Je, Utadumisha Uaminifu-Maadili?

NI SHORE wangapi waliokufa jana? Hakuna ajuaye, na labda watu wengi hawajali sana kwa kuwa kuna ndege wengi sana. Hata hivyo, Yehova anajali. Akizungumzia kuhusu ndege hao wasioonekana kuwa kitu, Yesu aliwaambia wanafunzi wake hivi: “Hakuna hata mmoja wao atakayeanguka kwenye ardhi bila Baba yenu kujua.” Akaongeza kusema: “Kwa hiyo msiwe na hofu: nyinyi ni bora zaidi kuliko shore wengi.”—Mathayo 10:29, 31.

Baadaye wanafunzi hao walielewa vizuri zaidi jinsi Yehova alivyowathamini. Mtume Yohana aliyekuwa mmoja wa wanafunzi hao aliandika hivi: “Kwa hili upendo wa Mungu ulifanywa dhahiri katika kisa chetu, kwa sababu Mungu alituma Mwana wake mzaliwa-pekee kuingia katika ulimwengu ili tuweze kupata uhai kupitia kwake.” (1 Yohana 4:9) Yehova hatoi tu fidia bali pia anamhakikishia kila mmoja wa watumishi wake: “Hakika sitakuacha kwa vyovyote wala kukuachilia mbali kwa vyovyote.”—Waebrania 13:5.

Bila shaka, upendo wa Yehova kwa watu wake ni imara. Hata hivyo, swali lazuka, ‘Je, tumeshikamana kabisa na Yehova hivi kwamba hatutamwacha kamwe?’

Jitihada za Shetani za Kuvunja Uaminifu-Maadili Wetu

Yehova alipomwambia Shetani jinsi Yobu alivyoshikilia uaminifu-maadili, Shetani alijibu hivi kwa hasira: “Je! huyo Ayubu yuamcha BWANA bure?” (Ayubu 1:9) Alidokeza kwamba wanadamu huwa waaminifu kwa Mungu kwa sababu tu ya faida wanazoweza kupata. Ikiwa dai hilo lingekuwa la kweli, Mkristo yeyote angeweza kuvunja uaminifu-maadili wake—iwapo angeahidiwa kitu ambacho kingeonekana kuwa chenye kuvutia zaidi ya kile ambacho Mungu anatoa.

Katika kisa cha Yobu, Shetani alikuwa amedai kwamba Yobu angevunja uaminifu-maadili wake iwapo angepoteza vitu alivyothamini zaidi. (Ayubu 1:10, 11) Dai hilo lilipothibitika kuwa la uwongo, Shetani aliongeza kusema: “Yote aliyo nayo mtu atayatoa kwa ajili ya uhai wake.” (Ayubu 2:4) Hata ingawa huenda watu fulani wakamtumikia Mungu kwa sababu ya faida wanazoweza kupata, Yobu hakuvunja uaminifu-maadili wake. Maandiko yanathibitisha kwamba Yobu alidumisha uaminifu-maadili. (Ayubu 27:5; 42:10-17) Je, una uaminifu-maadili kama huo? Au je, ungeruhusu Shetani avunje uaminifu-maadili wako? Fikiria hali zako tunapochunguza mambo fulani ya uhakika yanayohusu kila Mkristo.

Mtume Paulo aliamini kwamba uaminifu wa Mkristo wa kweli unaweza kuwa wenye nguvu sana. Aliandika hivi: “Nasadiki kwamba wala kifo wala uhai . . . wala mambo yaliyo hapa sasa wala mambo yatakayokuja . . . wala kiumbe kingine chochote hakitaweza kututenga na upendo wa Mungu ulio katika Kristo Yesu Bwana wetu.” (Waroma 8:38, 39) Tunaweza kuwa na usadikisho kama huo ikiwa tunampenda Yehova kwelikweli. Upendo wa aina hiyo ni kifungo kisichoweza kuvunjwa wala kushindwa na kifo.

 Tukiwa na uhusiano huo pamoja na Mungu, hatutauliza, ‘Je, bado nitakuwa nikimtumikia Yehova miaka michache inayokuja?’ Ukosefu huo wa uhakika ungedokeza kwamba uaminifu wetu kwa Mungu unategemea hali zinazoweza kutupata maishani. Uaminifu-maadili wa kweli hautegemei hali zinazotupata. Unategemea hali yetu ya moyoni. (2 Wakorintho 4:16-18) Iwapo tunampenda Yehova kwa moyo wote, hatutamfadhaisha kamwe.—Mathayo 22:37; 1 Wakorintho 13:8.

