“U Mwanamke Mwema”

Maneno hayo ya sifa yalisemwa kuhusu mwanamke kijana Mmoabu. Alikuwa mjane aliyeitwa Ruthu, binti-mkwe wa Naomi, mwanamke Mwisraeli. Ruthu aliyeishi Israeli yapata miaka 3,000 iliyopita, wakati wa utawala wa waamuzi, alijipatia sifa njema. (Ruthu 3:11) Alipataje sifa hiyo? Ni nani wanaoweza kunufaika na kielelezo chake?

Ruthu hakuwa mtu wa kula “chakula cha uvivu.” Alifanya kazi kwa muda mrefu na kwa bidii akiokota masazo shambani na hivyo bidii yake ikafanya asifiwe. Hata alipopunguziwa kazi, aliendelea kufanya kazi kwa bidii, na kufanya zaidi ya alivyotazamiwa. Ruthu alikuwa na sifa kama zile za mke mwema na mwenye bidii anayetajwa katika Biblia.—Mithali 31:10-31; Ruthu 2:7, 15-17.

Ruthu alisifiwa na watu wengine kwa sababu ya sifa zake za kiroho kama vile unyenyekevu, kujidhabihu, na upendo mwaminifu-mshikamanifu. Aliacha wazazi wake na nchi yake na kushikamana na Naomi bila kutazamia usalama unaotokana na ndoa. Wakati huohuo, Ruthu alitamani kumtumikia Yehova, Mungu wa mama-mkwe wake. Kwa kukazia wema wake, simulizi la Biblia lasema kwamba Ruthu ‘alimfaa Naomi kuliko watoto saba.’—Ruthu 1:16, 17; 2:11, 12; 4:15.

Ijapokuwa wanadamu walimsifu Ruthu kwa wema wake, jambo lililo muhimu zaidi ni jinsi Mungu alivyopendezwa na sifa zake na kumthawabisha kwa kumpa pendeleo la kuwa nyanya ya Yesu Kristo. (Mathayo 1:5; 1 Petro 3:4) Ruthu ni kielelezo kizuri kama nini kwa wanawake Wakristo na pia wote wanaodai kumwabudu Yehova!