“Huniongoza Kando ya Maji Matulivu”

KATIKA hali yenye joto kali ya nchi za Biblia, kondoo wanahitaji maji ya kunywa kila siku. Kwa hiyo, kazi muhimu ya mchungaji ni kutafutia kundi lake maji. Nyakati nyingine wachungaji hunywesha makundi yao kutoka katika kisima fulani, wakiyamwaga maji kwenye hori ili kondoo wao wanywe. (Mwanzo 29:1-3) Hata hivyo, hasa wakati wa majira ya mvua, sehemu zenye chemchemi ndogo na mito huwa malisho mazuri yenye “maji matulivu.”—Zaburi 23:2, BHN.

Ni lazima mchungaji mzuri ajue mahali atakapopata maji na malisho yanayofaa kwa kundi lake. Kulijua eneo vizuri sana huhakikisha kwamba kondoo wake watakuwa na chakula cha kutosha. Daudi, ambaye alitumia miaka mingi akichunga kondoo katika milima ya Yudea, alilinganisha mwongozo wa kiroho wa Mungu na ule wa mchungaji anayeongoza kondoo wake kwenye malisho bora na kwenye maji ya uhai. “Huniongoza kando ya maji matulivu,” akasema Daudi.—Zaburi 23:1-3, BHN.

Miaka mingi baadaye, kupitia nabii wake Ezekieli, Yehova alitumia kielezi kama hicho. Aliahidi kukusanya watu wake kama vile mchungaji anavyokusanya kondoo wake, kutoka nchi ambazo walikuwa wametawanyika. Aliwahakikishia hivi: “Nami nitawarudisha katika nchi yao wenyewe; nami nitawalisha juu ya milima ya Israeli, kando ya mifereji ya maji.”—Ezekieli 34:13.

Pia Yehova Mungu anahangaikia sana kuandaa maji ya kiroho. Kitabu cha Ufunuo hueleza juu ya “mto wa maji ya uhai” ambao wabubujika kutoka katika kiti cha enzi cha Mungu. (Ufunuo 22:1) Watu wote wanaalikwa kuja kunywa maji ya mto huu. “Yeyote atakaye [anaweza kuchukua] maji ya uhai bure.”—Ufunuo 22:17.

Maji haya ya mfano yanawakilisha mipango ya Mungu kwa ajili ya uhai udumuo milele. Mtu yeyote anaweza kuanza kunywa maji hayo kwa ‘kutwaa ujuzi juu ya Mungu wa pekee wa kweli na wa yule aliyemtuma, Yesu Kristo.’—Yohana 17:3.