Walimu wa Neno la Mungu Wahimizwa Watimize Kazi Yao

KATIKA miezi ya hivi majuzi, mamia ya maelfu ya walimu walikusanyika ili kufundishwa. Kuanzia Mei mwaka jana, walikusanyika kwenye mamia ya Mikusanyiko ya Wilaya ya “Walimu wa Neno la Mungu” ya Mashahidi wa Yehova ulimwenguni pote. Wajumbe hao walihimizwa wajifundishe, ili wawe na sifa zaidi za ustahili, na watimize kazi yao wakiwa walimu.

Je, ulihudhuria mojawapo ya mikusanyiko hiyo? Ikiwa ulihudhuria, bila shaka unashukuru kwa chakula kizuri cha kiroho kilichotolewa kwenye mikusanyiko hiyo ya kumwabudu Mungu wa kweli, Yehova. Na tupitie pamoja programu yenye kufundisha ya mkusanyiko huo.

Siku ya Kwanza—Maandiko Yaliyopuliziwa Ni Yenye Manufaa kwa Kufundisha

Mwenyekiti wa mkusanyiko aliwakaribisha wajumbe kwa uchangamfu kwa hotuba “Fundishweni, Enyi Walimu wa Neno la Mungu.” Yesu Kristo alikuwa Mwalimu Mkuu baada ya kujifunza kutoka kwa Yehova, “Mfunzi Mtukufu.” (Isaya 30:20, NW; Mathayo 19:16) Ili tufanye maendeleo tukiwa walimu wa Neno la Mungu, lazima pia tufundishwe na Yehova.

Kisha hotuba iliyofuata ilikuwa na kichwa “Ufundishaji wa Ufalme Hutokeza Matunda Mema.” Furaha na thawabu za kufanya wanafunzi zilikaziwa wakati walimu wa Neno la Mungu wenye uzoefu walipohojiwa.

 Baadaye, ilifuata hotuba yenye kuchochea yenye kichwa “Tunachochewa na ‘Mambo Yenye Fahari ya Mungu.’” Katika karne ya kwanza, “mambo yenye fahari” yaliyohusu Ufalme wa Mungu yalichochea watu watende. (Matendo 2:11) Sisi pia twaweza kuchochea watu watende kwa kutangaza “mambo yenye fahari” kama vile mafundisho ya Biblia kuhusu fidia, ufufuo, na agano jipya.

Hotuba iliyofuata yenye kichwa “Pendezwa na Uadilifu wa Yehova” iliwatia moyo wote wapendezwe na uadilifu wa Yehova. (Zaburi 35:27) Tunasaidiwa kufuatia uadilifu kwa kujifunza kupenda mambo ya uadilifu na kuchukia maovu, kwa kujifunza Biblia, kwa kukinza kabisa mambo yenye kudhuru kiroho, na kwa kusitawisha unyenyekevu. Kuchukua hatua hizo kutatulinda na mashirika yasiyofaa, kufuatia vitu vya kimwili vinavyoonwa kuwa vyenye thamani na ulimwengu, na vitumbuizo visivyo vya adili na vyenye jeuri.

Hotuba ya msingi yenye kichwa, “Tumeandaliwa Kikamili Kuwa Walimu wa Neno la Mungu,” ilitukumbusha kwamba Yehova hutustahilisha kuwa wahudumu kupitia Neno lake, roho yake takatifu, na tengenezo lake la kidunia. Kuhusu kutumia Neno la Mungu, msemaji alituhimiza: “Lengo letu lapasa kuwa kutumia ujumbe wa Biblia kufikia mioyo ya wasikilizaji wetu.”

Mfululizo wa kwanza wa mkusanyiko ulikuwa na kichwa “Tujifunze Tunapowafundisha Wengine.” Hotuba ya kwanza katika mfululizo huo ilikazia kwamba tunapaswa kuishi kupatana na viwango vya juu vya maadili ya Kikristo ambavyo tunawafundisha wengine. Hotuba iliyofuata ilituhimiza ‘tulitumie sawasawa neno la ile kweli.’ (2 Timotheo 2:15) Ili kujifundisha, ni muhimu kuwa na funzo la Biblia la kibinafsi linalofanywa kwa ukawaida na kwa bidii, hata tuwe tumemtumikia Mungu muda mrefu kadiri gani. Hotuba ya mwisho katika mfululizo huo ilionyesha kwamba Ibilisi anatuchunguza ili aone ikiwa tuna mitazamo kama vile kiburi, roho ya kujitegemea, kujiona kuwa bora, wivu, husuda, uchungu, kinyongo, na kutafuta-tafuta makosa. Hata hivyo, tukimkinza Ibilisi kwa bidii, atatukimbia.  Ili kumpinga, tunahitaji kumkaribia Mungu.—Yakobo 4:7, 8.

