Wakristo Wote wa Kweli Ni Waeneza-evanjeli
Wakristo Wote wa Kweli Ni Waeneza-evanjeli
“Mwimbieni Yehova, libarikini jina lake. Tangazeni habari njema za wokovu wake siku kwa siku.”—ZABURI 96:2, NW.
1. Ni habari gani njema ambazo watu wanahitaji kusikia, nao Mashahidi wa Yehova wameweka mfano gani mzuri wa kueneza habari hizo?
KATIKA ulimwengu ambapo misiba hutokea kila siku, inafariji sana kujua kwamba kama isemavyo Biblia, vita, uhalifu, njaa, na uonevu vitakoma hivi karibuni. (Zaburi 46:9; 72:3, 7, 8, 12, 16) Je, kwa kweli hizo si habari njema ambazo kila mtu anahitaji kusikia? Mashahidi wa Yehova wanasadiki hivyo. Wanajulikana kila mahali kuwa watu ambao huhubiri “habari njema ya mambo mema.” (Isaya 52:7) Ni kweli kwamba Mashahidi wengi wamenyanyaswa kwa sababu ya azimio lao la kuhubiri habari njema. Lakini wanajali sana masilahi ya watu. Nao Mashahidi wamejipatia sifa nzuri kama nini ya kuwa watu wenye bidii na wavumilivu!
2. Kwa nini Mashahidi wa Yehova ni wenye bidii hivyo?
2 Bidii ya Mashahidi wa Yehova leo ni sawa na ya Wakristo wa karne ya kwanza. Gazeti la Katoliki L’Osservatore Romano lilisema hivi kwa usahihi kuwahusu: “Wakristo wa karne ya kwanza, walipobatizwa tu, waliona kuwa wana wajibu wa kueneza Injili. Watumwa pia walieneza Injili.” Kwa nini Mashahidi wa Yehova ni wenye bidii kama Wakristo wa mapema? Kwanza, ni kwa sababu habari njema wanazotangaza zinatoka kwa Yehova Mungu. Ndiyo sababu wana bidii hiyo. Mahubiri yao yanapatana na maneno haya ya mtunga-zaburi: “Mwimbieni Yehova, libarikini jina lake. Tangazeni habari njema za wokovu wake siku kwa siku.”—Zaburi 96:2, NW.
3. (a) Ni sababu gani ya pili inayofanya Mashahidi wa Yehova wawe wenye bidii? (b) “Wokovu wa [Mungu]” unahusisha nini?
3 Maneno ya mtunga-zaburi yatukumbusha sababu ya pili inayofanya Mashahidi wa Yehova wawe wenye bidii. Ujumbe wao ni ujumbe wa wokovu. Watu fulani hufanya kazi zinazohusiana na mambo ya kitiba, kijamii, kiuchumi, au nyanja nyinginezo ili kuboresha maisha ya wanadamu wenzao, na wanahitaji kupongezwa kwa jitihada hizo. Lakini jambo lolote ambalo mwanadamu anaweza kumfanyia mwenzake haliwezi kuwa na manufaa sana linapolinganishwa na “wokovu wa [Mungu].” Kupitia Yesu Kristo, Yehova atawaokoa wanyenyekevu kutokana na dhambi, magonjwa, na kifo. Wale watakaonufaika wataishi milele! (Yohana 3:16, 36; Ufunuo 21:3, 4) Leo, wokovu u miongoni mwa “kazi za ajabu” ambazo Wakristo hutangaza wanapoitikia maneno haya: “Wahubirini mataifa habari za utukufu [wa Mungu] na watu wote habari za maajabu yake [“kazi zake za ajabu,” NW]. Kwa kuwa BWANA ni mkuu mwenye kusifiwa sana. Na wa kuhofiwa kuliko miungu yote.”—Zaburi 96:3, 4.
