Kwenye Meza ya Nahodha
Kwenye Meza ya Nahodha
WATU wenye kuvutia, chakula kitamu, na mazungumzo yanayofurahisha hufanya watu wafurahie mlo kwenye meza ya nahodha wa meli. Lakini mazungumzo kwenye meza ya Nahodha Robert G. Smith wa kampuni ya meli ya White Star Line, yalifafanua karamu fulani ya kiroho.—Isaya 25:6.
Mnamo mwaka wa 1894, Robert alipokuwa na umri wa miaka 24 alizunguka ulimwengu mara ya kwanza akiongoza meli iitwayo Kinclune of Dundee. Baadaye aliongoza meli nyingine za kampuni hiyo ya White Star kama vile Cedric, Cevic, na Runic. * Alipokuwa akivuka Bahari ya Atlantiki kutoka New York kuelekea Liverpool, Uingereza, akitumia mojawapo ya meli hizo, Robert alimwalika Charles Taze Russell kwenye meza ya nahodha. Mazungumzo kati yake na Russell yalifanya apendezwe na ujumbe wa Biblia. Ili kujifunza zaidi, Robert alipokea kwa furaha nakala za Studies in the Scriptures kutoka kwa Russell.
Russell aliendelea kuwasiliana naye kupitia barua, na kwa sababu hiyo Robert akazidi kupendezwa na ujumbe wa Biblia. Robert alimweleza mke wake mambo mapya aliyokuwa akijifunza na muda si muda, wote wawili wakawa Wanafunzi wa Biblia wenye bidii, kama vile Mashahidi wa Yehova walivyoitwa wakati huo. Baadaye Robert alipata pendeleo la kutoa hotuba za Biblia. Kwa mfano, huko Brisbane, Australia, alitoa hotuba yenye kichwa, “Marhamu ya Gileadi” na kuonyesha kwamba Neno la Mungu lina ujumbe “unaotoa suluhisho kwa matatizo yote ya dunia.” Aliporudi Uingereza, mkewe na watoto wao walimsaidia kuonyesha drama ya picha iitwayo “Photo-Drama of Creation.” Waliambatanisha picha za drama hiyo na maelezo ya Russell yaliyorekodiwa.
Robert aliwafundisha watoto wake kweli ya Ufalme aliokuwa amepata. Leo, vizazi vitano baadaye, watu 18 wa familia yake wanawatangazia wengine habari njema kwa bidii nao wanashukuru kwa chakula cha kiroho na cha kimwili kilichoandaliwa kwenye meza ya nahodha.
Kupitia vichapo vyao na kazi yao ya kufundisha Biblia, Mashahidi wa Yehova wanawasaidia watu ulimwenguni pote wajifunze ujumbe wa Biblia ambao ulimvutia Nahodha Smith. Wewe pia unaweza kujua ni nini kilichovutia sana kwenye meza ya nahodha.
[Maelezo ya Chini]
^ fu. 3 Meli nyingine kama hiyo iitwayo Titanic, ilizama ilipokuwa ikiendeshwa na Nahodha E. J. Smith (ambaye si mtu wa ukoo wa Robert) katika safari yake ya kwanza.
[Picha katika ukurasa wa 8]
Robert G. Smith
[Picha katika ukurasa wa 8]
Charles T. Russell