Hotuba iliyotolewa kwa wakati ufaao yenye kichwa “Chukia Kabisa Ponografia ya Ulimwengu Yenye Kudhuru” ilituonyesha jinsi tunavyoweza kukabiliana na hatari hiyo inayoweza kupotosha hali yetu ya kiroho. Nabii Habakuki alisema hivi kuhusu Yehova: “Wewe uliye na macho safi hata usiweze kuangalia uovu.” (Habakuki 1:13) Tunapaswa “kukirihi lililo ovu.” (Waroma 12:9) Wazazi walihimizwa wachunguze ni nini watoto wao hutazama katika Internet na televisheni. Msemaji alisema kwamba wale wanaovutiwa na ponografia, wanahitaji kutafuta msaada kutoka kwa rafiki aliyekomaa kiroho. Pia itafaa kutafakari na kukariri maandiko kama vile Zaburi 97:10; Mathayo 5:28; 1 Wakorintho 9:27; Waefeso 5:3, 12; Wakolosai 3:5; na 1 Wathesalonike 4:4, 5.

Hotuba iliyofuata yenye kichwa, “Na Amani ya Mungu Ikulinde,” ilitufariji na kutuhakikishia kwamba tunapolemewa na mahangaiko, tunaweza kumtupia Yehova mzigo wetu. (Zaburi 55:22) Tukimwambia Yehova mambo waziwazi kupitia sala, yeye atatupatia “amani ya Mungu,” ule utulivu wa moyoni unaotokana na kuwa na uhusiano wenye thamani pamoja naye.—Wafilipi 4:6, 7.

Siku ya kwanza ilifikia tamati kwa hotuba yenye kufurahisha yenye kichwa “Yehova Arembesha Watu Wake kwa Kuwapa Nuru.” Hotuba hiyo ilifafanua utimizo wa Isaya sura ya 60. Licha ya giza lililo katika ulimwengu wa sasa, “wageni”—mkutano mkubwa wa kondoo wengine—unafurahia nuru ya Yehova pamoja na Wakristo watiwa-mafuta. Akirejezea mstari wa 19 na wa 20, msemaji alieleza: “Yehova ‘hatashuka’ kama jua wala ‘kujitenga’ kama mwezi. Ataendelea kuwarembesha watu wake kwa kuwaangazia nuru. Huo ni uhakikisho mzuri kama nini kwetu wakati huu tunapoendelea kuishi katika siku za mwisho za ulimwengu huu uliotiwa giza!” Alipomalizia hotuba hiyo, msemaji alitangaza kutolewa kwa kitabu Unabii wa Isaya—Nuru kwa Wanadamu Wote, Buku la Pili. Je, umemaliza kusoma kitabu hiki kipya?

Siku ya Pili—Wenye Sifa za Ustahili wa Kutosha Kufundisha Wengine

Baada ya kuzungumzia andiko la siku katika siku ya pili, tulisikiliza kwa makini mfululizo wa pili wa mkusanyiko, “Wahudumu Ambao Kupitia Kwao Wengine Hupata Kuwa Waamini.” Wasemaji wa mfululizo huo uliokuwa na hotuba tatu walikazia kila moja ya zile hatua tatu zinazohusika katika kusaidia watu wawe waamini—kueneza ujumbe wa Ufalme, kusitawisha upendezi ulioonyeshwa, na kufundisha wenye kupendezwa washike amri za Kristo. Kupitia mahojiano na kuigiza mambo halisi yaliyoonwa, tuliweza kuona hasa jinsi tunavyoweza kufundisha wengine wawe wanafunzi.

