Ungependa Kumwuliza Mungu Swali Gani?

WATU duniani pote wana maswali muhimu kuhusu maisha. Namna gani wewe? Wengi wamewauliza walimu wa kidini maswali hayo lakini hawajapata majibu yenye kuridhisha. Wengine wameyatafakari maswali hayo wakiwa peke yao huku wengine wakisali wapate mwongozo. Je, kweli unaweza kupata majibu kutoka kwa Mungu kuhusu mambo yanayokutatanisha? Wengi wamesema kwamba wangependa kumwuliza Mungu maswali yafuatayo.

Mungu, wewe ni nani?

Maoni ya wanadamu kumhusu Mungu hutegemea utamaduni wao, dini ya wazazi wao, au labda yale wanayochagua kuamini. Wengine humwita tu Mungu. Je, ni muhimu kumjua? Je, kuna Mungu mmoja tu wa kweli ambaye hujifunua kwetu na kutujulisha jina lake?

Kwa nini watu wanateseka sana?

Huenda mtu akalalamika ikiwa afya yake imeharibika au amekuwa maskini kwa sababu ya mwenendo wake wa kutojali au usio wa maadili. Lakini huenda akawa anajua vizuri kinachofanya ateseke.

Hata hivyo, watu wengi huteseka sana kwa makosa yasiyokuwa yao. Baadhi yao wana magonjwa yenye kudumu. Wengine wanapambana na hali ngumu ya kupata makao yafaayo na chakula cha kutosha kwa ajili ya familia zao. Wengi huathiriwa na uhalifu, vita, jeuri ya kiholela, misiba ya asili, au kutendewa isivyo haki na wenye mamlaka.

Tunaweza kuelewa sababu inayofanya wengi waulize hivi: ‘Kwa nini hali hizo zimeenea sana? Kwa nini Mungu huruhusu mateso hayo yote?’

 Kwa nini nipo hapa? Ni nini kusudi la maisha?

Mara nyingi watu wengi hujiuliza maswali hayo kwa sababu hawapati uradhi wa kweli kutokana na shughuli zao za kila siku. Wengine wengi huamini kwamba kwa njia fulani maisha ya kila mtu yamepangwa na Mungu. Je, ndivyo ilivyo? Iwapo kwa kweli Mungu amekupangia jambo fulani hususa, bila shaka ungependa kulijua.

Kati ya vitabu vyote ulimwenguni, kuna kimoja kinachosema wazi kwamba kimeongozwa na roho ya Mungu. Kitabu hiki kinapatikana katika lugha nyingi sana kikilinganishwa na vitabu vyote vilivyowahi kuandikwa kwa sababu kina ujumbe wa Mungu kwa wanadamu wote. Kitabu hicho ni Biblia Takatifu. Katika kitabu hicho, Mungu mwenyewe aliye Muumba wa mbingu na dunia, hujifunua kwetu na kutujulisha jina lake. Je, unajua jina hilo? Je, unajua yale Biblia husema kuhusu utu wa Mungu? Je, unajua yale inayosema kuhusu mambo ambayo Mungu anataka tufanye?

 [Picha katika ukurasa wa 2 zimeandaliwa na]

COVER: Chad Ehlers/Index Stock Photography

[Hisani ya Picha katika ukurasa wa 3]

Mountain: Chad Ehlers/Index Stock Photography