“Msiogope, Wala Msifadhaike”

“Msiogope, wala msifadhaike; . . . BWANA yu pamoja nanyi.” —2 MAMBO YA NYAKATI 20:17.

1. Ugaidi umewaathirije watu, na kwa nini woga wao unaeleweka?

UGAIDI! Neno hilo hufanya watu waogope, wajihisi hoi na kukosa usalama. Huleta majonzi, huzuni na hasira. Wengi wana wasiwasi kwamba ugaidi utawaathiri wanadamu kwa miaka mingi ijayo. Woga wao unaeleweka kwa sababu nchi fulani zimepambana na ugaidi wa aina mbalimbali kwa miaka mingi bila mafanikio.

2. Mashahidi wa Yehova huhisije kuhusu tatizo la ugaidi, na ni maswali gani yanayozuka?

² Hata hivyo, kuna sababu nzuri ya kuwa na tumaini. Mashahidi wa Yehova wanaohubiri kwa bidii katika nchi 234 wana tumaini zuri sana. Badala ya kuogopa kwamba ugaidi hautakomeshwa, wana hakika kwamba utakomeshwa hivi karibuni. Je, ni jambo la busara kuwa na tumaini kama lao? Ni nani anayeweza kukomesha ugaidi ulimwenguni, na itawezekanaje? Huenda sote tumewahi kuathiriwa na jeuri kwa njia fulani, na hivyo inafaa tuchunguze sababu za kuwa na tumaini.

3. Ni mambo gani yanayosababisha woga, na imetabiriwaje kuhusu nyakati zetu?

 ³ Leo, watu wanahofu na kuogopa kwa sababu mbalimbali. Wazia watu wengi wasioweza kujitunza kwa sababu ya uzee, watu wanaodhoofika kwa sababu ya magonjwa yasiyo na tiba, na familia ambazo zinapata riziki kwa shida. Fikiria pia jinsi maisha yalivyo mafupi! Tunaweza kufa kwa ghafula katika msiba na hata kupoteza vitu vyote tunavyopenda. Woga huo na mahangaiko, pamoja na matatizo mengi ya kibinafsi na mambo mengine yanayovunja moyo, yamethibitisha yale ambayo mtume Paulo alisema kuhusu nyakati zetu: “Jua hili, kwamba katika siku za mwisho nyakati za hatari zilizo ngumu kushughulika nazo zitakuwa hapa. Kwa maana watu watakuwa wenye kujipenda wenyewe, . . . wasio na shauku ya kiasili, wasiotaka upatano wowote, wachongezi, wasio na hali ya kujidhibiti, wakali, wasio na upendo wa wema.”—2 Timotheo 3:1-3.

4. Licha ya hali zenye kuvunja moyo zinazotajwa kwenye 2 Timotheo 3:1-3, kuna tumaini gani?

⁴ Ingawa andiko hilo linataja hali zenye kuvunja moyo, linatoa tumaini pia. Ona kwamba nyakati hizo hatari zingekuwapo “katika siku za mwisho” za ulimwengu huu mwovu wa Shetani. Hilo lamaanisha kwamba suluhisho liko karibu na ulimwengu huu mwovu utaondolewa hivi karibuni, kisha Ufalme mkamilifu wa Mungu ambao Yesu aliwafunza wafuasi wake wasali uje, utatawala. (Mathayo 6:9, 10) Ufalme huo ni serikali ya kimbingu ya Mungu ambayo ‘haitaangamizwa milele,’ lakini kama nabii Danieli anavyosema, ‘itavunja falme hizi zote [za wanadamu] vipande vipande na kuziharibu, nayo itasimama milele na milele.’—Danieli 2:44.

