Simameni, Mkauone Wokovu wa Yehova!
Simameni, Mkauone Wokovu wa Yehova!
“Jipangeni, simameni, mkauone wokovu wa BWANA ulio pamoja nanyi.”—2 Mambo ya Nyakati 20:17.
1, 2. Kwa nini shambulio linalokaribia la “Gogu wa nchi ya Magogu” ni kubwa kuliko tisho la ugaidi ulimwenguni?
WATU fulani wamesema ugaidi ni shambulio dhidi ya jamii, na hata dhidi ya ustaarabu wa ulimwengu. Bila shaka tisho hilo linapaswa kuchukuliwa kwa uzito. Lakini kuna shambulio jingine kubwa zaidi ambalo linapuuzwa au kutozingatiwa na watu ulimwenguni. Ni shambulio gani hilo?
2 Ni shambulio la “Gogu wa nchi ya Magogu,” ambalo linazungumziwa na Biblia kwenye Ezekieli sura ya 38. Tukisema kwamba shambulio hilo ni kubwa kuliko tisho la ugaidi ulimwenguni, je, tutakuwa tukitia chumvi? La hasha, kwa sababu Gogu hatashambulia tu serikali za wanadamu. Atashambulia serikali ya kimbingu ya Mungu! Hata hivyo, tofauti na wanadamu ambao hawawezi kukabiliana vilivyo na mashambulio, Muumba anaweza kukabiliana kabisa na shambulio kali zaidi la Gogu.
Shambulio Dhidi ya Serikali ya Mungu
3. Watawala wa ulimwengu wameamriwa wafanye nini tangu mwaka wa 1914, nao wametendaje?
3 Mfalme aliyetawazwa na Mungu amekuwa akipambana na ulimwengu mwovu wa Shetani tangu Ufalme wa Mungu ulipoanza kutawala mbinguni mwaka wa 1914. Wakati huo watawala wa kibinadamu waliamriwa wajitiishe kwa Mtawala aliyechaguliwa na Mungu. Lakini wamekataa kufanya hivyo, kama ilivyotabiriwa: “Wafalme wa dunia wanajipanga, na wakuu wanafanya shauri pamoja, juu ya BWANA, na juu ya masihi wake, na tuvipasue vifungo vyao, na kuzitupilia mbali nasi kamba zao.” (Zaburi 2:1-3) Upinzani kuelekea utawala wa Ufalme utafikia kilele wakati wa shambulio la Gogu wa Magogu.
4, 5. Wanadamu wanawezaje kushambulia serikali ya kimbingu ya Mungu isiyoonekana?
4 Huenda tukashangaa jinsi wanadamu wanavyoweza kushambulia serikali ya kimbingu isiyoonekana. Biblia inasema kwamba serikali hiyo inaongozwa na watu “mia arobaini na nne elfu, ambao wamenunuliwa kutoka katika dunia,” pamoja na “Mwana-Kondoo,” Kristo Yesu. (Ufunuo 14:1, 3; Yohana 1:29) Serikali hiyo mpya inaitwa “mbingu mpya,” kwa sababu ni ya kimbingu, na raia wake walio duniani wanaitwa “nchi mpya.” (Isaya 65:17; 2 Petro 3:13) Idadi kubwa ya wale 144,000 watakaotawala na Kristo tayari wamekufa na kwenda mbinguni wakiwa waaminifu. Kwa hiyo wamethibitisha kwamba wanastahili kuanza kazi yao mpya huko mbinguni.
5 Hata hivyo, ni wachache tu kati ya wale 144,000, wanaobaki duniani. Kati ya watu zaidi ya 15,000,000 waliohudhuria mwadhimisho wa Mlo wa Jioni wa Bwana mwaka wa 2002, ni watu 8,760 tu walioonyesha kwamba wana tumaini la kwenda mbinguni. Bila shaka, mtu yeyote anayethubutu kushambulia washiriki wa Ufalme wanaobaki anashambulia Ufalme wa Mungu.—Ufunuo 12:17.
