Kweli Ni Yenye Thamani Kadiri Gani Kwako?
Kweli Ni Yenye Thamani Kadiri Gani Kwako?
“Mtajua kweli, na kweli itawaweka nyinyi huru.”—YOHANA 8:32.
1. Pilato alitumiaje neno “kweli,” tofauti na jinsi Yesu alivyolitumia?
“KWELI ni nini?” Pilato alipouliza swali hilo, yaonekana alipendezwa tu kujua kweli kwa ujumla. Kwa upande mwingine, Yesu alikuwa amesema: “Kwa ajili ya hili mimi nimezaliwa, na kwa ajili ya hili nimekuja kuingia ulimwenguni, ili nitoe ushahidi juu ya ile kweli.” (Yohana 18:37, 38) Tofauti na Pilato, Yesu alikuwa akirejezea kweli kutoka kwa Mungu.
Jinsi Ulimwengu Unavyoiona Kweli
2. Ni maneno gani ya Yesu yanayoonyesha thamani ya ile kweli?
2 Paulo alisema: “Imani si miliki ya watu wote.” (2 Wathesalonike 3:2) Ndivyo ilivyo na kweli. Hata wanapopewa fursa ya kujifunza kweli ya Biblia, watu wengi huipuuza kimakusudi. Hata hivyo, kweli ni yenye thamani kama nini! Yesu alisema: “Nanyi mtajua kweli, na kweli itawaweka nyinyi huru.”—Yohana 8:32.
3. Twapaswa kutii onyo gani kuhusu mafundisho yenye kupotosha?
3 Mtume Paulo alisema kwamba kweli haiwezi kupatikana katika falsafa na desturi za wanadamu. (Wakolosai 2:8) Kwa kweli, mafundisho hayo ni yenye kupotosha. Paulo aliwaonya Wakristo katika Efeso kwamba wakiamini mafundisho hayo, watakuwa kama watoto wa kiroho ‘wakirushwa huku na huku kama vile na mawimbi na kila upepo wa fundisho kwa njia ya mbinu ya hadaa ya watu, kwa njia ya ujanja katika kutunga kosa.’ (Waefeso 4:14) Leo, “hadaa ya watu” huendelezwa na propaganda ya wale wanaopinga kweli ya Biblia. Kichapo The New Encyclopædia Britannica kinafasiri neno “propaganda” kuwa “jitihada inayofanywa hatua kwa hatua kupotosha imani, mtazamo au matendo ya wengine.” Propaganda ya namna hiyo hupotosha kweli iwe uwongo kwa njia ya hila na kuendeleza uwongo kuwa kweli. Ili kupata ile kweli licha ya mikazo hiyo yenye hila, lazima tujifunze Maandiko kwa bidii.
Wakristo na Ulimwengu
4. Ni watu gani wanaoweza kuipata ile kweli, nao wanaoipokea wana daraka gani?
4 Akirejezea wale waliopata kuwa wanafunzi wake, Yesu Kristo alisali hivi kwa Yehova: “Watakase kwa njia ya ile kweli; neno lako ni kweli.” (Yohana 17:17) Watu hao wangetakaswa au kutengwa kwa kusudi la kumtumikia Yehova na kutangaza jina na Ufalme wake. (Mathayo 6:9, 10; 24:14) Ijapokuwa si miliki ya watu wote, kweli ya Yehova hupatikana ikiwa zawadi ya bure kwa wote wanaoitafuta, bila kujali taifa, rangi, au utamaduni wao. Mtume Petro alisema: “Nahisi kwamba Mungu si mwenye ubaguzi, bali katika kila taifa mtu ambaye humhofu na kutenda uadilifu akubalika kwake.”—Matendo 10:34, 35.
5. Kwa nini mara nyingi Wakristo hunyanyaswa?
5 Wakristo huwaeleza wengine kweli ya Biblia, lakini hawakaribishwi kila mahali. Yesu alionya hivi: ‘Watu watawakabidhi nyinyi kwenye dhiki na watawaua nyinyi, nanyi mtakuwa vitu vya kuchukiwa na mataifa yote kwa sababu ya jina langu.’ (Mathayo 24:9) Akifafanua mstari huo, kasisi wa Ireland John R. Cotter aliandika hivi katika mwaka wa 1817: “Badala ya watu kushukuru kwa ajili ya jitihada ya [Wakristo] ya kubadili maisha ya watu kwa kuwahubiria, wanawachukia na kuwanyanyasa wanafunzi kwa sababu ya kufunua maovu yao.” Wanyanyasi hao ‘hawakubali upendo wa ile kweli ili wapate kuokolewa.’ Kwa sababu hiyo, “Mungu huacha utendaji wa kosa uwaendee wao, ili wapate kuuamini uwongo, ili wote wapate kuhukumiwa kwa sababu hawakuamini kweli bali walipendezwa na ukosefu wa uadilifu.”—2 Wathesalonike 2:10-12.
