Unaweza Kuokokaje Mwisho wa Ulimwengu Huu?

BIBLIA hufafanua mwisho wa mfumo huu wa mambo kuwa “siku ya ghadhabu, siku ya fadhaa na dhiki, siku ya uharibifu na ukiwa, siku ya giza na utusitusi, siku ya mawingu na giza kuu.” (Sefania 1:15) Kwa kweli hii si siku ambayo kwa kawaida ungeitazamia kwa hamu! Hata hivyo, mtume Petro aliwashauri Wakristo wenzake wawe “[wa]kingojea na kuweka karibu akilini kuwapo kwa siku ya Yehova, ambayo kupitia kwayo mbingu zikiwa zimewaka moto zitafumuliwa na elementi zikiwa moto sana zitayeyuka! Lakini ziko mbingu mpya na dunia mpya ambazo tunangojea kulingana na ahadi yake, na katika hizo uadilifu utakaa.”—2 Petro 3:12, 13.

Hapa Petro hakuwa akizungumzia kuharibiwa kwa mbingu na dunia halisi. “Mbingu” na “dunia” ambazo Petro alirejezea katika habari hii zinafananisha serikali fisadi za kibinadamu na wanadamu wasiomwogopa Mungu leo. “Siku ya BWANA” haitaharibu dunia yenyewe lakini ‘itawaharibu watu wake, wenye dhambi, wasikae ndani yake.’ (Isaya 13:9) Siku ya Yehova itakuwa siku ya wokovu kwa wale ‘wanaougua na kulia kwa sababu ya machukizo yote’ yanayofanywa na wanadamu waovu leo.—Ezekieli 9:4.

Hivyo basi, mtu anawezaje kuokolewa katika “siku ya BWANA iliyo kuu na itishayo”? “Neno la BWANA” alilofunulia mmoja wa manabii wake latoa jibu: “Itakuwa ya kwamba mtu awaye yote atakayeliitia jina la BWANA [“Yehova,” NW] ataponywa.” (Yoeli 1:1; 2:31, 32) Mashahidi wa Yehova watafurahia kukusaidia ujifunze maana ya kuliitia jina la Yehova.