Je, Unakumbuka?

Je, umefurahia kusoma matoleo ya hivi karibuni ya Mnara wa Mlinzi? Ona kama unaweza kujibu maswali yafuatayo:

• Hisia-mwenzi ni nini, na kwa nini Wakristo wanapaswa kusitawisha sifa hiyo?

Hisia-mwenzi ni uwezo wa kujiweka katika hali ya mtu mwingine, kama vile kuhisi maumivu ya mtu mwingine katika moyo wetu. Wakristo wanashauriwa waonyeshe ‘hisia-mwenzi, shauku ya kidugu, na huruma.’ (1 Petro 3:8) Yehova ametuwekea kielelezo bora cha kufuata katika kuonyesha hisia-mwenzi. (Zaburi 103:14; Zekaria 2:8) Tunaweza kuonyesha kwamba tunajali hisia na mahitaji ya wengine kwa kusikiliza, kuwa macho, na kwa kuwazia hali yao.—4/15, ukurasa wa 24-26.

• Ili kupata furaha ya kweli, kwa nini uponyaji wa kiroho unapaswa kutangulia uponyaji wa kimwili?

Watu wengi walio na afya nzuri ya kimwili hawana furaha, na wamelemewa na matatizo. Tofauti na watu hao, Wakristo wengi leo ambao wamelemaa wanamtumikia Yehova kwa furaha. Wale wanaonufaika na uponyaji wa kiroho watapata fursa ya kuondolewa ulemavu katika ulimwengu mpya.—5/1, ukurasa wa 6-7.

• Kwa nini andiko la Waebrania 12:16 humlinganisha Esau na mwasherati?

Simulizi la Biblia linaonyesha kwamba Esau alitaka thawabu ya papo hapo na alidharau mambo matakatifu. Leo mtu anapokuwa na maoni kama hayo, yanaweza kumchochea atende dhambi nzito, kama vile uasherati.—5/1, ukurasa wa 10-11.

• Tertullian alikuwa nani, naye anajulikana kwa mambo gani?

Alikuwa mwandishi na mwanatheolojia aliyeishi katika karne ya pili na ya tatu W.K. Anajulikana kwa kuandika vitabu kadhaa vya kutetea Ukristo wa jina tu. Alipokuwa akitetea Ukristo huo, alianzisha mawazo na falsafa ambazo baadaye zilikuja kuwa msingi wa mafundisho yenye kupotosha kama vile Utatu.—5/15, ukurasa wa 29-31.

• Kwa nini magonjwa, tabia fulani za kibinadamu, na kifo havitokani tu na chembe za urithi?

Wanasayansi wamefikia mkataa kwamba huenda chembe za urithi husababisha magonjwa fulani ya kibinadamu, na wengine huamini kwamba tabia zetu huelekezwa na chembe zetu za urithi. Hata hivyo, Biblia hutupatia ufahamu wenye kina kuhusu asili ya wanadamu, na jinsi walivyopata kuathiriwa na dhambi na kutokamilika. Ingawa chembe za urithi zinaweza kufanya tuwe na utu fulani, utu wetu huathiriwa pia na mazingira na hali ya kutokamilika.—6/1, ukurasa wa 9-11.

• Kipande fulani cha mafunjo kilichopatikana huko Oxyrhynchus, Misri, kinaelezaje matumizi ya jina la Mungu?

Kipande hicho chenye andiko la Ayubu 42:11, 12 kutoka tafsiri ya Kigiriki ya Septuagint kina Tetragramatoni (herufi nne za Kiebrania za jina la Mungu). Huo ni uthibitisho zaidi kuonyesha kwamba jina la Mungu katika Kiebrania lilipatikana katika tafsiri ya Septuagint, ambayo mara nyingi imenukuliwa na waandishi wa Maandiko ya Kigiriki ya Kikristo.—6/1, ukurasa wa 30.

• Maonyesho ya mapigano hatari na yenye jeuri yaliyofanywa katika Milki ya Roma yamelinganishwa na michezo gani ya sasa inayotazamwa na wengi?

Maonyesho fulani yaliyofanywa hivi majuzi katika Uwanja wa Duara huko Rome, Italy, yalionyesha mambo yanayofanywa siku hizi ambayo yanafanana na hayo. Yalionyesha picha za video za mapigano ya fahali, mchezo wa ndondi za kulipwa, mashindano ya pikipiki na magari, na mapigano makali kati ya watazamaji kwenye michezo mingine ya kisasa. Wakristo wa mapema walizingatia kwamba Yehova hapendi jeuri au watu wajeuri, ndivyo na Wakristo leo. (Zaburi 11:5)—6/15, ukurasa wa 29.

• Tunapojitahidi kuwa walimu wenye matokeo, tunaweza kujifunza nini kutokana na kielelezo cha Ezra?

Andiko la Ezra 7:10 hukazia mambo manne ambayo Ezra alifanya, ambayo sisi pia tunaweza kujitahidi kufanya. Linasema: “Ezra alikuwa [1] ameuelekeza [“ameutayarisha,” “NW”] moyo wake [2] kuitafuta sheria ya BWANA, na [3] kuitenda, na [4] kufundisha maagizo na hukumu [“haki,” NW] katika Israeli.” (Italiki ni zetu.)—7/1, ukurasa wa 20.

• Mwanamke Mkristo anapaswa kujifunga kitambaa kichwani wakati gani?

Hali moja ni katika familia. Anapaswa kujifunga kitambaa kichwani anapotoa sala na kufundisha Biblia badala ya mume wake ili kuonyesha kwamba anatambua kuwa mume wake ndiye mwenye daraka hilo. Pindi nyingine ni wakati anaposhughulikia migawo ya kutaniko, ambapo anaonyesha kuwa anatambua kwamba Maandiko huwaagiza ndugu waliobatizwa wafundishe na kuongoza. (1 Wakorintho 11:3-10)—7/15, ukurasa wa 26-27.

• Kwa nini Wakristo wanatambua kwamba yoga inahusisha mengi zaidi ya mazoezi na ni hatari?

Kusudi la yoga ni kumsaidia mtu aungane na roho fulani mwenye uwezo unaozidi wa kibinadamu. Kinyume na mwongozo wa Mungu, yoga inahusisha kuzuia kimakusudi uwezo wa kufikiri. (Waroma 12:1, 2) Yoga inaweza kufanya mtu akabili hatari ya kuwasiliana na roho na mambo ya kimafumbo. (Kumbukumbu la Torati 18:10, 11)—8/1, ukurasa wa 20-22.