Hata hivyo, tunapaswa kukumbuka kwamba sikuzote Shetani anajitahidi kuvunja uaminifu-maadili wetu. Huenda akatushawishi tushindwe na tamaa za mwili, msongo wa marika, au kuruhusu tupatwe na janga fulani litakalofanya tuiache kweli. Shetani anatumia hasa ulimwengu uliojitenga na Mungu ili kutushambulia. Ingawa hivyo, hali zetu za kutokamilika hufanya kazi yake iwe rahisi zaidi. (Waroma 7:19, 20; 1 Yohana 2:16) Hata hivyo, kuna mambo mbalimbali katika vita hii ambayo yanaweza kutusaidia kushinda. Jambo moja kuu ni kwamba tunatambua njia za ujanja ambazo Shetani hutumia.—2 Wakorintho 2:11.

Njia za ujanja za Shetani ni gani? Paulo alizitaja katika barua yake kwa Waefeso kuwa “mbinu,” au “matendo ya ujanja.” (Waefeso 6:11; kielezi-chini, NW) Shetani hutokeza mbinu hizo zenye hila ili kuvunja uaminifu-maadili wetu. Tunashukuru kwamba tunaweza kutambua matendo hayo ya ujanja, kwa kuwa Neno la Mungu linatuonyesha njia ambazo Ibilisi hutumia. Jitihada za Shetani za kuvunja uaminifu-maadili wa Yesu na wa Yobu zinaonyesha baadhi ya njia anazotumia kuvunja uaminifu-maadili wetu wa Kikristo.

Uaminifu-Maadili wa Yesu Haungeweza Kuvunjwa

Yesu alipoanza huduma yake, Shetani alikuwa na ujasiri wa kumshawishi Mwana wa Mungu kwa kumwambia ageuze jiwe liwe mkate. Huo ulikuwa ujanja ulioje! Yesu hakuwa amekula kwa muda wa siku 40, kwa hiyo bila shaka alikuwa na njaa sana. (Luka 4:2, 3) Shetani alimdokezea Yesu kwamba atosheleze tamaa yake ya asili mara moja, kwa njia ambayo ingepingana na mapenzi ya Yehova. Vivyo hivyo leo, propaganda ya ulimwengu hutia moyo watu watosheleze tamaa zao mara moja, bila kufikiria sana matokeo yatakuwaje. Watu wanaambiwa, ‘Unahitaji kitu hicho sasa,’ au kuambiwa ‘Fanya utakalo!’

Ikiwa Yesu angalitosheleza njaa yake bila kufikiria matokeo, Shetani angalifaulu kumfanya avunje uaminifu-maadili wake. Yesu aliona mambo kwa njia ya kiroho, naye akajibu hivi kwa uthabiti: “Imeandikwa, ‘Binadamu lazima aishi, si kwa mkate pekee.’”—Luka 4:4; Mathayo 4:4.

Kisha Shetani akabadili mbinu zake. Kwa kutumia vibaya Maandiko ambayo Yesu alikuwa akinukuu, Ibilisi alimchochea Yesu ajirushe kutoka kwenye mnara wa hekalu. ‘Malaika atakulinda,’ Shetani akadai. Yesu hakunuia kumwomba Baba yake amlinde kimuujiza ili tu ajionyeshe. “Lazima usimtie Yehova Mungu wako kwenye jaribu,” akasema Yesu.—Mathayo 4:5-7; Luka 4:9-12.

 Mbinu ya mwisho ambayo Shetani alitumia ilikuwa ya moja kwa moja. Alijaribu kufanya mapatano na Yesu kwa kumpa ulimwengu wote na utukufu wake, kwa tendo moja la ibada. Shetani alikuwa akitoa karibu kila kitu alichokuwa nacho. Lakini Yesu angewezaje kumwabudu adui mkubwa wa Baba yake? Yesu hangefanya hivyo kamwe! Yesu alijibu: “Ni Yehova Mungu wako ambaye lazima uabudu, na ni kwake peke yake lazima utoe utumishi mtakatifu.”—Mathayo 4:8-11; Luka 4:5-8.

Baada ya kushindwa mara hizo tatu, Shetani ‘aliondoka kutoka kwa Yesu hadi wakati mwingine unaofaa.’ (Luka 4:13) Hilo ladokeza kwamba Shetani aliendelea kutafuta fursa ya kujaribu uaminifu-maadili wa Yesu. Wakati mwingine unaofaa ulifika miaka miwili na nusu baadaye wakati Yesu alipoanza kuwatayarisha wanafunzi wake kwa ajili ya kifo chake kilichokuwa kikikaribia. Mtume Petro alisema: “Uwe mwenye fadhili kwako mwenyewe, Bwana; wewe hutapatwa hata kidogo na jambo hili.”—Mathayo 16:21, 22.