Mfalme Akamilisha Ushindi Wake
6. Yehova na Kristo wanaonaje upinzani kuelekea watu wa Mungu?
6 Ilitabiriwa hivi kuhusu hatua ambayo Yehova atawachukulia wale wanaopinga Ufalme wake uliosimamishwa: “Yeye aketiye mbinguni anacheka, Bwana anawafanyia dhihaka. Ndipo atakaposema nao kwa hasira yake, na kuwafadhaisha kwa ghadhabu yake. Nami nimemweka mfalme wangu juu ya Sayuni, mlima wangu mtakatifu.” (Zaburi 2:4-6) Huu ndio wakati wa Kristo “kukamilisha ushindi wake” chini ya uongozi wa Yehova. (Ufunuo 6:2) Yehova anaonaje upinzani kuelekea watu wake wakati wa ushindi huo wa mwisho? Anaona kana kwamba ni Yeye anayeshambuliwa pamoja na Mfalme wake anayetawala. “Maana yeye awagusaye ninyi aigusa mboni ya jicho langu,” asema Yehova. (Zekaria 2:8, NW) Na Yesu alikazia kwamba mambo ambayo watu wanawafanyia au kutowafanyia ndugu zake watiwa-mafuta ni kana kwamba wanamfanyia au kutomfanyia yeye.—Mathayo 25:40, 45.
7. Gogu anaukasirikia “umati mkubwa” unaotajwa kwenye Ufunuo 7:9 kwa sababu zipi?
7 Bila shaka, Gogu anawakasirikia pia wale wanaowaunga mkono watiwa-mafuta kwa bidii. Watu hao wenye tumaini la kuingia katika “nchi mpya” ya Mungu ni ‘umati mkubwa kutoka katika mataifa yote na makabila na vikundi vya watu na lugha.’ (Ufunuo 7:9) Yasemekana kwamba ‘wamesimama mbele ya kiti cha ufalme na mbele ya Mwana-Kondoo, wakiwa wamevaa kanzu nyeupe.’ Kwa hiyo wana msimamo wa uadilifu mbele za Mungu na Kristo Yesu. Wakiwa wamebeba “matawi ya mitende mikononi mwao,” wanamtukuza Yehova kuwa ana haki ya kuwa Mwenye Enzi Kuu ya ulimwengu wote na anatawala kupitia Mfalme wake aliyetawazwa, Yesu Kristo, yule “Mwana-Kondoo wa Mungu.”—Yohana 1:29, 36.
8. Shambulio la Gogu litamfanya Kristo afanye nini, na matokeo yatakuwa nini?
8 Shambulio la Gogu litamfanya Mfalme aliyetawazwa na Mungu achukue hatua na kuanza vita ya Har-magedoni. (Ufunuo 16:14, 16) Wale ambao wamekataa kutambua enzi kuu ya Yehova wataangamizwa. Lakini wale ambao wamevumilia dhiki kwa sababu ya uaminifu wao kwa Ufalme wa Mungu, watapata ukombozi wa kudumu. Kuhusiana na hilo, mtume Paulo aliandika hivi: “Hii ni ithibati ya hukumu ya uadilifu ya Mungu, inayoongoza kwenye kuhesabiwa kwenu kustahili ufalme wa Mungu, ambao kwa ajili ya huo kwa kweli mnateseka. Hili ni kwa kuzingatia kwamba ni jambo la uadilifu kwa upande wa Mungu kulipa dhiki kwa wale wawafanyiao nyinyi dhiki, lakini, kwenu nyinyi mpatwao na dhiki, kitulizo pamoja nasi kwenye ufunuo wa Bwana Yesu kutoka mbinguni pamoja na malaika zake wenye nguvu katika moto wenye kuwaka mwali, aletapo kisasi juu ya wale wasiomjua Mungu na wale wasiotii habari njema juu ya Bwana wetu Yesu.”—2 Wathesalonike 1:5-8.
9, 10. (a) Yehova aliusaidiaje ufalme wa Yuda kushinda jeshi kubwa la maadui? (b) Ni lazima Wakristo waendelee kufanya nini leo?
9 Wakati wa dhiki kubwa inayokuja itakayofikia upeo katika Har-Magedoni, Kristo atapambana na uovu wote. Lakini kama vile makabila mawili ya ufalme wa Yuda hayakuhitaji kupigana maelfu ya miaka iliyopita, wafuasi wake hawatahitaji kupigana. Vita ilikuwa ya Yehova, naye aliwapa ushindi. Simulizi hilo lasema hivi: “BWANA akaweka waviziao juu ya wana wa Amoni, na Moabu, na wa mlima Seiri, waliokuja juu ya Yuda; nao wakapigwa. Kwani wana wa Amoni na wa Moabu waliwaondokea wenyeji wa mlima Seiri kuwaulia mbali na kuwaharibu; nao walipokwisha kuwakomesha hao wakaao Seiri, wakajitia kuharibu kila mtu mwenziwe. Hata Yuda walipofika mnara wa kulindia wa jangwani, wakalitazama hilo jeshi; nao, angalia, walikuwa maiti walioanguka nchi, wala hapana aliyeokoka.”—2 Mambo ya Nyakati 20:22-24.