Hotuba iliyofuata ilikuwa na kichwa “Ongezeni Kwenye Uvumilivu Wenu Ujitoaji-Kimungu.” Msemaji alionyesha kwamba jambo lililo mu himu ni ‘kuvumilia hadi mwisho.’ (Mathayo 24:13) Twapaswa kutumia maandalizi yote ya Mungu—sala, funzo la kibinafsi, mikutano, na huduma—ili kusitawisha ujitoaji-kimungu. Tunahitaji kuzuia tamaa na tabia za ulimwengu zisiathiri au zisiharibu sifa yetu ya ujitoaji-kimungu.

Watu wanaomenyeka na kulemezwa mizigo wanaweza kupataje pumziko leo? Swali hilo lilijibiwa katika hotuba yenye kichwa “Kupata Pumziko Chini ya Nira ya Kristo.” Yesu aliwaalika kwa fadhili wafuasi wake wachukue nira yake na kujifunza kutoka kwake. (Mathayo 11:28-30) Tunaweza kuchukua ya nira ya Yesu kwa kufuata kwa ukaribu kielelezo chake cha kuishi maisha sahili, na yenye usawaziko. Mambo makuu ya hotuba hiyo yalikaziwa wakati wale ambao wamefanya maisha yao yawe sahili walipohojiwa.

Kati ya mambo makuu ya mikusanyiko mikubwa ya Mashahidi wa Yehova ni ubatizo wa watumishi wapya wa Mungu waliojiweka wakfu. Ndugu aliyetoa hotuba yenye kichwa “Ubatizo Hutokeza Mapendeleo Mengi ya Kufundisha” aliwakaribisha kwa uchangamfu waliotaka kubatizwa na kuwaalika washiriki mapendeleo makubwa ya utumishi. Walimu wapya wa Neno la Mungu waliobatizwa na ambao wanatimiza matakwa ya Kimaandiko wanaweza kujitahidi kufikia majukumu mbalimbali kutanikoni.

Hotuba ya kwanza alasiri hiyo ilikuwa na kichwa “Igeni Mwalimu Mkuu.” Kwa muda usiojulikana ambao aliishi mbinguni, Yesu alimchunguza Babake kwa makini na kumwiga, hivyo akawa Mwalimu Mkuu. Alipokuwa duniani, alitumia njia za kufundisha zenye matokeo, kama vile maswali yenye kuamsha fikira na mifano sahili na iliyo wazi. Mafundisho ya Yesu yalitegemea Neno la Mungu, naye alizungumza kwa shauku, uchangamfu, na mamlaka. Je, hatukuchochewa kumwiga Mwalimu Mkuu?

Hotuba nyingine yenye kuchochea iliyokuwa na kichwa, “Je, Uko Tayari Kuwatumikia Wengine?,” ilitutia moyo tuige mfano wa Yesu wa kutumikia wengine. (Yohana 13:12-15) Msemaji aliwahimiza moja kwa moja wanaume wanaostahili wawe kama Timotheo katika kutumia kila fursa kusaidia wengine. (Wafilipi 2:20, 21) Wazazi walitiwa moyo wamwige Elkana na Hana katika kusaidia watoto wao wafuatie huduma ya wakati wote. Nao wachanga walihimizwa waige kielelezo cha Yesu Kristo na kijana Timotheo kwa kujitoa kwa hiari. (1 Petro 2:21) Pia tulichochewa na maneno ya wale ambao wametumia fursa za kutumikia wengine.

Mfululizo wa tatu ulikuwa na kichwa “Faidika Zaidi na Elimu ya Kitheokrasi.” Msemaji wa kwanza alikazia umuhimu wa kuzidisha muda wetu wa kukaza fikira. Ili kutimiza lengo hilo, tunaweza kuanza kujifunza kibinafsi kwa muda mfupi kisha tujitahidi kurefusha muda huo. Pia aliwatia moyo wasikilizaji wafungue maandiko na kuandika mambo makuu mikutano inapoendelea. Msemaji wa pili alikazia uhitaji wa kushikamana na “kiolezo cha maneno yenye afya.” (2 Timotheo 1:13, 14) Ili kujilinda na habari zisizo za adili zinazotangazwa na vyombo vya habari, falsafa za wanadamu, uchambuzi, na mafundisho ya waasi-imani, ni lazima tununue wakati wa kujifunza kibinafsi na kuhudhuria mikutano. (Waefeso 5:15, 16) Msemaji wa mwisho katika mfululizo huo alikazia uhitaji wa kufuata mambo tunayojifunza ili tunufaike kikamili na elimu ya kitheokrasi.—Wafilipi 4:9.

