“Njoni Kwangu, . . . Nami Hakika Nitawaburudisha Nyinyi”

Vijana Ambao Ni Kama Umande Wenye Kuburudisha

BILA shaka Yesu Kristo alitia ndani wafuasi wake vijana aliposema: “Njoni kwangu, . . . nami hakika nitawaburudisha nyinyi.” (Mathayo 11:28) Watu walipoanza kuwaleta watoto wao kwake, wanafunzi walijaribu kuwazuia. Lakini Yesu alisema: “Waacheni watoto wachanga waje kwangu; msijaribu kuwakomesha.” Yesu hata ‘alichukua watoto akawakumbatia na kuanza kuwabariki, akiweka mikono yake juu yao.’ (Marko 10:14-16) Bila shaka Yesu aliwaona vijana kuwa wenye thamani.

Biblia hutuambia juu ya wanaume na wanawake vijana, na pia watoto, ambao walikuwa kielelezo chema kabisa katika kumtumikia Mungu. “Vijana” walio kama umande wenye kuburudisha wanatabiriwa katika kitabu cha Zaburi. Pia kitabu hicho chasema juu ya “vijana waume” na “wanawali” wanaolitukuza jina la Yehova.—Zaburi 110:3, Biblia Habari Njema; 148:12, 13.

Mahali Ambapo Vijana Husitawi

Inafaa kulinganisha vijana na umande, kwa kuwa umande unahusianishwa na wingi na baraka. (Mwanzo 27:28) Umande ni mwanana na wenye kuburudisha. Vijana wengi Wakristo wanajitolea kwa hiari wakati huu wa kuwapo kwa Kristo. Kama tu umande wenye kuburudisha, vijana wengi wanaume kwa wanawake wanamtumikia Mungu kwa shangwe na kuwasaidia waabudu wenzao.—Zaburi 71:17.

Vijana Wakristo hawaburudishi wengine tu, wao wenyewe huburudishwa na utumishi wao. Tengenezo la Mungu ni mahali pazuri kwa vijana kusitawi. Wanapodumisha maadili yao, vijana wanaume kwa wanawake hufurahia uhusiano wa karibu kabisa na Mungu. (Zaburi 119:9) Katika kutaniko, pia wanashiriki katika utendaji wenye kujenga na kupata rafiki wazuri—mambo ambayo yanaongeza maisha yenye uradhi na kusudi.

‘Dawa na Burudisho’

Je, vijana Wakristo wenyewe huhisi wakiwa kama “umande”? Hebu mjue Tania, kijana mwanamke anayeshiriki katika utendaji wa kutaniko na anayehubiri kwa furaha zaidi ya saa 70 kila mwezi. Yeye anaonaje? “Naburudishwa na kuchangamshwa,” asema. “Kuwa na Yehova na tengenezo lake la kidunia maishani mwangu kumekuwa ‘dawa na burudisho’ kwangu.”—Mithali 3:8.

Ariel, kijana mwingine aliye mhudumu wa wakati wote, anathamini sana lishe ya kiroho anayopokea katika kutaniko. Yeye asema: “Ninapokwenda kwenye mikutano na makusanyiko ya Kikristo, na kula penye meza ya Yehova ya kiroho, mimi huburudishwa sana kiroho. Nami huchangamka kujua kwamba  nina wafanyakazi wenzi ulimwenguni pote.” Akifafanua chanzo kikuu cha burudisho hilo, anasema hivi: “Inaburudisha sana kuwa rafiki ya Yehova, hasa ninapoona au kusikia mambo mabaya ya ulimwengu huu ambayo yanawapata watu.”—Yakobo 2:23.

Abishai, mwenye umri wa miaka 20, ni mweneza Injili wa wakati wote na mtumishi wa huduma kutanikoni. Anaeleza anavyohisi kwa maneno haya: “Nahisi nimeburudishwa kwa sababu najua jinsi ya kushughulika na matatizo mengi ambayo vijana wanakabiliana nayo leo. Kweli ya Biblia imenisaidia kukazia fikira kile ninachohitaji kufanya ili nimtumikie Yehova kwa nafsi yote.”

Antoine, alikuwa mwenye hasira sana alipokuwa angali kijana mchanga. Wakati mmoja alimpiga mwanafunzi mwenzake kwa kiti, na akatumia kalamu kumdunga mwingine. Antoine hakuwa mtu mwenye kuburudisha hata kidogo! Lakini mafundisho ya Biblia yalibadili mwenendo wake. Sasa ana umri wa miaka 19, yeye ni mtumishi wa huduma na mhudumu wa wakati wote katika kutaniko, na anasema hivi: “Namshukuru Yehova kwa kuniruhusu nipate ujuzi kumhusu na kunisaidia nione uhitaji wa kujidhibiti na kubadili mwenendo wangu. Katika njia hii, nimeepuka matatizo mengi sana.”

Wengine wanaona mtazamo wenye kuburudisha wa vijana Wakristo. Matteo ni kijana Shahidi huko Italia. Mwalimu wake aliamua kwamba mwanafunzi yeyote katika darasa aliyetumia neno chafu angelipa kiasi fulani kama nidhamu. Wakati fulani baadaye, watoto waliomba sheria hiyo iondolewe kwa sababu walisema kwamba, “kutotumia lugha chafu ni jambo lisilowezekana.” “Lakini,” anaeleza Matteo, “mwalimu alisema kwamba si kweli, na akanitumia nikiwa mmoja wa Mashahidi wa Yehova, niwe mfano, akinisifu mbele ya darasa lote kwa sababu ya lugha yangu safi.”

Katika darasa lililokuwa na watoto watundu huko Thailand, mwalimu alimwita Racha, mwenye umri wa miaka 11 mbele ya darasa na kumpongeza kwa mwenendo wake, akisema: “Kwa nini nyinyi nyote msimwige? Yeye ni mwenye bidii katika masomo yake na ni mwenye tabia nzuri.” Kisha akawaambia wanafunzi: “Naona ingewabidi mwe Mashahidi wa Yehova, kama Racha, ili mboreshe mwenendo wenu.”

Inafurahisha sana kuwaona maelfu ya vijana Wakristo wakiongeza ujuzi wao kumhusu Yehova na kufanya mapenzi yake. Vijana hao wazuri wanaonyesha hekima isiyo ya kawaida kwa watu wa umri wao. Mungu anaweza kuwasaidia wafanikiwe katika maisha yao ya sasa na vilevile wakati ujao katika ulimwengu mpya mzuri ajabu unaokuja. (1 Timotheo 4:8) Katika ulimwengu huu usio na tumaini lolote kiroho na ambao umejaa vijana waliokatishwa tamaa na kuvurugika akili, vijana Wakristo wanaburudisha kama nini!