10 Ilitukia tu kama Yehova alivyotabiri: “Hamtahitaji kupigana vita.” (2 Mambo ya Nyakati 20:17) Wakristo watafuata kielelezo hichohicho Yesu Kristo atakapowasili “kukamilisha ushindi wake.” Lakini kwa sasa wanaendelea kupambana na uovu si kwa kutumia silaha za kimwili bali za kiroho. Na hivyo ‘wanafuliza kushinda lililo ovu kwa lililo jema.’—Waroma 6:13; 12:17-21; 13:12; 2 Wakorintho 10:3-5.
Ni Nani Atakayeongoza Shambulio la Gogu?
11. (a) Gogu atatumia mashirika gani kufanya shambulio lake? (b) Kuwa chonjo kiroho kwahusisha nini?
11 Gogu wa Magogu anafunuliwa kuwa Shetani Ibilisi tangu aliposhushwa cheo mwaka wa 1914. Akiwa kiumbe wa roho, hawezi kufanya shambulio la moja kwa moja lakini atatumia mashirika ya kibinadamu kufanya hivyo. Ni mashirika yapi hayo? Biblia haitaji kila jambo, lakini inataja ishara fulani zinazoweza kutusaidia kutambua mashirika hayo. Tutaelewa unabii huo hatua kwa hatua kadiri matukio ya ulimwengu yanavyotimiza unabii wa Biblia. Watu wa Yehova huepuka kukisia-kisia mambo lakini wao huendelea kuwa chonjo kiroho, huku wakiwa macho kuona matukio ya kisiasa na ya kidini yanayotimiza unabii wa Biblia.
12, 13. Nabii Danieli alitoa unabii gani kuhusu shambulio la mwisho dhidi ya watu wa Mungu?
12 Nabii Danieli anatoa habari zaidi kuhusu shambulio la mwisho dhidi ya watu wa Mungu, anapoandika hivi: “Naye [mfalme wa kaskazini] atatoka kwa ghadhabu nyingi, ili kuharibu, na kuwaondolea mbali watu wengi. Naye ataweka hema zake za kifalme kati ya bahari na mlima mtakatifu wa uzuri.”—Danieli 11:44, 45.
13 Katika nyakati za Biblia, “bahari” hiyo ilikuwa ile Bahari Kuu, au Mediterania, na “mlima mtakatifu” ulikuwa Sayuni, ambao Yehova alisema hivi juu yake: “Nami nimemweka mfalme wangu juu ya Sayuni, mlima wangu mtakatifu.” (Zaburi 2:6; Yoshua 1:4) Kwa hiyo, katika maana ya kiroho, ardhi iliyo “kati ya bahari na mlima mtakatifu” inawakilisha miliki ya kiroho yenye ufanisi ya Wakristo watiwa-mafuta. Wao si sehemu ya bahari ya wanadamu waliotengwa na Mungu, na wanatazamia kutawala pamoja na Kristo Yesu katika Ufalme wa mbinguni. Ni wazi kwamba watumishi wa Mungu watiwa-mafuta pamoja na washiriki wao waaminifu wa umati mkubwa, watakuwa shabaha ya mfalme wa kaskazini atakapofanya shambulio lake kali linalotabiriwa na unabii wa Danieli.—Isaya 57:20; Waebrania 12:22; Ufunuo 14:1.
Watumishi wa Mungu Watatendaje?
14. Ni mambo gani matatu ambayo watu wa Mungu watafanya watakaposhambuliwa?
14 Watumishi wa Mungu wanatazamiwa kufanya nini watakaposhambuliwa? Kwa mara nyingine tena, taifa la Mungu katika siku za Yehoshafati liliweka kielelezo cha kuigwa. Ona kwamba watu wa taifa hilo waliamriwa wafanye mambo haya matatu: (1) wajipange, (2) wasimame, na (3) wauone wokovu wa Yehova. Watu wa Mungu leo watatendaje kulingana na maneno hayo?—2 Mambo ya Nyakati 20:17.
15. Watu wa Yehova watajipanga katika maana gani?
15 Wajipange: Watu wa Mungu wataendelea kudumisha msimamo wao wa kuunga mkono kwa bidii Ufalme wa Mungu bila kuyumbayumba. Wataendelea kudumisha msimamo wao wa Kikristo wa kutokuwamo. Watakuwa ‘imara na wasioondoleka’ wanapomtumikia Yehova kwa uaminifu, na wataendelea kumsifu Yehova hadharani kwa ajili ya fadhili zake zenye upendo. (1 Wakorintho 15:58; Zaburi 118:28, 29) Hakuna mkazo wowote sasa wala wakati ujao utakaowafanya waache msimamo wao unaokubaliwa na Mungu.