6. Ni tamaa gani ambayo Mkristo hapaswi kusitawisha?
6 Mtume Yohana awashauri hivi Wakristo wanaoishi katika ulimwengu huu wenye uhasama: “Msiwe mkipenda ama ulimwengu ama vitu vilivyo katika ulimwengu. . . . Kila kitu kilicho katika ulimwengu—tamaa ya mwili na tamaa ya macho na wonyesho wa mtu wa kujivunia njia yake ya kutegemeza maisha—hakitokani na Baba, bali hutokana na ulimwengu.” (1 Yohana 2:15, 16) Yohana anaposema “kila kitu,” haachi kitu chochote. Kwa sababu hiyo, hatupaswi kusitawisha tamaa ya kitu chochote kinachopatikana katika ulimwengu huu ambacho kinaweza kutukengeusha kutoka katika kweli. Kutii shauri la Yohana kutaathiri sana maisha yetu. Jinsi gani?
7. Ujuzi kuhusu kweli huchocheaje watu wenye mioyo minyofu?
7 Mnamo mwaka wa 2001, Mashahidi wa Yehova ulimwenguni pote waliongoza mafunzo ya Biblia ya nyumbani zaidi ya milioni nne na nusu kila mwezi, wakifundisha watu na vikundi matakwa ya Mungu ili waje kupata uhai. Kwa sababu ya jitihada hizo, watu 263,431 walibatizwa. Nuru ya kweli ilikuwa yenye thamani kwa wanafunzi hao wapya, nao walikataa mashirika mabaya na mazoea yasiyo ya adili na yenye kumvunjia Mungu heshima ambayo yameenea katika ulimwengu huu. Tangu wabatizwe, wameendelea kuishi kupatana na kanuni za Yehova zilizowekwa kwa Wakristo wote. (Waefeso 5:5) Je, kweli ni yenye thamani kwako kadiri hiyo?
Yehova Hutujali
8. Yehova huonaje wakfu wetu kwake, na kwa nini ni jambo la hekima “kutafuta kwanza ufalme”?
8 Licha ya hali yetu ya kutokamilika, Yehova hukubali wakfu wetu kwa rehema, akijishusha kwa njia ya mfano, ili atuvute kwake. Kwa hiyo yeye hutufundisha ili tuboreshe miradi na tamaa yetu. (Zaburi 113:6-8) Wakati huohuo, Yehova huturuhusu tuwe na uhusiano naye, naye anatuahidi kwamba atatutegemeza iwapo ‘tutafuliza kutafuta kwanza ufalme na uadilifu wake.’ Tukifanya hivyo na kujilinda kiroho, anatuahidi: “Vitu vingine vyote hivi mtaongezewa.”—Mathayo 6:33.
9. Ni nani aliye “mtumwa mwaminifu na mwenye busara,” naye Yehova hutujali jinsi gani kwa kutumia “mtumwa” huyo?
9 Yesu Kristo alichagua mitume wake 12 na kuweka msingi wa kutaniko la Wakristo watiwa-mafuta ambao wangeitwa “Israeli wa Mungu.” (Wagalatia 6:16; Ufunuo 21:9, 14) Baadaye waliitwa “kutaniko la Mungu aliye hai, nguzo na tegemezo la ile kweli.” (1 Timotheo 3:15) Yesu aliwataja kihususa washiriki wa kutaniko hilo kuwa “mtumwa mwaminifu na mwenye busara” na “msimamizi-nyumba mwaminifu, mwenye busara.” Yesu alisema kwamba mtumwa mwaminifu angekuwa na daraka la kuwapa Wakristo “kipimo chao cha magawio ya chakula kwenye wakati ufaao.” (Mathayo 24:3, 45-47; Luka 12:42) Tukikosa chakula tutakufa. Vivyo hivyo, tusipokula chakula cha kiroho, tutadhoofika na kufa kiroho. Kwa hiyo, kuwepo kwa “mtumwa mwaminifu na mwenye busara” ni uthibitisho mwingine kwamba Yehova hutujali. Sikuzote na tuthamini chakula hicho cha kiroho chenye thamani tunachokipata kupitia “mtumwa” huyo.—Mathayo 5:3.
