ofisi ya Utoaji Uliopangwa inapasa kujulishwa na kupokea hati yoyote ile inayohusiana na yoyote ya mipango hiyo. Ikiwa unapendezwa na yoyote ya mipango hiyo ya utoaji, unapaswa kuwasiliana na Ofisi ya Utoaji Uliopangwa kwa kuandika au kwa kupiga simu kwenye anwani iliyoonyeshwa hapa chini au kwenye ofisi ya tawi ya nchi yako.

Mashahidi wa Yehova

Box 47788,

00100 Nairobi GPO,

Kenya

Simu: (02)573211