“Huenda Matibabu Haya Yakawa Yenye Uchungu”

JE, UMEWAHI kuambiwa maneno hayo? Labda daktari au mwuguzi fulani alikuambia hivyo kabla ya kuanza kukupatia matibabu fulani yaliyopendekezwa.

Yaelekea hukukataa matibabu hayo kusudi tu uepuke uchungu. Badala yake, ulivumilia ili upate kupona. Unapokuwa mgonjwa sana, kukubali au kukataa matibabu yenye uchungu kunaweza kuwa jambo la kufa na kupona.

Ingawa huenda isiwe lazima kumwona daktari sikuzote, sote tukiwa wanadamu wasio wakamilifu tunahitaji nidhamu, au sahihisho ambalo wakati mwingine laweza kuwa hata lenye uchungu. (Yeremia 10:23) Ikikazia uhitaji huo kuhusiana na watoto, Biblia inasema: “Ujinga umefungwa ndani ya moyo wa mtoto; lakini fimbo ya adhabu itaufukuzia mbali.”—Mithali 22:15.

Hapa fimbo inamaanisha mamlaka ya mzazi. Ni kweli kwamba watoto wengi hawapendi nidhamu. Huenda wakaichukia ikiwa inahusisha adhabu ya aina fulani. Hata hivyo, wazazi wenye hekima na upendo huzingatia jinsi nidhamu itakavyomnufaisha mtoto baadaye wala si jinsi inavyomwumiza sasa. Wazazi Wakristo wanajua kwamba Neno la Mungu linasema kweli: “Hakuna nidhamu ionekanayo kwa wakati wa sasa kuwa yenye shangwe, bali yenye kihoro; lakini baadaye kwa wale ambao wamezoezwa nayo hiyo hutoa tunda lenye kufanya amani, yaani, uadilifu.”—Waebrania 12:11; Mithali 13:24.

Bila shaka, si watoto tu wanaohitaji nidhamu. Watu wazima pia wanaihitaji. Biblia inazungumza na watu wazima inaposema: “Mkamate sana elimu [“nidhamu,” NW], usimwache aende zake; mshike maana yeye ni uzima wako.” (Mithali 4:13) Naam, watu wenye hekima—vijana kwa wazee—watakubali nidhamu ya Neno la Mungu, Biblia, kwa sababu kufanya hivyo kutaokoa maisha yao hatimaye.