16. Watumishi wa Yehova watasimama katika maana gani?
16 Wasimame: Watumishi wa Yehova hawatajaribu kujiokoa bali watamtumaini Yehova kwa moyo wao wote. Ni yeye tu anayeweza kuwaokoa watumishi wake kutokana na msukosuko wa ulimwengu, na anaahidi kufanya hivyo. (Isaya 43:10, 11; 54:15; Maombolezo 3:26) Kumtumaini Yehova kunatia ndani kutumaini tengenezo lake linaloonekana leo ambalo amekuwa akitumia kwa miaka mingi ili kutimiza makusudi yake. Wakati huo, kuliko wakati mwingine wowote, Wakristo wa kweli watahitaji kuwatumaini waabudu wenzao ambao wamepewa mamlaka ya kuongoza na Yehova na Mfalme wake anayetawala. Wanaume hao waaminifu watawaongoza watu wa Mungu. Kupuuza mwelekezo wao kunaweza kuleta msiba.—Mathayo 24:45-47; Waebrania 13:7, 17.
17. Kwa nini watumishi waaminifu wa Mungu watauona wokovu wa Yehova?
17 Waone wokovu wa Yehova: Wote watakaodumisha ushikamanifu wao wa Kikristo na kumtumaini Yehova ili awakomboe watapata thawabu ya wokovu. Watatangaza kuja kwa siku ya hukumu ya Yehova kwa kadiri wawezavyo hadi saa ya mwisho. Ni lazima viumbe wote wajue kwamba Yehova ndiye Mungu wa kweli na kwamba ana watumishi waaminifu duniani. Hakutakuwa tena na suala la muda mrefu kuhusu haki ya Yehova ya kuwa mwenye enzi kuu.—Ezekieli 33:33; 36:23.
18, 19. (a) Wimbo wa ushindi katika Kutoka sura ya 15 unaonyeshaje hisia za wale watakaookoka shambulio la Gogu? (b) Watumishi wa Mungu wanapaswa kufanya nini sasa?
18 Watu wa Mungu wataingia katika ulimwengu mpya wakiwa na nguvu mpya, na wakiwa na hamu ya kuimba wimbo wa ushindi, kama walivyofanya Waisraeli wa kale baada ya kukombolewa kupitia Bahari Nyekundu. Kila mmoja wao na wote kwa ujumla, watamshukuru Yehova milele kwa sababu ya kuwalinda, na watarudia maneno haya yaliyosemwa zamani: ‘Nitamwimbia Yehova, kwa maana ametukuka sana. . . . Yehova ni mtu wa vita. Yehova ndilo jina lake. . . . Yehova, mkono wako wa kuume wawaseta-seta adui. Kwa wingi wa ukuu wako wawaangusha chini wanaokuondokea, wapeleka hasira yako, nayo huwateketeza kama mabua makavu. . . . Wewe kwa rehema zako umewaongoza watu uliowakomboa, kwa uweza wako uliwaelekeza hata makao yako matakatifu. . . . Utawaingiza, na kuwapanda katika mlima wa urithi wako, mahali pale ulipojifanyia, Ee Yehova, ili upakae, pale patakatifu ulipopaweka imara, Yehova, kwa mikono yako. Yehova atatawala milele na milele.’—Kutoka 15:1-19.
19 Huu ndio wakati unaofaa kwa watumishi wa Mungu kuonyesha kwamba wamejitoa kwa Yehova na kuimarisha azimio lao la kumtumikia akiwa Mfalme wao wa milele kwa kuwa tumaini la kuishi milele li karibu zaidi kutimia!—1 Mambo ya Nyakati 29:11-13.
Unaweza Kueleza?
• Kwa nini Gogu atawashambulia watiwa-mafuta na kondoo wengine?
• Watu wa Mungu watajipanga katika maana gani?
• Watasimama katika maana gani?
• Watu wa Mungu wataonaje wokovu wa Yehova?
[Maswali ya Funzo]
[Picha katika ukurasa wa 18]
Yehova alimpa Yehoshafati na watu wake ushindi, hawakuhitaji kupigana
[Picha katika ukurasa wa 20]
Watiwa-mafuta na kondoo wengine hushiriki kutetea enzi kuu ya Yehova
[Picha katika ukurasa wa 22]
Karibuni watu wa Mungu wataimba wimbo wa ushindi kama Waisraeli wa kale