Maswali Kutoka kwa Wasomaji

Kwa nini Shetani anatajwa kuwa “aliye na uwezo wa kusababisha kifo” kwenye Waebrania 2:14?

Kwa ufupi, Paulo alimaanisha kwamba Shetani, au kupitia kwa wawakilishi wake, anaweza kusababisha kifo cha wanadamu. Kupatana na hilo, Yesu alimwita Shetani “muua-binadamu kikatili wakati alipoanza.”—Yohana 8:44.

Huenda andiko la Waebrania 2:14 lisieleweke kwa sababu ya namna ambavyo wengine wamelitafsiri, wakisema kwamba Shetani ana “mamlaka juu ya kifo” au “uwezo juu ya kifo.” (BHN; Revised Standard; New International Version; Jerusalem Bible) Tafsiri kama hizo huenda zikafanya ionekane kana kwamba Shetani ana uwezo usio na mipaka wa kuua yeyote anayechagua. Hata hivyo, sivyo ilivyo. Kama ingalikuwa hivyo, angalikuwa tayari amewaua watumishi wote wa Yehova duniani.—Mwanzo 3:15.

Neno la Kigiriki “kraʹtos tou tha·naʹtou.” linatafsiriwa “uwezo wa kusababisha kifo” katika tafsiri ya New World Translation, na “uwezo juu ya kifo” katika tafsiri nyingine. Maneno haya Tou tha·naʹtou yanamaanisha “kifo.” Kraʹtos humaanisha “kani, nguvu, uwezo.” Kulingana na kitabu Theological Dictionary of the New Testament, neno hilo humaanisha “kuwepo kwa nguvu au uwezo lakini halimaanishi matumizi yake.” Kwa hiyo, kwenye Waebrania 2:14, Paulo hamaanishi kwamba Shetani ana uwezo wote juu ya kifo. Bali anaonyesha uwezo au uwezekano wa Shetani kusababisha kifo.

Shetani anatumiaje “uwezo wa kusababisha kifo”? Katika kitabu cha Ayubu, tunasoma kuhusu tukio ambalo ni la pekee. Habari hiyo inasema kwamba Shetani alitumia dhoruba ili ‘kusababisha vifo’ vya watoto wa Ayubu. Ona kwamba Shetani hangefanya hivyo bila ruhusa ya Mungu ambayo alipewa kwa sababu suala muhimu lilikuwa linaamuliwa. (Ayubu 1:12, 18, 19) Kwa hakika, Shetani hakuweza kumuua Ayubu kwa kuwa hakuruhusiwa kufanya hivyo. (Ayubu 2:6) Hiyo inamaanisha kwamba ingawa wakati mwingine Shetani amefaulu kusababisha vifo vya wanadamu waaminifu, hatuhitaji kuhofu kwamba anaweza kutuua kama apendavyo.

Shetani pia amesababisha kifo kwa kutumia wawakilishi wake. Hivyo Wakristo wengi wamefia imani yao, baadhi yao wameuawa na umati wenye hasira au wameuawa kwa sababu ya amri ya wenye mamlaka wasiofuatia haki au mahakimu wenye ufisadi.—Ufunuo 2:13.

Zaidi ya hayo, wakati mwingine Shetani amesababisha kifo kwa kutumia vibaya udhaifu wa wanadamu. Zamani katika siku za Waisraeli, nabii Balaamu aliwashauri Wamoabi wawashawishi Waisraeli “wamfanyie BWANA dhambi.” (Hesabu 31:16) Matokeo yakawa vifo vya Waisraeli zaidi ya 23,000. (Hesabu 25:9; 1 Wakorintho 10:8) Vivyo hivyo leo, wengi hudanganywa na “mbinu” za Shetani na kushawishiwa kufanya uasherati au kushiriki katika mazoea mengine mabaya. (Waefeso 6:11) Ni kweli kwamba watu hao hawafi papo hapo. Lakini huenda wakapoteza nafasi yao ya kupata uhai wa milele, na hivyo Shetani akasababisha kifo chao.

Hata tunapotambua kwamba Shetani anaweza kutuumiza, hatuhitaji kumwogopa kupita kiasi. Paulo aliposema kwamba Shetani ana uwezo wa kusababisha kifo, alisema pia kwamba Kristo alikufa ili “apate kumfanya [Shetani] kuwa si kitu . . . na kwamba apate kuwaweka huru wale wote ambao kwa hofu ya kifo walitiishwa kwenye utumwa maisha zao zote.” (Waebrania 2:14, 15) Naam, Yesu alilipa fidia na hivyo akawaweka huru wanadamu wenye imani kutoka katika dhambi na kifo.—2 Timotheo 1:10.

Bila shaka, ni jambo lenye kuogofya kujua kwamba Shetani ana uwezo wa kusababisha kifo, lakini tuna hakika kwamba Yehova anaweza kuondoa uovu wowote ambao umesababishwa na Shetani na wawakilishi wake. Yehova anatuhakikishia kwamba Yesu aliyefufuliwa ‘atavunja-vunja kazi za Ibilisi.’ (1 Yohana 3:8) Yesu atatumia nguvu za Yehova kuwafufua wafu na hivyo kufanya kifo kuwa si kitu. (Yohana 5:28, 29) Hatimaye, Yesu atafunua kwa njia yenye kutokeza kwamba Shetani hana nguvu zote kwa kumtupa ndani ya abiso. Na mwishowe Shetani atahukumiwa maangamizi ya milele.—Ufunuo 20:1-10.