Kitulizo cha Njaa Kinakuja!

HUENDA ukauliza, ‘Njaa ya aina gani?’ Njaa ya kiroho! Nabii Mwebrania wa kale alitabiri kuhusu njaa hiyo: “Angalia siku zinakuja, asema Bwana MUNGU, ambazo nitaleta njaa katika nchi, si njaa ya kukosa chakula, wala kiu ya kukosa maji, bali ya kukosa kuyasikia maneno ya BWANA.” (Amosi 8:11) Ili kutuliza njaa hiyo ya kiroho, washiriki 48 wa darasa la 112 la Shule ya Biblia ya Watchtower ya Gileadi, iliyoko Patterson, New York, watakwenda katika nchi 19 mbalimbali katika mabara 5 na visiwa vya bahari.

Wanakwenda kwenye migawo yao wakiwa wameandaliwa, si na nyama na nafaka halisi, bali na ujuzi, uzoefu, na mazoezi. Kwa miezi mitano walijifunza Biblia kwa kina ili waimarishe imani yao kwa ajili ya utumishi wa umishonari katika nchi za kigeni. Katika Machi 9, 2002, wahudhuriaji 5,554 walifurahia kusikiliza programu ya kuhitimu kwa wanafunzi hao.

Kwa furaha, Stephen Lett, ambaye ni mshiriki wa Baraza Linaloongoza la Mashahidi wa Yehova, alifungua programu. Aliwakaribisha kwa njia ya pekee wageni waliofika kutoka sehemu mbalimbali za ulimwengu. Kisha akatumia maneno haya ya Yesu kuhusiana na kazi ya hao mishonari wapya, “Nyinyi ni nuru ya ulimwengu.” (Mathayo 5:14) Alieleza: ‘Katika migawo yenu, “mtaangaza” kazi za ajabu za Yehova katika njia mbalimbali ili kuwasaidia watu wanyoofu kuona uzuri wa Yehova na makusudi yake.’ Ndugu Lett aliwatia moyo mishonari kutumia nuru ya Neno la Mungu ili kufichua giza la mafundisho ya uwongo na kutoa mwongozo kwa watu wanaotafuta kweli.

Mtazamo Unaofaa Wahitajiwa ili Kufanikiwa

Baada ya maneno ya utangulizi ya mwenyekiti, Baltasar Perla, mshiriki wa Halmashauri ya Ofisi ya Tawi ya Marekani, alitoa hotuba ya kwanza katika mfululizo uliokusudiwa kusaidia wahitimu kuwa mishonari wenye mafanikio. Alizungumzia hotuba yenye kichwa “Uwe Hodari, Mwenye Moyo Mkuu, Ukatende.” (1 Mambo ya Nyakati 28:20) Mfalme Solomoni wa Israeli la kale alipewa mgawo mgumu wa kufanya kazi ambayo hakuwa amewahi kuifanya, yaani kujenga hekalu huko Yerusalemu. Solomoni alitenda, na kwa msaada wa Yehova hekalu lilikamilishwa. Akitumia somo hilo kwa wahitimu, Ndugu Perla alisema: ‘Mmepata mgawo mpya wa kuwa mishonari, nanyi mwahitaji kuwa hodari na wenye moyo mkuu.’ Bila shaka wanafunzi walifarijika kuhakikishiwa kwamba iwapo watabaki karibu na Yehova, hatawaacha kamwe. Ndugu Perla alimalizia kwa jambo hili lililoonwa ambalo lilichochea wasikilizaji: ‘Mnaweza kufanya mambo mengi mazuri mkiwa mishonari. Mimi, mama, na dada yangu tulifunzwa kweli na mishonari!’

 Samuel Herd ambaye pia ni mshiriki wa Baraza Linaloongoza alitoa hotuba yenye kichwa, “Mtegemee Yehova ili Ufanikiwe.” Wanafunzi wanaanza kazi yao ya umishonari, na kufanikiwa kwao kunategemea sana uhusiano wao pamoja na Yehova. Ndugu Herd aliwashauri: ‘Mmekuwa mkipokea kwa shangwe ujuzi mwingi wa Biblia kupitia masomo yenu katika Gileadi. Lakini sasa, ili mfanikiwe kwelikweli, ni lazima muanze kutoa kile ambacho mmejifunza.’ (Matendo 20:35) Mishonari watakuwa na fursa nyingi za kufanya hivyo ‘wanapojimwaga wenyewe’ kwa ajili ya wengine.—Wafilipi 2:17.