Kielelezo cha Bwana-Mkubwa
4-6. (a) Ni sababu gani ya tatu inayowafanya Mashahidi wa Yehova wawe wenye bidii? (b) Yesu alionyeshaje bidii katika kazi ya kuhubiri habari njema?
4 Mashahidi wa Yehova ni wenye bidii kwa sababu hii ya tatu. Wanafuata kielelezo cha Yesu Kristo. (1 Petro 2:21) Mwanadamu huyo mkamilifu alikubali kwa moyo wote mgawo wa ‘kuhubiri wanyenyekevu habari njema.’ (Isaya 61:1; Luka 4:17-21) Hivyo, akawa mweneza-evanjeli, mtangazaji wa habari njema. Alisafiri Galilaya na Yudea kote, ‘akihubiri habari njema ya ufalme.’ (Mathayo 4:23) Na kwa sababu alijua kwamba wengi wangekubali habari njema, aliwaambia wanafunzi wake hivi: “Mavuno ni mengi, lakini wafanyakazi ni wachache. Kwa hiyo, ombeni Bwana-mkubwa wa mavuno atume wafanyakazi katika mavuno yake.”—Mathayo 9:37, 38.
5 Kupatana na sala yake, Yesu aliwazoeza wengine kuwa waeneza-evanjeli. Baada ya hapo, alituma mitume wake na kuwaambia: “Mwendapo, hubirini, mkisema, ‘Ufalme wa mbingu umekaribia.’” Je, haingefaa zaidi kama wangeanzisha miradi ambayo ingepunguza matatizo ya kijamii yaliyokuweko wakati huo? Au je, haingefaa kama wangejihusisha na siasa ili kuzuia ufisadi uliokuwa umeenea sana wakati huo? La. Badala yake, Yesu aliweka kiwango ambacho Wakristo wote walio waeneza-evanjeli wangefuata alipowaambia wafuasi wake hivi: “Mwendapo, hubirini.”—Mathayo 10:5-7.
6 Baadaye, Yesu alituma kikundi kingine cha wanafunzi wakatangaze: “Ufalme wa Mungu umekuja karibu.” Waliporudi ili kueleza mafanikio waliyopata katika kueneza evanjeli, Yesu alifurahi sana. Alisali hivi: “Nakusifu hadharani wewe, Baba, Bwana wa mbingu na dunia, kwa sababu umeficha mambo hayo kwa uangalifu kutoka kwa wenye hekima na walio na akili, nawe umeyafunua kwa vitoto.” (Luka 10:1, 8, 9, 21) Wanafunzi wa Yesu ambao hapo awali walikuwa wavuvi wenye bidii, wakulima, na kadhalika, walikuwa kama watoto wakilinganishwa na viongozi wa kidini walioelimika sana wa taifa hilo. Lakini wanafunzi walizoezwa kutangaza habari njema zilizo bora kabisa.
7. Baada ya Yesu kupaa mbinguni, wafuasi wake waliwahubiria nani kwanza habari njema?
7 Baada ya Yesu kupaa mbinguni, wafuasi wake waliendelea kutangaza habari njema za wokovu. (Matendo 2:21, 38-40) Waliwahubiria nani kwanza? Je, walienda kwa mataifa ambao hawakumjua Mungu? La, waliwahubiria kwanza Waisraeli, watu ambao walimjua Yehova kwa miaka zaidi ya 1,500. Je, walikuwa na haki ya kuhubiri katika nchi ambayo Yehova alikuwa tayari akiabudiwa? Ndiyo. Yesu aliwaambia: “Mtakuwa mashahidi wangu katika Yerusalemu na pia katika Yudea yote na Samaria na hadi sehemu ya mbali zaidi sana ya dunia.” (Matendo 1:8) Waisraeli walihitaji kusikia habari njema kama tu taifa lingine lolote.
