Usalama Wako Unategemea Nini?

Katika kijiji kidogo huko Afrika Magharibi, kijana aitwaye Josué anawaaga jamaa na marafiki zake. * Kisha anasafiri jijini kutafuta usalama wa kifedha. Hata hivyo, muda mfupi baada ya kuwasili jijini, matumaini yake yanafifia anapotambua kwamba maisha ya jijini ni tofauti na alivyofikiria.

JOSUÉ anavunjika moyo sana anapojaribu kurekebisha hali zake ili zifaane na maisha ya jijini. Anatambua kuwa maisha ya jijini ni tofauti kabisa na alivyowazia. Josué sasa anatamani sana kurudia maisha ya hali ya chini huko kijijini pamoja na jamaa na marafiki zake. Lakini anaogopa kuwa wanakijiji fulani watamcheka. ‘Wataniona kama mtu aliyeshindwa na maisha ya jijini,’ yeye anawaza.

Jambo linalomsumbua sana ni kwamba wazazi wake wangevunjika moyo kwa kuwa walimtegemea awasaidie kifedha. Huku akijaribu kukabiliana na msononeko huo, anaanza kufanya kazi ya hali ya chini inayochukua wakati mwingi na inayompatia mshahara mdogo sana kuliko alivyotarajia. Yeye anatoka kazini akiwa amechoka sana kwa sababu ya kazi nyingi. Hana wakati wa kushiriki katika utendaji wa Kikristo anaothamini sana. Anaanza kuhisi huzuni na upweke kwa kuwa yuko mbali na jamaa yake na marafiki wa zamani. Hakupata usalama aliotarajia kupata jijini.

Hali hiyo yenye kuhuzunisha iliyompata Josué inatokea kila mahali. Josué hakuchochewa na ubinafsi ahame—alikuwa tu akitafuta usalama. Alifikiri kwamba ingekuwa rahisi kupata kazi jijini. Bila shaka, kuna wachache ambao hupata kazi nzuri, lakini hiyo haimaanishi kwamba wamepata usalama wa kweli. Josué hakufanikiwa na ndivyo na wengi wanaojaribu kufanya kama yeye. Jambo hilo hufanya tuulize, ‘Usalama ni nini?’

Watu wana maoni tofauti kuhusu usalama. Kamusi moja inasema kwamba usalama ni “kuwa huru kutokana na hatari” au “kuwa huru kutokana na hofu au hangaiko.” Wengi hutambua kuwa ‘uhuru kamili kutokana na hatari’ haupatikani leo. Wao wanaridhika maadamu tu wao wanahisi wakiwa salama, ingawa wanazungukwa na hali zenye kutisha.

Namna gani wewe? Unatafuta usalama wapi? Je, usalama unapatikana katika jiji kama vile Josué alivyodhania? Au unapatikana katika fedha bila kujali mtu amezipata vipi? Je, usalama unapatikana mtu anapopandishwa cheo katika jamii? Hata usalama wako uwe nini, wewe na familia yako mtajihisi mkiwa salama kwa muda gani?

Hebu na tufikirie njia tatu ambazo watu wengi hutegemea kupata usalama —kuhamia mahali fulani hususa; fedha; wadhifa au cheo. Kisha tutachunguza jinsi ya kupata usalama wa kweli na wenye kudumu.

[Maelezo ya Chini]