Tulifurahi kama nini kusikia hotuba yenye kichwa “Maandalizi Mapya ya Kutusaidia Kufanya Maendeleo ya Kiroho”! Tulifurahi kusikia kwamba kitabu kipya chenye kichwa Faidika na Elimu ya Shule ya Huduma ya Kitheokrasi kitachapishwa hivi karibuni. Tulitarajia kwa hamu kupata kitabu hicho msemaji alipokuwa  akielezea yaliyomo. Kuhusu sehemu ya kitabu hicho yenye mashauri kadhaa ya usemi, alisema: “Kitabu hicho kipya hakikuandikwa kama vitabu vya kilimwengu. Kinategemea kanuni za Maandiko kinapozungumzia yale mashauri 53 ya usomaji mzuri, usemaji mzuri, na ufundishaji mzuri.” Kitabu hiki kitaonyesha jinsi manabii, Yesu, na wanafunzi wake walivyodhihirisha ustadi wa kufundisha vizuri. Naam, kwa kweli kitabu hiki na pia mambo mapya katika Shule ya Huduma ya Kitheokrasi yatatusaidia kuwa walimu bora wa Neno la Mungu.

Siku ya Tatu—Iweni Walimu kwa Kufikiria Wakati

Baada ya kuzungumzia andiko la siku katika siku ya mwisho, wote walisikiliza kwa makini mfululizo wa mwisho kwenye mkusanyiko huo, “Unabii wa Malaki Hututayarisha kwa Ajili ya Siku ya Yehova.” Malaki alitabiri karibu miaka mia moja baada ya Wayahudi kurudi kutoka Babiloni. Walikuwa wamegeukia tena uasi-imani na uovu, huku wakilidharau jina la Yehova kwa kupuuza sheria zake za uadilifu na kwa kutoa dhabihu za wanyama walio vipofu, vilema, na wagonjwa. Isitoshe, walikuwa wakiwataliki wake wa ujana wao, labda ili waoe wanawake wageni.

Unabii wa Malaki sura ya kwanza unatuhakikishia kwamba Yehova anawapenda watu wake. Unabii huo unakazia umuhimu wa kusitawisha hofu yenye staha kwa Mungu na vilevile kustahi na kushukuru kwa ajili ya mambo matakatifu. Yehova anatarajia tumtolee yaliyo mema kabisa na kumwabudu kwa upendo usio na choyo. Utumishi wetu mtakatifu haupaswi kuwa desturi tu, na lazima tuwajibike kwa Mungu.

Akionyesha jinsi sura ya pili ya Malaki inavyohusu siku zetu, msemaji wa pili katika mfululizo huo, aliuliza swali hili: “Je, tuko macho kabisa kwamba ‘udhalimu usionekane midomoni mwetu’?” (Malaki 2:6) Wale wanaoongoza katika kufundisha wanapaswa kuhakikisha kwamba mambo wanayosema yanategemea kabisa Neno la Mungu. Twapaswa kuchukia uhaini kama vile kutafuta talaka kwa sababu zisizo na msingi.—Malaki 2:14-16.

Akitoa hotuba yenye kichwa “Ni Nani Atakayeokoka Siku ya Yehova?” msemaji wa mwisho wa mfululizo huo alitusaidia kujitayarisha kwa ajili ya siku ya Yehova. “Inafariji watumishi wa Yehova kama nini kujua kwamba unabii wa Malaki sura ya 3, mstari wa 17, unatimizwa kwao kwa kiwango kikubwa!” akasema msemaji. “Unabii huo wasema hivi: ‘“Nao wataku wa wangu,” asema BWANA wa majeshi, “katika siku ile niifanyayo; naam, watakuwa hazina yangu hasa; nami nitawaachilia, kama vile mtu amwachiliavyo mwanawe mwenyewe amtumikiaye.”’”