8. Mashahidi wa Yehova leo huwaigaje wafuasi wa Yesu wa karne ya kwanza?
8 Vivyo hivyo, Mashahidi wa Yehova leo huhubiri duniani pote. Wanashirikiana na malaika aliyeonwa na Yohana ambaye “alikuwa na habari njema idumuyo milele ili aitangaze kuwa taarifa za mteremo kwa wale wakaao juu ya dunia, na kwa kila taifa na kabila na lugha na watu.” (Ufunuo 14:6) Katika mwaka wa 2001, walihubiri katika nchi na maeneo 235, kutia ndani maeneo yanayojulikana kuwa ya Kikristo. Je, Mashahidi wa Yehova wanakosea kwa kuhubiri katika maeneo ambako tayari kuna makanisa ya Jumuiya ya Wakristo? Wengine wanasema ni kosa na hata huenda wakaona uenezaji-evanjeli huo kuwa “kuiba washiriki wao.” Hata hivyo, Mashahidi wa Yehova hukumbuka jinsi Yesu alivyohisi kuhusu Wayahudi wa kawaida walioishi wakati wake. Ingawa tayari walikuwa na ukuhani, Yesu hakusita kuwatangazia habari njema. ‘Alihisi sikitiko kwa ajili yao, kwa sababu walikuwa wamechunwa ngozi na kutupwa huku na huku kama kondoo wasio na mchungaji.’ (Mathayo 9:36) Mashahidi wa Yehova wanapopata watu wa kawaida ambao hawamjui Yehova na Ufalme wake, je, wasite kuwahubiria habari njema kwa sababu dini fulani inadai kuwa hao ni wafuasi wake? Kwa kufuata kielelezo cha mitume wa Yesu, twajibu la. Lazima habari njema zihubiriwe “katika mataifa yote,” bila kubagua.—Marko 13:10.
Wakristo Wote wa Mapema Walikuwa Waeneza-Evanjeli
9. Katika karne ya kwanza, ni nani katika kutaniko la Kikristo walioshiriki kuhubiri?
9 Ni nani walioshiriki kuhubiri katika karne ya kwanza? Kuna mambo yanayothibitisha kwamba Wakristo wote walikuwa waeneza-evanjeli. Mwandishi W. S. Williams asema: ‘Kuna ushuhuda unaoonyesha kwamba Wakristo wote katika Kanisa la mapema walihubiri injili.’ Biblia husema hivi kuhusu mambo yaliyotukia siku ya Pentekoste 33 W.K.: “Nao wote [wanaume na wanawake] wakawa wenye kujazwa roho takatifu wakaanza kusema katika lugha tofauti, kama vile roho ilivyokuwa ikiwaruhusu kufanya tamko.” Waeneza-evanjeli walitia ndani wanaume na wanawake, wachanga kwa wakubwa, watumwa na watu huru. (Matendo 1:14; 2:1, 4, 17, 18; Yoeli 2:28, 29; Wagalatia 3:28) Wakristo wengi walipolazimika kukimbia Yerusalemu kwa sababu ya mnyanyaso, “wale waliokuwa wametawanywa walipita katika nchi wakitangaza habari njema ya lile neno.” (Matendo 8:4) Evanjeli ilienezwa na watu wote “waliokuwa wametawanywa,” wala si na watu wachache tu waliokuwa wamewekwa rasmi.