Je, inawezekana kwamba Yesu angevutiwa na shauri hilo lisilo la busara lililotolewa kwa nia nzuri na mmoja wa wanafunzi wake? Yesu alitambua mara moja kwamba maneno hayo yalidhihirisha maoni ya Shetani, si ya Yehova. Kristo alijibu hivi kwa uthabiti: “Nenda nyuma yangu, Shetani! Wewe ni kipingamizi chenye kukwaza kwangu, kwa sababu wewe wafikiri, si fikira za Mungu, bali zile za wanadamu.”—Mathayo 16:23.

Kwa kuwa Yesu alimpenda Yehova daima, Shetani hakufaulu kuvunja uaminifu-maadili wake. Uaminifu wa Yesu kwa Baba yake wa kimbingu haungeweza kudhoofishwa na kitu chochote ambacho Ibilisi alimtolea, wala jaribu lolote hata liwe kali namna gani. Je, tutaazimia kudumisha uaminifu-maadili wetu jinsi hiyo hata hali ziwe ngumu? Kielelezo cha Yobu kitatusaidia kuelewa vizuri magumu tunayoweza kukabili.

Uaminifu Licha ya Majanga

Yobu alitambua kwamba tunaweza kupatwa na majanga wakati wowote. Alikuwa mwanamume mwenye furaha aliyekuwa na mke na watoto kumi. Pia alizingatia mambo ya kiroho. (Ayubu 1:5) Yobu hakujua kwamba uaminifu-maadili wake ulitokeza ubishi huko mbinguni, na kwamba Shetani alikuwa ameazimia kutumia kila njia kuuvunja.

Baada ya muda mfupi, Yobu alipoteza mali zake. (Ayubu 1:14-17) Hata hivyo, Yobu aliendelea kudhihirisha uaminifu-maadili licha ya jaribu hilo kwa sababu hakutumainia pesa kamwe. Akikumbuka wakati alipokuwa tajiri, Yobu alisema hivi: “Ikiwa nimeifanya dhahabu kuwa tumaini langu, . . . Kama nilifurahi kwa kuwa mali yangu yalikuwa mengi, . . . hilo nalo lingekuwa uovu . . . kwani ningemwambia uongo [“ningemkana,” NW] Mungu aliye juu.”—Ayubu 31:24, 25, 28.

Leo pia tunaweza kupoteza kila kitu kwa muda mfupi tu. Mfanyabiashara mmoja ambaye ni Shahidi wa Yehova alidanganywa na hivyo kupoteza pesa nyingi sana hivi kwamba karibu afilisike. Anakiri hivi waziwazi: “Karibu nishikwe na ugonjwa wa moyo. Kwa kweli, nafikiri ningeshikwa na ugonjwa huo kama singekuwa na uhusiano na Mungu. Hata hivyo, jambo hilo lilinionyesha kwamba sikuwa nikitanguliza mambo ya kiroho maishani mwangu. Msisimuko wa kuchuma pesa ulionekana kuwa muhimu kuliko mambo yote.” Tangu wakati huo Shahidi huyo alipunguza shughuli zake za biashara, na anatumikia kwa ukawaida akiwa painia-msaidizi, akitumia muda wa saa 50 au zaidi kila mwezi katika huduma ya Kikristo. Hata hivyo, mbali na kupoteza mali, kuna matatizo mengine yanayoweza kutulemea hata zaidi.

Hata kabla Yobu hajamaliza kutafakari habari kuhusu kupotea kwa mali zake, alipashwa habari kwamba watoto wake kumi wamekufa. Bado alisisitiza: “Jina la BWANA na libarikiwe.” (Ayubu 1:18-21) Je, tungedumisha uaminifu-maadili ikiwa tungepoteza kwa ghafula washiriki kadhaa wa familia? Francisco, mwangalizi Mkristo nchini Hispania, alipoteza watoto wake wawili kwenye aksidenti mbaya ya basi. Alipata faraja kwa kumkaribia Yehova na kuongeza utendaji wake katika huduma ya Kikristo.

Hata baada ya kupoteza watoto wake kwa ghafula, masaibu ya Yobu yaliendelea. Shetani  alimpiga kwa ugonjwa wenye kuchukiza na wenye maumivu. Wakati huo, Yobu alipata shauri lisilofaa kutoka kwa mke wake. Alimsihi: “Umkufuru Mungu, ukafe.” Yobu alipuuza shauri la mke wake, naye “hakufanya dhambi kwa midomo yake.” (Ayubu 2:9, 10) Uaminifu-maadili wake haukutegemea kuungwa mkono na familia, bali ulitegemea uhusiano wake wa karibu na Yehova.