Tofauti Kati ya Kutokuwamo kwa Kikristo na Ugaidi

5. Ni hatua gani ambayo mataifa yamechukua hivi karibuni kwa sababu ya tisho la ugaidi?

⁵ Magaidi wamewaua maelfu ya watu kwa miaka mingi. Watu ulimwenguni pote walitambua hatari hiyo ya ugaidi baada ya mashambulizi ya Septemba 11, 2001 huko New York City na Washington, D.C. Mataifa mbalimbali yaliungana mara moja ili kupambana na ugaidi ambao umeenea ulimwenguni pote. Kwa mfano, vyombo vya habari viliripoti kwamba mnamo Desemba 4, 2001, “mawaziri wa mambo ya nchi za kigeni kutoka nchi 55 za Ulaya, Amerika Kaskazini na Asia ya Kati walifanya mkataba” wa kushirikiana kupambana na ugaidi. Afisa mmoja mkuu wa Marekani alisema kuwa hatua hiyo “inaimarisha” jitihada za kupambana na ugaidi. Kwa ghafula, mamia ya mamilioni ya watu walianza kujishughulisha na ule unaoitwa na The New York Times Magazine kuwa “mwanzo wa mapambano makubwa ya kihistoria.” Tutasubiri tuone kama jitihada hizo zitafanikiwa. Hata hivyo, matokeo ya mapambano hayo ya kukomesha ugaidi yamewatia watu wengi woga na wasiwasi, isipokuwa wale wanaomtumaini Yehova.

6. (a) Kwa nini inakuwa vigumu kwa wengine kukubali msimamo wa Kikristo wa kutokuwamo wa Mashahidi wa Yehova? (b) Yesu aliwawekea wafuasi wake kielelezo gani kuhusiana na siasa?

⁶ Mashahidi wa Yehova wanajulikana sana kwa sababu ya msimamo wao wa kutojiingiza  katika siasa. Ijapokuwa watu wengi hukubali msimamo huo wakati wa amani, hali zinapokuwa mbaya hawakubaliani na Mashahidi. Mara nyingi, woga na wasiwasi wakati wa vita huwafanya wengi watetee taifa lao kwa bidii. Hilo hufanya iwe vigumu kwa wengine kuelewa kinachomfanya mtu asiunge mkono harakati maarufu za kitaifa. Hata hivyo, Wakristo wa kweli wanajua kwamba wanapaswa kutii amri ya Yesu ya ‘kutokuwa sehemu ya ulimwengu.’ (Yohana 15:19; 17:14-16; 18:36; Yakobo 4:4) Kwa hiyo hawapaswi kuunga mkono masuala ya kisiasa au ya kijamii. Yesu mwenyewe aliweka kielelezo kifaacho. Angeweza kuboresha hali za wanadamu nyakati zake kwa sababu alikuwa na hekima kamilifu na uwezo usio na kifani. Hata hivyo, alikataa kujihusisha na siasa. Alipoanza huduma yake, alikataa katakata kuwa mtawala wa falme zote za ulimwengu ambazo Shetani alijaribu kumpa. Baadaye, aliamua kutoroka ili asipewe cheo cha kisiasa.—Mathayo 4:8-10; Yohana 6:14, 15.

7, 8. (a) Msimamo wa Mashahidi wa Yehova wa kutojiingiza katika siasa haumaanishi nini, na kwa nini? (b) Andiko la Waroma 13:1, 2 linakatazaje kushiriki katika matendo ya jeuri dhidi ya serikali?

⁷ Hata hivyo, msimamo wa Mashahidi wa Yehova wa kutojiingiza katika siasa haupaswi kueleweka kimakosa kumaanisha kwamba wao huunga mkono au kukubali matendo ya jeuri. Kufanya hivyo kungekuwa kinyume cha dai lao kuwa watumishi wa “Mungu wa upendo na amani.” (2 Wakorintho 13:11) Wamejifunza maoni ya Yehova kuhusu jeuri. Mtunga-zaburi aliandika hivi: “BWANA humjaribu mwenye haki; bali nafsi yake humchukia asiye haki, na mwenye kupenda udhalimu [“jeuri,” NW].” (Zaburi 11:5) Wanafahamu pia maneno ambayo Yesu alimwambia mtume Petro: “Rudisha upanga wako mahali pao, kwa maana wale wote wauchukuao upanga wataangamia kwa upanga.”—Mathayo 26:52.