10. Ni utume gani wenye sehemu mbili uliotimizwa kabla ya uharibifu wa mfumo wa Kiyahudi?
10 Waliendelea kufanya hivyo katika miaka ya mapema. Yesu alitabiri hivi: “Habari njema hii ya ufalme itahubiriwa katika dunia yote inayokaliwa kwa ajili ya kuwa ushahidi kwa mataifa yote; na ndipo mwisho utakapokuja.” (Mathayo 24:14) Maneno hayo yalipotimizwa katika karne ya kwanza, habari njema zilihubiriwa kotekote kabla majeshi ya Roma hayajaharibu mfumo wa kidini na wa kisiasa wa Wayahudi. (Wakolosai 1:23) Isitoshe, wafuasi wote wa Yesu walitii amri yake: “Kwa hiyo nendeni mkafanye wanafunzi kutoka kwa watu wa mataifa yote, kuwabatiza katika jina la Baba na la Mwana na la roho takatifu, kuwafundisha kushika mambo yote ambayo mimi nimewaamuru nyinyi.” (Mathayo 28:19, 20) Wakristo wa mapema hawakuwashauri wanyenyekevu wamwamini Yesu na kuwaacha tu wamtumikie Mungu bila mwongozo wowote, kama wafanyavyo wahubiri wengine wa siku hizi. Badala yake, waliwafundisha wawe wanafunzi wa Yesu, wakawapanga kuwa makutaniko, na kuwazoeza ili wao pia wahubiri habari njema na kufanya wanafunzi. (Matendo 14:21-23) Mashahidi wa Yehova leo hufuata kielelezo hicho.
11. Ni nani leo wanaoshiriki kuwatangazia wanadamu habari njema zilizo bora kabisa?
11 Kwa kufuata kielelezo kilichowekwa katika karne ya kwanza na Paulo, Barnaba, na wengineo, Mashahidi wengi wa Yehova wamejitoa kutumikia wakiwa mishonari katika nchi za kigeni. Kazi yao imekuwa yenye kunufaisha kwelikweli, kwa kuwa hawajihusishi na siasa au kukwepa kwa vyovyote utume wa kuhubiri habari njema. Wametii amri ya Yesu: “Mwendapo, hubirini.” Hata hivyo, wengi wa Mashahidi wa Yehova si mishonari wanaotumikia katika nchi za kigeni. Wengi wao hujipatia riziki kwa kufanya kazi ya kimwili, na wengine bado wako shuleni. Wengine wanalea watoto. Lakini Mashahidi wote huwahubiria wengine habari njema ambazo wamejifunza. Wachanga kwa wazee, wanaume kwa wanawake, hukubali kwa furaha himizo hili la Biblia: “Lihubiri neno, lifanye kwa hima katika majira yenye kufaa, katika majira yenye taabu.” (2 Timotheo 4:2) Kama watangulizi wao wa karne ya kwanza, wanaendelea “bila kuacha kufundisha na kutangaza habari njema juu ya Kristo, Yesu.” (Matendo 5:42) Wanawatangazia wanadamu habari njema zilizo bora kabisa.
Kugeuza Watu Imani au Kueneza Evanjeli?
12. Kugeuza watu imani kunaonwaje?
12 Siku hizi, watu fulani husema kwamba ni hatari kugeuza watu imani. Hati moja iliyochapishwa na Baraza la Makanisa Ulimwenguni inazungumza juu ya “dhambi ya kugeuza watu imani.” Kwa nini? Kichapo Catholic World Report chasema: ‘Kwa sababu ya malalamiko mengi ya Kanisa la Othodoksi, kugeuza watu imani kumeanza kuonwa kama jambo linalofanywa kwa nguvu.’
13. Ni mifano gani inayoonyesha kugeuza watu imani ambako ni hatari?
13 Je, ni hatari kugeuza watu imani? Ndiyo. Yesu alisema kwamba kugeuza watu imani kulikofanywa na waandishi na Mafarisayo kulikuwa hatari kwa wageuzwa-imani. (Mathayo 23:15) Bila shaka ni kosa ‘kugeuza watu imani kwa nguvu.’ Kwa mfano, kulingana na mwanahistoria Yosefu, wakati Mmakabayo John Hyrcanus alipowatiisha Waidumea, “aliwaruhusu wabaki katika nchi yao maadamu wangetahiriwa na wangekuwa tayari kutii sheria za Wayahudi.” Ikiwa Waidumea wangeishi chini ya utawala wa Wayahudi, wangelazimika kufuata dini ya Wayahudi. Wanahistoria wanatuambia kwamba katika karne ya nane W.K., Charlemagne aliwashinda wapagani wa Saxon wa kaskazini mwa Ulaya na kuwalazimisha kikatili wageuze imani yao. * Hata hivyo, je, kweli Waidumea au watu wa Saxon walikuwa wamegeuza imani yao kwa unyofu? Kwa mfano, je, Mfalme Herode wa Idumea alikuwa mwaminifu kwa Sheria ya Musa iliyopuliziwa wakati alipojaribu kuua kitoto Yesu?—Mathayo 2:1-18.