Walimu wangewapa wanafunzi ushauri gani wa kuwaaga? Mark Noumair alitoa hotuba yenye kichwa kinachotegemea andiko la Ruthu 3:18, “Tulia Hata Utakapojua Jinsi Mambo Yatakavyotukia.” Akitumia mfano wa Naomi na Ruthu, msemaji aliwatia moyo wahitimu kuwa na usadikisho kamili katika mipango iliyowekwa na tengenezo la Mungu la duniani na kutii mamlaka ya kitheokrasi. Ndugu Noumair aligusa mioyo ya wanafunzi aliposema: “Huenda wakati mwingine usielewe ni kwa nini uamuzi fulani unaokuhusu umefanywa au huenda ukahisi kwamba jambo hilo lingefanywa  kwa njia nyingine. Utafanya nini? Je, utafanya mambo kwa njia yako mwenyewe au ‘utatulia,’ ukimtumaini Mungu akuongoze ukiwa na uhakika kwamba kwa wakati wake atasababisha matokeo mema?’ (Waroma 8:28)Bila shaka ushauri wa ‘kuendeleza masilahi ya Ufalme, kutazama kwa makini yale ambayo tengenezo la Yehova linafanya badala ya kuangalia watu mmoja-mmoja,’ utakuwa wenye thamani kwa mishonari wanaohitimu katika migawo yao ya nchi za kigeni.

Wallace Liverance, aliyekuwa mishonari ambaye sasa ni mwalimu wa Gileadi, alitoa hotuba ya kumalizia katika mfululizo wa kwanza wa hotuba. Kichwa cha hotuba yake kilikuwa, “Kaza Fikira, Dumu Katika Utumishi wa Mungu.” Alionyesha kwamba nabii Danieli, kwa kuona Babiloni likianguka na kupitia kwa yale yaliyotabiriwa na Yeremia, alitambua kuwa ukombozi wa Waisraeli kutoka utumwani ulikuwa umekaribia. (Yeremia 25:11; Danieli 9:2) Danieli alijua kwamba Yehova ana wakati wake wa kufanya mambo, na hilo lilimsaidia kukazia fikira kutimizwa kwa makusudi ya Mungu. Tofauti naye, Waisraeli wa siku za nabii Hagai walisema: ‘Wakati haujafika bado.’ (Hagai 1:2, ZSB) Hawakufikiria kuhusu wakati walimoishi, badala yake walikazia fikira starehe zao na kujitosheleza wenyewe, wakaacha kufanya kazi iliyofanya wakombolewe kutoka Babiloni, yaani kujenga upya hekalu. Ndugu Liverance alimalizia kwa kusema: “Basi kazeni fikira kwa kuendelea kuweka akilini kusudi la Yehova.”

Lawrence Bowen, mwalimu wa Gileadi, alisimamia sehemu yenye kichwa “Yehova Huwabariki Wale Wanaotumia Neno Lililo Hai.” (Waebrania 4:12) Sehemu hii ilishughulikia mambo yaliyoonwa na wanafunzi wakiwa shambani, na ilikazia jinsi Yehova anavyowabariki wale wanaotumia Biblia wanapohubiri na kufundisha. Ndugu Bowen alionyesha kwamba Yesu aliwawekea watumishi wote wa Mungu mfano mzuri: ‘Kwa kweli Yesu angeweza kusema kwamba hakubuni mafundisho yake, bali alisema Neno la Mungu.’ Watu wanyoofu walitambua ukweli na wakatenda kulingana nao. (Yohana 7:16, 17) Na ndivyo ilivyo leo.