10. Kwa nini ni muhimu tuhudhurie mikutano kwa ukawaida?
10 Kula chakula cha kiroho kunamaanisha kuwa na funzo la kibinafsi. Pia kunahusisha kushirikiana na Wakristo wengine na kuhudhuria mikutano ya kutaniko. Je, unakumbuka vizuri kabisa chakula ulichokula miezi sita au hata majuma sita yaliyopita? Labda hukumbuki. Hata hivyo, chakula ulichokula kilikupa nguvu ulizohitaji. Na labda tangu wakati huo umekula tena chakula hicho. Ndivyo ilivyo na chakula cha kiroho kinachoandaliwa kwenye mikutano yetu ya Kikristo. Labda hatukumbuki kila jambo tulilosikia mikutanoni. Na labda habari hiyo imetajwa mara kadhaa. Hata hivyo, hicho ni chakula cha kiroho ambacho ni muhimu kwa hali yetu njema. Sikuzote mikutano yetu huandaa chakula kizuri cha kiroho kwa wakati ufaao.
11. Tuna daraka gani tunapohudhuria mikutano ya Kikristo?
11 Pia tunapohudhuria mikutano ya Kikristo tunakuwa na daraka fulani. Wakristo wanashauriwa ‘watiane moyo,’ wakiwachochea washiriki wenzao wa kutaniko “kwenye upendo na kazi zilizo bora.” Tunapotayarisha, kuhudhuria, na kushiriki mikutano yote ya Kikristo, imani yetu huimarishwa na tunawatia wengine moyo. (Waebrania 10:23-25) Kama watoto wachanga ambao huchagua chakula, huenda wengine wakahitaji kutiwa moyo daima kula chakula cha kiroho. (Waefeso 4:13) Tunaonyesha upendo kwa kuwatia moyo watu hao inapohitajika ili wasonge mbele na kuwa Wakristo wakomavu ambao mtume Paulo aliandika hivi kuwahusu: “Chakula kigumu ni cha watu wakomavu, cha wale ambao kupitia utumizi, nguvu zao za ufahamu zimezoezwa kutofautisha lililo sahihi na lililo kosa pia.”—Waebrania 5:14.
Kutunza Hali Yetu ya Kiroho
12. Ni nani aliye na daraka kuu la kutusaidia kudumu katika ile kweli? Eleza.
12 Mwenzi wetu wa ndoa au wazazi wetu wanaweza kututia moyo tufuate njia ya kweli. Vivyo hivyo, wazee wa kutaniko wanaweza kutuchunga kwa kuwa sisi ni sehemu ya kundi lililo chini ya uangalizi wao. (Matendo 20:28) Lakini ni nani mwenye daraka kuu la kutusaidia tudumu katika njia ya maisha inayotegemea ile kweli? Kwa kweli, hilo ni daraka la mtu binafsi. Tuna daraka hilo hata hali ziwe shwari au ziwe ngumu. Fikiria tukio lifuatalo.
13, 14. Kupatana na jambo lililompata mwana-kondoo mmoja, tunawezaje kupata msaada wa kiroho tunaohitaji?
13 Nchini Scotland, mwana-kondoo mmoja aliwaacha wenzake wakiwa malishoni na kwenda ukingoni mwa mlima na kuanguka. Hakuumia, lakini aliogopa na hakuweza kupanda na kurudi juu alipokuwa. Kwa hiyo akaanza kulia kwa huzuni. Mama yake alimsikia, naye pia akaanza kulia hadi mchungaji alipokuja na kumwokoa mwana-kondoo huyo.
14 Ona mfuatano wa matukio hayo. Mwana-kondoo aliomba msaada, mama yake akajiunga naye kulia, naye mchungaji akachukua hatua mara moja kumwokoa. Ikiwa mnyama mchanga na mama yake wanaweza kuona hatari na kuomba msaada mara moja, je, hatupaswi kuomba msaada pia tunapojikwaa kiroho au kukabili hatari tusizotazamia kutoka kwa ulimwengu wa Shetani? (Yakobo 5:14, 15; 1 Petro 5:8) Twapaswa kufanya hivyo, hasa tunapokosa ujuzi kwa sababu tu wachanga au kwa sababu tu wapya katika kweli.