14. Baadhi ya mishonari wa Jumuiya ya Wakristo hulazimishaje watu wageuze imani yao?
14 Je, watu hulazimishwa kugeuza imani leo? Wengine hulazimishwa kufanya hivyo. Imeripotiwa kwamba mishonari fulani wa Jumuiya ya Wakristo hutoa msaada wa masomo kwa wageuzwa-imani wakasomee ng’ambo. Au huenda wakamlazimisha mkimbizi mwenye njaa asikilize mahubiri yao ndiposa wampe chakula. Kulingana na taarifa iliyotolewa katika mwaka wa 1992 kwenye kusanyiko la makasisi wa Kanisa la Othodoksi, “mara nyingine watu hugeuzwa imani kwa kushawishiwa kwamba watapewa vitu vya kimwili na nyakati nyingine kwa kutumia nguvu.”
15. Je, Mashahidi wa Yehova hugeuza watu imani kama wengine wafanyavyo siku hizi? Eleza.
15 Ni kosa kulazimisha watu wabadili dini. Bila shaka, Mashahidi wa Yehova hawafanyi hivyo. * Kwa hiyo, hawageuzi watu imani kama wengine wafanyavyo siku hizi. Badala yake, kama Wakristo wa karne ya kwanza, wao huhubiria kila mtu habari njema. Mtu yeyote anayekubali habari njema kwa kupenda, hutiwa moyo atwae ujuzi zaidi kwa kujifunza Biblia. Watu hao wenye kupendezwa hujifunza kuwa na imani inayotegemea kabisa ujuzi sahihi wa Biblia kuhusu Mungu na makusudi yake. Hivyo, wanaliitia jina la Mungu, Yehova, ili kupata wokovu. (Waroma 10:13, 14, 17) Ni juu yao kuamua kama watakubali au watakataa habari njema. Hawalazimishwi. Kama watu wangelazimishwa, kugeuza watu imani hakungekuwa na maana yoyote. Ili mtu akubaliwe na Mungu, lazima ibada yake itoke moyoni.—Kumbukumbu la Torati 6:4, 5; 10:12.
Kueneza Evanjeli Katika Nyakati za Kisasa
16. Kazi ya kueneza evanjeli ya Mashahidi wa Yehova imekuaje katika nyakati za kisasa?
16 Katika nyakati za kisasa, Mashahidi wa Yehova wamehubiri habari njema za Ufalme ili kutimiza kikamili andiko la Mathayo 24:14. Wametumia hasa gazeti Mnara wa Mlinzi kueneza evanjeli. * Katika mwaka wa 1879, matoleo ya kwanza ya Mnara wa Mlinzi yalipochapishwa, kulikuwa na jumla ya nakala zipatazo 6,000 katika lugha moja. Katika mwaka wa 2001, miaka zaidi ya 122 baadaye, jumla ya nakala 23,042,000 zilizochapishwa katika lugha 141. Ongezeko hilo linaenda sambamba na ukuzi katika kazi ya kueneza evanjeli inayofanywa na Mashahidi wa Yehova. Linganisha saa elfu chache zilizotumiwa katika kazi ya kueneza evanjeli katika karne ya 19 na saa 1,169,082,225 zilizotumiwa katika kazi ya kuhubiri mnamo mwaka wa 2001. Fikiria wastani wa mafunzo ya Biblia 4,921,702 yaliyoongozwa kila mwezi bila malipo. Walitimiza kazi nyingi tena bora kama nini! Nayo ilifanywa na wahubiri wa Ufalme wapatao 6,117,666.