⁸ Historia inaonyesha wazi kwamba Wakristo wasio wa kweli mara nyingi wamepigana kwa “upanga,” lakini Mashahidi wa Yehova hawafanyi hivyo. Wao hujiepusha kabisa na matendo yoyote kama hayo. Mashahidi wa Yehova wanatii kwa uaminifu amri iliyo kwenye Waroma 13:1, 2: “Acheni kila nafsi iwe katika ujitiisho kwa mamlaka zilizo kubwa [watawala wa serikali], kwa maana hakuna mamlaka ila kwa njia ya Mungu; mamlaka zilizopo zimesimama zikiwa zimewekwa na Mungu katika mahali pa vyeo vyazo vyenye kuhusu. Kwa hiyo yeye aipingaye mamlaka amechukua msimamo dhidi ya mpango wa Mungu; wale ambao wamechukua msimamo dhidi ya huo watapokea hukumu juu yao wenyewe.”

9. Mashahidi wa Yehova wanapambana na ugaidi katika njia zipi mbili?

⁹ Kwa kuwa ugaidi ni mwovu sana, je, Mashahidi wa Yehova hawapaswi kuunga mkono jitihada za kupambana nao? Ndiyo wanapaswa, na wanafanya hivyo. Kwanza kabisa, hawashiriki katika matendo yoyote ya ugaidi. Pili, wanawafundisha watu kanuni za Kikristo ambazo hufanya watu waache kabisa kila aina ya jeuri. * Mwaka uliopita, Mashahidi walitumia saa 1,202,381,302 kuwasaidia watu kujifunza kuishi maisha ya Kikristo. Muda huo ulitumiwa vizuri, kwani watu 265,469 walibatizwa wakawa Mashahidi wa Yehova, na hivyo kuonyesha hadharani kwamba wanakataa kabisa jeuri.

10. Kuna tumaini gani la jeuri kukomeshwa katika ulimwengu leo?

¹⁰ Isitoshe, Mashahidi wa Yehova wanatambua kwamba wao wenyewe hawawezi kukomesha uovu ulimwenguni. Ndiyo sababu wanamtumaini kabisa yule anayeweza kufanya hivyo, yaani, Yehova Mungu. (Zaburi 83:18)  Wanadamu hawawezi kukomesha jeuri licha ya kwamba wanajitahidi kwa unyofu kufanya hivyo. Mwandishi wa Biblia aliyeongozwa na roho alionya hivi kuhusu siku zetu, yaani, “siku za mwisho”: “Watu waovu na walaghai wataendelea kutoka ubaya hadi ubaya zaidi, wakiongoza vibaya na kuwa wenye kuongozwa vibaya.” (2 Timotheo 3:1, 13) Hilo linaonyesha kwamba wanadamu hawawezi kukomesha uovu. Lakini tunaweza kuwa na hakika kwamba Yehova atakomesha jeuri daima dawamu.—Zaburi 37:1, 2, 9-11; Mithali 24:19, 20; Isaya 60:18.

Hawaogopi Shambulio Linalokaribia

11. Tayari Yehova amechukua hatua gani ili kukomesha jeuri?

¹¹ Kwa kuwa Mungu wa amani huchukia jeuri, tunaweza kuelewa ni kwa nini amechukua hatua za kumwangamiza anayesababisha jeuri, Shetani Ibilisi. Tayari Amemsaidia malaika mkuu Mikaeli—Kristo Yesu, Mfalme aliyetawazwa na Mungu—kumshinda Shetani. Biblia inasema hivi kuhusu tukio hilo: “Vita ikatokea ghafula mbinguni: Mikaeli na malaika zake wakapigana na joka kubwa, hilo joka na malaika zalo walipigana lakini halikuweza, wala mahali hapakupatikana mbinguni kwa ajili yao tena. Kwa hiyo likavurumishwa chini hilo joka kubwa mno, nyoka wa awali, yeye aitwaye Ibilisi na Shetani, anayeiongoza vibaya dunia nzima inayokaliwa; akavurumishwa chini kwenye dunia, na malaika zake wakavurumishwa chini pamoja naye.”—Ufunuo 12:7-9.

