Si Mzee Sana Asiweze Kujifunza

KSENIYA alizaliwa katika mwaka wa 1897. Alikuwa na binti 3, mwana mmoja, wajukuu 15, na vitukuu 25. Katika maisha yake yote alifanya aliyofunzwa na wazazi wake. Ijapokuwa aliishi Moscow akiwa mkimbizi kutoka Jamhuri iliyokumbwa na vita ya Abkhaz iliyo kati ya Bahari Nyeusi na Caucasus, aliridhika na maisha yake, hasa na imani aliyorithi.

Katika mwaka wa 1993, Meri bintiye Kseniya akawa mmoja wa Mashahidi wa Yehova. Meri alianza kuongea na Kseniya kuhusu Yehova Mungu na kuhusu Biblia, lakini Kseniya hakutaka kusikiliza. Kseniya aliendelea kumwambia bintiye, “Nimezeeka sana, siwezi kujifunza jambo lolote jipya.”

Hata hivyo, bintiye Meri; Londa, mke wa mjukuu wake; na vitukuu wake Nana na Zaza, ambao tayari walikuwa Mashahidi wa Yehova, waliendelea kuongea naye kuhusu Biblia. Jioni moja katika mwaka wa 1999, walimsomea Kseniya andiko lililomgusa moyo. Lilihusu maneno ya Yesu yenye kuchochea kwa mitume wake waaminifu alipoanzisha Mlo wa Jioni wa Bwana. (Luka 22:19, 20) Akiwa na umri wa miaka 102, Kseniya akaamua kuanza kujifunza Biblia jioni hiyo.

“Hatimaye, baada ya kuishi kwa miaka 102, nimepata kuelewa kusudi la uhai,” asema Kseniya. “Sasa natambua kwamba hakuna jambo lililo bora kuliko kumtumikia Yehova Mungu wetu mkuu na mwenye upendo. Bado nina afya njema na ni mzima kabisa. Naweza kusoma bila miwani na kushirikiana kwa uchangamfu na familia yangu.”

Kseniya alibatizwa Novemba 5, 2000. Yeye asema: “Sasa nimejitoa kumtumikia Yehova kwa upendo. Mimi huwapa watu magazeti na trakti nikiwa nimeketi kwenye kituo cha basi karibu na nyumbani. Mara nyingi watu wa ukoo hunitembelea, nami hufurahia kuwaambia kweli kumhusu Yehova.”

Kseniya atazamia wakati ambapo ‘nyama ya mwili wake itakuwa laini kuliko ya mtoto, na kuzirudia siku za ujana wake.’ (Ayubu 33:25) Ikiwa mtu aliye na umri wa zaidi ya miaka 100 hajioni kuwa mzee sana asiweze kujifunza juu ya kusudi la uhai kupitia Biblia, namna gani wewe?