17. (a) Ni miungu gani isiyo ya kweli inayoabudiwa leo? (b) Kila mtu anahitaji kujua nini bila kujali lugha yake, taifa, au cheo chake katika jamii?
17 Mtunga-zaburi asema hivi: “Miungu yote ya watu si kitu, lakini BWANA ndiye aliyezifanya mbingu.” (Zaburi 96:5) Katika ulimwengu wa sasa, utukuzo wa taifa, ishara za kitaifa, watu mashuhuri, vitu vya kimwili, na hata mali zimeabudiwa. (Mathayo 6:24; Waefeso 5:5; Wakolosai 3:5) Mohandas K. Gandhi alisema hivi wakati mmoja: “Mimi ninaamini kabisa kwamba . . . leo bara Ulaya lina Wakristo wa jina tu. Kwa kweli bara hilo linaabudu mali.” Ukweli ni kwamba lazima habari njema zihubiriwe kila mahali. Kila mtu pasipo kujali lugha yake, taifa, au cheo chake katika jamii, anahitaji kumjua Yehova na makusudi yake. Laiti wote wangekubali maneno haya ya mtunga-zaburi: “Mpeni BWANA utukufu na nguvu. Mpeni BWANA utukufu wa jina lake”! (Zaburi 96:7, 8) Mashahidi wa Yehova husaidia wengine wajifunze kuhusu Yehova ili wampe utukufu kwa njia inayofaa. Na wale wanaosikiliza wananufaika sana. Wanapata manufaa gani? Habari hiyo itazungumziwa katika makala inayofuata.
[Maelezo ya Chini]
^ fu. 13 Kulingana na The Catholic Encyclopedia, wakati wa Marekebisho Makuu ya Kidini, kulazimisha watu wakubali dini fulani kulionyeshwa na wito huu wa Kilatini: Cuius regio, illius et religio (Kwa msingi, wito huo wamaanisha: “Yeyote yule anayetawala nchi ndiye anayeamua dini itakayofuatwa.”)
^ fu. 15 Kwenye mkutano wa Tume ya Kimataifa ya Uhuru wa Kidini uliofanywa Marekani Novemba 16, 2000, mshiriki mmoja alitaja tofauti iliyopo kati ya watu wanaojaribu kulazimisha wengine wabadili imani yao na kazi inayofanywa na Mashahidi wa Yehova. Ilisemekana kwamba Mashahidi wa Yehova wanapowahubiria watu, wanafanya hivyo kwa njia ambayo mtu anaweza kusema “Mimi sipendezwi” na afunge mlango.
^ fu. 16 Jina kamili la gazeti hili ni Mnara wa Mlinzi Unaotangaza Ufalme wa Yehova.
Je, Unaweza Kueleza?
• Kwa nini Mashahidi wa Yehova ni waeneza-evanjeli wenye bidii?
• Kwa nini Mashahidi wa Yehova huhubiri hata katika maeneo ambako kuna makanisa ya Jumuiya ya Wakristo?
• Kwa nini Mashahidi wa Yehova hawageuzi watu imani kama wafanyavyo watu fulani siku hizi?
• Kazi ya kueneza evanjeli ya Mashahidi wa Yehova imekuaje katika nyakati za kisasa?
[Maswali ya Funzo]
[Maelezo ya Picha katika ukurasa wa 9]
Yesu alikuwa mweneza-evanjeli mwenye bidii naye aliwazoeza wengine kufanya kazi hiyo
[Maelezo ya Picha katika ukurasa wa 10]
Washiriki wote katika kutaniko la karne ya kwanza walieneza evanjeli
[Maelezo ya Picha katika ukurasa wa 11]
Ni kosa kulazimisha watu wabadili dini yao