Kufuata Mwelekezo wa Mungu Huleta Furaha
15. Mwanamke mmoja alihisije alipoanza kushirikiana na kutaniko la Kikristo?
15 Fikiria umuhimu wa kuielewa Biblia na amani ya akili ambayo watu wanaomtumikia Mungu wa kweli hupata. Mwanamke mmoja mwenye umri wa miaka 70 aliyekuwa akishirikiana na Kanisa la Anglikana muda wote wa maisha yake alikubali kufundishwa Biblia na mmoja wa Mashahidi wa Yehova. Punde si punde alijifunza kwamba jina la Mungu ni Yehova na akajiunga na wengine kusema “Ameni” wakati wa sala za kutoka moyoni zilizotolewa hadharani katika Jumba la Ufalme. Alisema hivi kwa shauku: “Badala ya kuonyesha kwamba Mungu yuko mbali sana na wanadamu, ni kana kwamba mnamleta katikati yetu kama rafiki mpendwa. Sijawahi kuona jambo kama hilo.” Yaelekea, mwanamke huyo mwenye kupendezwa hatasahau kamwe kile kilichomvutia kwa ile kweli. Vivyo hivyo, na tusisahau kamwe jinsi kweli ilivyokuwa yenye thamani kwetu tulipoikubali mara ya kwanza.
16. (a) Ni nini kinachoweza kutokea tukiruhusu utafutaji wa pesa uwe jambo kuu? (b) Tunaweza kupataje furaha ya kweli?
16 Wengi wanaamini kwamba wangekuwa na furaha zaidi kama wangekuwa na pesa nyingi. Hata hivyo, tukiruhusu utafutaji wa pesa uwe jambo kuu maishani, huenda ‘tukaivunja mioyo yetu kwa huzuni nyingi.’ (1 Timotheo 6:10, Biblia Habari Njema) Fikiria ni watu wengi kadiri gani ambao hununua tikiti za nasibu, hucheza kamari, au kununua hisa nyingi katika soko la hisa wakitumaini kupata pesa nyingi. Ni watu wachache sana hupata pesa hizo. Hata wale ambao huzipata mara nyingi huona kwamba utajiri wao wa ghafula hauwaletei furaha. Badala yake, furaha ya kudumu hutokana na kufanya mapenzi ya Yehova, kufanya kazi pamoja na kutaniko la Kikristo na kuelekezwa na roho takatifu ya Yehova na malaika wake. (Zaburi 1:1-3; 84:4, 5; 89:15) Tunapofanya hivyo, huenda tukapata baraka tusizotarajia. Je, unaiona kweli kuwa yenye thamani sana kiasi kwamba inaweza kukuletea baraka hizo maishani?
17. Mtume Petro alionyesha mtazamo gani kwa kuishi na Simoni, mtengenezaji-ngozi?
17 Fikiria kielelezo cha mtume Petro. Katika mwaka wa 36 W.K., alifunga safari ya umishonari kwenda kwenye Uwanda wa Sharoni. Alipofika Lida, alikaa huko kwa muda mfupi na kumponya Ainea aliyelemaa. Aliendelea na safari yake hadi mji wenye bandari wa Yopa ambako alimfufua Dorkasi. Andiko la Matendo 9:43 hutuambia: “Kwa siku nyingi akabaki katika Yopa pamoja na Simoni fulani, mtengenezaji-ngozi.” Rejezo hilo fupi linaonyesha kwamba Petro hakuwa na ubaguzi alipokuwa akiwahudumia watu wa jiji hilo. Jinsi gani? Msomi wa Biblia Frederic W. Farrar aandika hivi: “Mfuasi shupavu wa Sheria ya Mdomo [ya Musa] hangeweza kuishi katika nyumba ya mtengenezaji-ngozi. Kazi hii iliyomlazimu mtu aguse ngozi na mizoga ya wanyama mbalimbali kila siku, na vifaa vilivyohitajika kuifanya, viliifanya isiwe safi na iwe yenye kuchukiza machoni pa watu walioshika sheria kwa ushupavu.” Hata ikiwa ‘nyumba ya Simoni iliyokuwa kando ya bahari’ haikuwa karibu na mahali alipotengenezea ngozi, Simoni alifanya ‘kazi ya kuchukiza ambayo ingefanya mtu adharauliwe,’ asema Farrar.—Matendo 10:6.