Flora, ambaye mume wake na mwana wake wa kwanza waliacha njia ya Kikristo zaidi ya miaka kumi iliyopita, anaelewa jinsi Yobu alivyohisi. “Unaweza kufadhaika sana familia yako inapoacha kukutegemeza,” yeye anakiri. “Lakini nilijua kwamba siwezi kupata furaha nje ya tengenezo la Yehova. Kwa hiyo nilisimama imara na kumtanguliza Yehova huku nikijitahidi kuwa mke na mama mwema. Nilisali daima, naye Yehova akaniimarisha. Nina furaha kwa sababu, licha ya upinzani mkali kutoka kwa mume wangu, nimejifunza kumtegemea Yehova kabisa.”

Mbinu nyingine ambayo Shetani alitumia ili kuvunja uaminifu-maadili wa Yobu ilihusisha marafiki wake watatu. (Ayubu 2:11-13) Lazima awe alifadhaika sana walipoanza kumchambua. Kama angekubali hoja zao, hangekuwa na imani katika Yehova Mungu. Mashauri yao yenye kukatisha tamaa yangeweza kumvunja moyo na kuvunja uaminifu-maadili wake, na hivyo kufanikisha mbinu ya Shetani.

Badala yake, Yobu alisisitiza: “Hata nitakapokufa sitajiondolea uelekevu [“uaminifu-maadili,” NW] wangu.” (Ayubu 27:5) Hakusema, ‘sitawaruhusu nyinyi watu mniondolee uaminifu-maadili wangu!’ Yobu alijua kwamba uaminifu-maadili wake ulimtegemea yeye na upendo wake kwa Yehova.

Mbinu ya Kale Inayotumiwa Kunasa Watu Leo

Bado Shetani hutumia mashauri yasiyo ya busara au maneno yasiyo ya fadhili kutoka kwa marafiki na waabudu wenzetu ili kutunasa. Kivunja-moyo kutoka kutanikoni kinaweza kudhoofisha imani yetu kwa urahisi zaidi ya mnyanyaso kutoka nje. Mzee Mkristo ambaye hapo awali alishiriki katika vita alionyesha tofauti iliyopo kati ya mambo aliyoshuhudia vitani na maumivu aliyohisi kutokana na maneno na matendo yasiyo ya fadhili ya baadhi ya Wakristo wenzake. Alisema hivi kuhusu maneno na matendo yasiyo ya fadhili kutoka kwa Wakristo wenzake: “Ndilo jambo gumu zaidi ambalo limewahi kunipata.”

Kwa upande mwingine, huenda tukaudhiwa sana na hali za kutokamilika za waabudu wenzetu kiasi cha kuacha kuzungumza na baadhi yao au hata kuanza kususia mikutano ya Kikristo. Huenda tukajishughulisha sana na kutuliza hisia zetu. Lakini lingekuwa jambo la kusikitisha kama nini kuwa na mtazamo kama huo na kuruhusu jambo lenye thamani zaidi kwetu—uhusiano wetu na Yehova—udhoofishwe na yale ambayo wengine wanasema au kufanya. Tukiruhusu jambo hilo litupate, tutakuwa tumedanganywa na mojawapo ya mbinu za kale za Shetani.

Sisi hutazamia kuona viwango vya juu katika kutaniko la Kikristo. Lakini tukitazamia mengi zaidi kutoka kwa waabudu wenzetu, ambao si wakamilifu, bila shaka tutafadhaika. Kinyume cha hilo, Yehova hatazamii mengi zaidi kutoka kwa watumishi wake. Tukiiga kielelezo chake, tutaweza kuvumilia hali za kutokamilika za waabudu wenzetu. (Waefeso 4:2, 32) Mtume Paulo alitoa shauri hili: “Kama mkikasirika, msikubali hasira yenu iwafanye mtende dhambi, na wala msikae na hasira kutwa nzima. Msimpe Ibilisi nafasi.”—Waefeso 4:26, 27, Biblia Habari Njema.

Kama Biblia ifundishavyo waziwazi, Shetani hutumia mbinu mbalimbali ili apate—iwapo anaweza kupata—njia ya kuvunja uaminifu-maadili wa Mkristo. Baadhi ya mbinu zake huvutia mwili wenye dhambi, nyingine husababisha maumivu. Kwa kufikiria habari ambayo tumezungumzia, unaweza kuona ni kwa nini tunapaswa kuwa waangalifu. Ukiwa umeimarisha upendo wako kwa Yehova katika moyo wako, azimia kumthibitisha Ibilisi kuwa mwongo na kuufurahisha moyo wa Yehova. (Mithali 27:11; Yohana 8:44) Kumbuka kwamba, uaminifu-maadili wa kweli wa Kikristo haupaswi kuvunjwa hata tukikabili majaribu gani.