Mlo wa Jioni wa Bwana Ni Nini?

MANENO haya, “mlo wa jioni wa Bwana,” yanakukumbusha nini? Watu wengi watafikiria mchoro unaovutia sana wa mchoraji Leonardo da Vinci (1452-1519) huko Milan, Italia. Bila shaka, kwa karne nyingi, wasanii, waandishi, na wanamuziki wamevutiwa sana na Mlo wa Jioni wa Bwana.

Lakini, Mlo wa Jioni wa Bwana ni nini, nao una maana gani kwa watu wanaoishi katika karne ya 21? Ensaiklopedia na kamusi mbalimbali huonyesha kwamba Mlo wa Jioni wa Bwana, ambao pia huitwa Chakula cha Bwana, ni mlo ambao Yesu Kristo na mitume wake walikula jioni kabla ya kifo chake cha kidhabihu. Kwa kawaida unaitwa Mlo wa Jioni wa Bwana kwa kuwa huo ndio uliokuwa mlo wake wa jioni wa mwisho pamoja na wafuasi wake waaminifu. Na kwa kuwa ulianzishwa na Bwana Yesu Kristo mwenyewe, jina Mlo wa Jioni wa Bwana linafaa.

Kwa karne nyingi wengi wamejitolea kufa kwa ajili ya mambo wanayoona kuwa yanafaa. Baadhi ya vifo hivyo viliwafaidi watu fulani kwa muda. Ingawa huenda watu fulani wakasifu vifo hivyo, haviwezi kulinganishwa na kifo cha Yesu Kristo ambacho ni chenye maana kubwa. Isitoshe, hakuna kifo katika historia ya wanadamu yenye matatizo kinachoweza kufaidi watu ulimwenguni pote kama cha Yesu. Kwa nini?

Ili kujibu swali hilo na kukusaidia uelewe Mlo wa Jioni wa Bwana una maana gani kwako, tunakuomba usome makala inayofuata.