Mafunzo ya Gileadi Humwandaa Mtu kwa Ajili ya Kila Kazi Njema

Baadaye, Richard Abrahamson na Patrick LaFranca, washiriki wa muda mrefu wa familia ya Betheli, waliwahoji wahitimu sita wa Gileadi ambao sasa wanatumikia katika migawo mbalimbali ya utumishi wa pekee wa wakati wote. Wahitimu wa darasa la 112 walitiwa moyo sana kusikia kwamba hata baada ya miaka mingi, wahitimu hao sita wanaendelea kutumia mazoezi waliyopokea katika Gileadi wanapofanya funzo lao la Biblia, utafiti, na wanaposhughulika na wengine katika migawo yao ya sasa.

Theodore Jaracz, mshiriki wa Baraza Linaloongoza, alitoa hotuba ya msingi ya programu hiyo. Kichwa cha hotuba hiyo kilikuwa “Kinachotimizwa kwa Kuvumilia Chuki ya Shetani.” Kwa miezi mitano iliyopita, wanafunzi waliishi katika makao yenye usalama na ya kitheokrasi. Hata hivyo, kama walivyoelezwa wakati wa masomo yao darasani, tunaishi katika ulimwengu wenye chuki. Watu wa Yehova wanashambuliwa ulimwenguni pote. (Mathayo 24:9) Ndugu Jaracz alitumia masimulizi mbalimbali ya Biblia kuonyesha kwamba ‘sisi ni windo la pekee la Ibilisi. Ni lazima tuimarishe uhusiano wetu na Yehova na tuwe wenye nguvu ili kukabiliana na majaribu.’ (Ayubu 1:8; Danieli 6:4; Yohana 15:20; Ufunuo 12:12, 17) Kwa kumalizia, Ndugu Jaracz alisema kwamba ijapokuwa chuki inayoendelea dhidi ya watu wa Mungu, ‘andiko la Isaya 54:17 linasema, hakuna silaha inayofanyika juu yetu itakayofanikiwa. Yehova atahakikisha kwamba tumekombolewa kwa wakati wake na kwa njia yake.’

Wakiwa ‘wameandaliwa vifaa kikamili,’ bila shaka wahitimu wa darasa la 112 la Gileadi watafanya mengi kuhusiana na kutuliza njaa ya chakula cha kiroho katika nchi watakazotumikia. (2 Timotheo 3:16, 17) Tunatazamia kwa hamu kusikia jinsi watakavyogawa ujumbe huu wenye kujenga kiroho kwa watu katika nchi hizo.

[Sanduku katika ukurasa wa 23]

TAKWIMU ZA DARASA

Idadi ya nchi zilizowakilishwa: 6

Idadi ya nchi ambako wametumwa: 19

Idadi ya wanafunzi: 48

Wastani wa umri: 33.2

Wastani wa miaka katika kweli: 15.7

Wastani wa miaka katika huduma ya wakati wote: 12.2

[Picha katika ukurasa wa 24]

Darasa la 112 Lilohitimu la Shule ya Biblia ya Gileadi ya Watchtower

Katika orodha iliyo chini, nambari za safu zinaanzia mbele kuelekea nyuma, na majina yameorodheshwa kuanzia kushoto kuelekea kulia katika kila safu.

(1) Parotte, M.; Hooker, E.; Anaya, R.; Reynolds, J.; Gesualdi, K.; Gonzalez, J. (2) Robinson, C.; Phillips, B.; Maidment, K.; Moore, I.; Noakes, J.; Barnett, S. (3) Stires, T.; Palmer, B.; Yang, C.; Groothuis, S.; Groppe, T.; Bach, C. (4) Anaya, R.; Soukoreff, E.; Stewart, K.; Simozrag, N.; Simottel, C.; Bach, E. (5) Stewart, R.; Yang, H.; Gilfeather, A.; Harris, R.; Barnett, D.; Parotte, S. (6) Maidment, A.; Moore, J.; Groothuis, C.; Gilfeather, C.; Noakes, S.; Stires, T. (7) Gesualdi, D.; Groppe, T.; Soukoreff, B.; Palmer, G.; Phillips, N.; Simottel, J. (8) Harris, S.; Hooker, P.; Gonzalez, J.; Simozrag, D.; Reynolds, D.; Robinson, M.