Jambo jingine kuu la mkusanyiko lilikuwa drama iliyoigizwa na watu waliovalia mavazi maalum “Heshimu Mamlaka ya Yehova,” iliyoonyesha wana wa Kora. Licha ya baba yao kumwasi Musa na Aroni, wao walidumisha uaminifu kwa Yehova na wawakilishi wake. Ingawa Kora na wafuasi wake waliangamia, wana wake waliokoka. Hotuba iliyofuata “Nyenyekea kwa Uaminifu Mamlaka ya Kimungu,” ilionyesha jinsi kila mmoja wetu anavyoweza kutumia habari zilizokuwa katika drama. Msemaji alitoa onyo kuhusu sehemu sita ambazo Kora na wafuasi wake walipungukiwa: hawakuunga mkono kwa uaminifu mamlaka ya Yehova; waliruhusu kiburi, kujitakia makuu, na wivu uwashinde; walikazia fikira hali za kutokamilika za wale walioteuliwa na Yehova; walisitawisha mtazamo wa kulalamika; hawakutosheka na mapendeleo yao ya utumishi; na wakaruhusu urafiki au uhusiano wa familia utangulie uaminifu kwa Yehova.

Hotuba ya watu wote ilikuwa na kichwa “Ni Nani Wanaofundisha Mataifa Yote Ile Kweli?” Kweli iliyozungumziwa haikuwa kweli ya ujumla tu, bali ni kweli kuhusu makusudi ya Yehova ambayo ilishuhudiwa na Yesu Kristo. Msemaji alizungumzia kweli inayohusu imani, kweli kuhusu ibada, na kweli kuhusu mwenendo wetu. Kwa kulinganisha Mashahidi wa Yehova leo na Wakristo wa karne ya kwanza, usadikisho wetu kwamba ‘Mungu kwa kweli yumo miongoni mwetu,’ uliimarishwa kwelikweli.—1 Wakorintho 14:25.

Baada ya muhtasari wa makala ya funzo la Mnara wa Mlinzi la juma hilo, hotuba ya kumalizia yenye kichwa “Kutimiza kwa Uharaka Kazi Yetu ya Kufundisha,” iliwachochea walimu wote wa neno la Mungu waliohudhuria mkusanyiko watende. Pitio fupi la programu lilikazia umuhimu wa kutumia Maandiko kufundisha, njia ambazo tunaweza kuwa walimu wanaostahili, na uhitaji wa kuwa na uhakika katika kweli tunayofundisha wengine. Msemaji alitushauri tufanye ‘maendeleo yetu yawe dhahiri’ na ‘kukaza uangalifu kwetu wenyewe na kwa kufundisha kwetu.’—1 Timotheo 4:15, 16.

Tulifurahia kama nini karamu nzuri ya kiroho kwenye Mkusanyiko wa Wilaya wa “Walimu wa Neno la Mungu”! Na tumwige Mfunzi wetu Mtukufu, Yehova, na Mwalimu Mkuu, Yesu Kristo, katika kuwafundisha wengine neno la Mungu.

[Sanduku/Picha katika ukurasa wa 28]

Vichapo Vipya vya Kutimiza Mahitaji ya Pekee

Wajumbe waliohudhuria Mkusanyiko wa Wilaya wa “Walimu wa Neno la Mungu” walipokea kwa furaha vichapo viwili ambavyo vitasaidia sana kufundisha watu kweli za Kimaandiko katika sehemu fulani za ulimwengu. Trakti yenye kichwa Je, Una Roho Isiyoweza Kufa? itakuwa kifaa kizuri cha kuanzisha mazungumzo na watu wanaoishi katika nchi ambazo lugha zao hazitofautishi “nafsi” na “roho.” Trakti hiyo mpya inaonyesha waziwazi kwamba kani ya roho ni tofauti na kiumbe wa roho na kwamba watu hawawi viumbe wa roho wanapokufa.

Broshua Jinsi ya Kupata Maisha Yenye Kuridhisha ilitolewa siku ya pili ya mkusanyiko. Broshua hiyo ilitayarishwa kwa kusudi la kuanzisha mafunzo ya Biblia na watu wasioamini kwamba kuna Muumba mwenye utu na wasiofahamu kwamba kuna kitabu kilichopuliziwa na Mungu. Je, umefaulu kutumia vichapo hivi vipya katika huduma?

[Picha katika ukurasa wa 26]

Huko Milan, Italia, na kwenye mikusanyiko mingi ulimwenguni pote, mamia ya watu walibatizwa

[Picha katika ukurasa wa 29]

Wahudhuriaji walichochewa na drama yenye kichwa “Heshimu Mamlaka ya Yehova”