12, 13. (a) Kwa nini mwaka wa 1914 ni muhimu? (b) Unabii wa Ezekieli unatabiri nini kuhusu wale wanaounga mkono Ufalme wa Mungu?

¹² Matukio ya Biblia na ya ulimwengu yanaonyesha kwamba vita hiyo ilitokea mbinguni mwaka wa 1914. Tangu wakati huo, hali za ulimwengu zimezidi kuzorota. Andiko la Ufunuo 12:12 linaeleza sababu, linaposema: “Kwa ajili ya hili teremeni, nyinyi mbingu nanyi mkaao ndani yazo! Ole wa dunia na wa bahari, kwa sababu Ibilisi ameteremka kwenu, akiwa na hasira kubwa, akijua ana kipindi kifupi cha wakati.”

¹³ Basi inaeleweka kwa nini Ibilisi ana hasira kali hasa kuelekea waabudu wa Mungu waliotiwa mafuta na washiriki wao, “kondoo wengine.” (Yohana 10:16; Ufunuo 12:17) Upinzani huo utafikia kilele hivi karibuni Ibilisi atakapowashambulia vikali wale wanaounga mkono na kuutumaini Ufalme wa Mungu uliosimamishwa. Shambulio hilo la kufa na kupona linatajwa kwenye Ezekieli sura ya 38 kuwa shambulio la “Gogu wa nchi ya Magogu.”

14. Mashahidi wa Yehova wamelindwaje wakati uliopita, na je, wataendelea kulindwa?

¹⁴ Tangu Shetani alipofukuzwa mbinguni, nyakati nyingine mashirika ya kisiasa yamewalinda watu wa Mungu kutokana na mashambulio ya Shetani, kama inavyoelezwa kwa usemi wa mfano kwenye Ufunuo 12:15, 16. Lakini Biblia inaonyesha kwamba wakati wa shambulio la mwisho la Shetani, wale wanaomtumaini Yehova hawatalindwa na shirika lolote la wanadamu. Je, hilo liwatie hofu au woga Wakristo? La hasha!

15, 16. (a) Maneno ambayo Yehova aliwaambia watu wake katika siku za Yehoshafati yanawapa Wakristo leo tumaini gani? (b) Watumishi wa Mungu leo watafuata kielelezo gani cha Yehoshafati na watu wake?

 ¹⁵ Mungu atawasaidia watu wake kama tu alivyolisaidia taifa lake wakati wa Mfalme Yehoshafati. Twasoma hivi: “Sikieni, Yuda wote, nanyi mkaao Yerusalemu, na wewe mfalme Yehoshafati; BWANA awaambia hivi, Msiogope, wala msifadhaike kwa ajili ya jeshi kubwa hili; kwani vita si yenu bali ni ya Mungu. . . . Hamtahitaji kupigana vita, jipangeni, simameni, mkauone wokovu wa BWANA ulio pamoja nanyi, enyi Yuda na Yerusalemu; msiogope, wala msifadhaike; kesho tokeni juu yao; kwa kuwa BWANA yu pamoja nanyi.”—2 Mambo ya Nyakati 20:15-17.

¹⁶ Watu wa Yuda walihakikishiwa kwamba hawangehitaji kupigana. Vivyo hivyo, watu wa Mungu watakaposhambuliwa na Gogu wa Magogu, hawatachukua silaha ili kujilinda. Badala yake, ‘watasimama ili wauone wokovu wa Yehova’ kwa niaba yao. Bila shaka, kama ilivyokuwa katika siku za Yehoshafati, kusimama hakumaanishi kukaa tu bila kutenda lolote. Twasoma hivi: “Yehoshafati akainama kichwa, kifulifuli; wakaanguka mbele za BWANA Yuda wote na wakaao Yerusalemu, wakimsujudia BWANA. . . . Naye [Yehoshafati] alipokwisha kufanya shauri na watu, akawaweka wale watakaomwimbia BWANA, na kumsifu katika uzuri wa utakatifu, wakitoka mbele ya jeshi, na kusema, Mshukuruni BWANA; kwa maana fadhili zake ni za milele.” (2 Mambo ya Nyakati 20:18-21) Naam, waliendelea kumsifu Yehova kwa bidii hata walipokabili mashambulio ya maadui. Mashahidi wa Yehova watafuata kielelezo hicho watakaposhambuliwa na Gogu.

