Wakati Bora Zaidi wa Kuishi

UNAPOKABILI hali ngumu, je, wewe husema “heri siku zilizopita”? Basi, fikiria maneno haya ya Mfalme Solomoni mwenye hekima: “Usiseme, Kwani siku za kale kupita siku hizi? Maana si kwa hekima uulizavyo neno hilo.”—Mhubiri 7:10.

Kwa nini Solomoni alitoa ushauri huo? Kwa sababu alijua kwamba kufikiria hali halisi za wakati uliopita hutusaidia sana kukabiliana na hali mbaya za sasa. Wale wanaosema “heri siku zilizopita” wanaweza kusahau kwamba siku hizo pia zilijawa na matatizo na shida, na kwamba maisha hayakuwa bora kabisa. Huenda mambo fulani yalikuwa mazuri wakati uliopita, lakini yaelekea kwamba mengine hayakuwa mazuri. Kama Solomoni alivyosema, si hekima na haifai kuendelea kufikiria wakati uliopita, kwa kuwa ni wazi kwamba maji yakimwagika hayazoleki.

Je, kuna ubaya wowote kuendelea kutamani wakati uliopita? Ndiyo, ikiwa kufanya hivyo kunatuzuia tusibadilike na kufaana na hali za sasa, au ikiwa kunazuia tusiwe wenye shukrani kuhusu nyakati tunamoishi na tumaini tunaloweza kupata.

Kwa kweli, huu ndio wakati bora zaidi wa kuishi, licha ya matatizo yanayozidi kuongezeka ulimwenguni. Kwa nini? Kwa kuwa hivi karibuni tutaona utimizo wa kusudi la Mungu kwa dunia na baraka za Ufalme wake wa amani. Biblia inaahidi: “Atafuta kabisa kila chozi kutoka katika macho yao, na kifo hakitakuwapo tena, wala ombolezo wala kupaaza kilio wala umivu halitakuwapo tena kamwe. Mambo ya zamani yamepitilia mbali.” (Ufunuo 21:4) Hivyo, kwa kuwa hali zitakuwa bora sana, hakuna atakayesema “heri siku zilizopita.”