18, 19. (a) Kwa nini Petro alifadhaishwa na maono aliyoona? (b) Petro alipokea baraka gani pasipo kutarajia?
18 Petro ambaye hakuwa na ubaguzi alikubali ukarimu wa Simoni. Akiwa huko, alipokea mwelekezo kutoka kwa Mungu pasipo kutarajia. Aliona ono la viumbe wasio safi kulingana na Sheria ya Wayahudi na kuamriwa ale viumbe hao. Petro alikataa akisema kwamba hakuwahi ‘kula kitu chochote kilichotiwa unajisi na kisicho safi.’ Lakini aliambiwa hivi mara tatu: “Koma kuviita kuwa najisi vitu ambavyo Mungu ametakasa.” Bila shaka, ‘Petro alikuwa katika fadhaa kubwa kindani juu ya maana ya ono alilokuwa ameona.’—Matendo 10:5-17; 11:7-10.
19 Petro hakujua kwamba siku iliyotangulia huko Kaisaria, umbali wa kilometa 50, mtu fulani asiye Myahudi anayeitwa Kornelio alikuwa ameona ono pia. Malaika wa Yehova alimwagiza Kornelio atume watumishi wake wakamtafute Petro katika nyumba ya Simoni, mtengenezaji-ngozi. Kornelio alituma watumishi wake nyumbani kwa Simoni, naye Petro akaandamana nao hadi Kaisaria. Akiwa huko, alimhubiria Kornelio na watu wa jamaa yake na marafiki wake. Kwa hiyo, wakawa watu wa kwanza wasio Wayahudi na wasiotahiriwa kupokea roho takatifu na kuwa warithi wa Ufalme. Ijapokuwa watu hao hawakuwa wametahiriwa, wote waliosikiliza maneno ya Petro walibatizwa. Kuanzia wakati huo, watu wa mataifa walioonwa na Wayahudi kuwa wasio safi walipata fursa ya kuwa washiriki wa kutaniko la Kikristo. (Matendo 10:1-48; 11:18) Lilikuwa pendeleo lililoje kwa Petro—kwa sababu tu aliiona kweli kuwa yenye thamani na hivyo kufuata mwelekezo kutoka kwa Yehova na kutenda kwa imani!
20. Tunapokea msaada gani kutoka kwa Mungu tunapotanguliza kweli maishani mwetu?
20 Paulo atuhimiza hivi: “Tukisema kweli, na tukue kwa upendo katika mambo yote katika yeye aliye kichwa, Kristo.” (Waefeso 4:15) Naam, kweli itatupa furaha isiyo na kifani sasa ikiwa tutaitanguliza maishani mwetu na kumruhusu Yehova atuongoze kupitia roho yake takatifu. Pia tusisahau msaada tunaopokea kupitia malaika watakatifu katika kazi yetu ya kueneza evanjeli. (Ufunuo 14:6, 7; 22:6) Tuna pendeleo lililoje kutegemezwa katika kazi tuliyopewa na Yehova! Kudumisha uaminifu wetu kutafanya tumsifu Yehova, Mungu wa kweli, kwa umilele. Hakuna jambo lenye thamani kuliko kumsifu Yehova.—Yohana 17:3.
Tumejifunza Nini?
• Kwa nini watu wengi huikataa kweli?
• Wakristo waoneje vitu vya ulimwengu wa Shetani?
• Twapaswa kuwa na maoni gani kuhusu mikutano, na kwa nini?
• Tuna daraka gani la kujitunza kiroho?
[Maswali ya Funzo]
[Ramani/Picha katika ukurasa wa 18]
BAHARI KUU
Kaisaria
UWANDA WA SHARONI
Yopa
Lida
Yerusalemu
[Picha]
Petro alifuata mwelekezo wa Mungu na kupata baraka pasipo kutarajia
[Hisani]
Ramani: Mountain High Maps® Copyright © 1997 Digital Wisdom, Inc.
[Picha katika ukurasa wa 13]
Yesu alitoa ushahidi juu ya kweli
[Picha katika ukurasa wa 15]
Kama vile chakula cha kimwili, chakula cha kiroho ni muhimu ili tuwe na hali njema