17, 18. (a) Mashahidi wa Yehova leo wanaonyeshaje ujasiri wanapokabili shambulio la Gogu? (b) Vijana Wakristo walipewa kikumbusho gani hivi karibuni?

¹⁷ Mashahidi wa Yehova wataendelea kuunga mkono Ufalme wa Mungu kabla na hata baada ya shambulio la Gogu kuanza. Wataendelea kuimarishwa na kulindwa katika makutaniko zaidi ya 94,600 ulimwenguni pote. (Isaya 26:20) Sasa ndio wakati wa kumsifu Yehova kwa ujasiri! Bila shaka hawajikunyati kwa woga wanapotazamia kushambuliwa na Gogu hivi karibuni. Badala yake, hilo linawachochea kuongeza dhabihu yao ya sifa kadiri wawezavyo.—Zaburi 146:2.

 ¹⁸ Maelfu ya vijana kotekote ulimwenguni wameonyesha ujasiri huo kwa kuamua kufanya utumishi wa wakati wote. Ili kuonyesha faida za kuchagua utumishi huo maishani, trakti Vijana—Mtatumiaje Maisha Yenu? ilitolewa kwenye makusanyiko ya wilaya ya mwaka wa 2002. Wakristo wote, vijana kwa wazee, wanathamini sana vikumbusho hivyo vya wakati unaofaa.—Zaburi 119:14, 24, 99, 119, 129, 146.

19, 20. (a) Kwa nini Wakristo hawapaswi kuhofu au kuogopa? (b) Makala inayofuata itatusaidiaje?

¹⁹ Licha ya hali za ulimwengu, Wakristo hawapaswi kuhofu au kuogopa. Wanajua kwamba hivi karibuni Ufalme wa Yehova utakomesha kila aina ya jeuri daima dawamu. Pia wanafarijika kujua kwamba watu wengi waliouawa kijeuri watafufuliwa. Baadhi ya watu watakaofufuliwa watapata fursa ya kujifunza kumhusu Yehova kwa mara ya kwanza, ilhali wengine waliojiweka wakfu wataendelea kumtumikia.—Matendo 24:15.

²⁰ Tukiwa Wakristo wa kweli tunaelewa umuhimu wa kudumisha msimamo wa Kikristo wa kutokuwamo na tumeazimia kufanya hivyo. Twataka kuendelea kuwa na tumaini zuri sana la kuweza ‘kusimama ili tuuone wokovu wa Yehova.’ Makala inayofuata itaimarisha imani yetu kwa kutujulisha matukio ya kisasa ambayo yanatimiza unabii wa Biblia hatua kwa hatua.

[Maelezo ya Chini]

Je, Unaweza Kueleza?

• Kwa nini watu wengi leo hawana tumaini?

• Kwa nini Mashahidi wa Yehova wana tumaini zuri la wakati ujao?

• Tayari Yehova amemchukulia hatua gani yule anayesababisha jeuri?

• Kwa nini hatupaswi kuogopa shambulio la Gogu?

[Maswali ya Funzo]

[Picha katika ukurasa wa 13]

Yesu aliweka kielelezo kinachofaa cha msimamo wa Kikristo wa kutokuwamo

[Picha katika ukurasa wa 16]

Maelfu ya vijana Mashahidi wanafurahia kufanya utumishi wa wakati wote

[Hisani ya Picha katika ukurasa wa 12]

UN PHOTO 186226/M. Grafman