Je, Unakumbuka?

Je, umefurahia kusoma matoleo ya hivi karibuni ya Mnara wa Mlinzi? Ona kama unaweza kujibu maswali yafuatayo:

• Ni katika njia gani Ruthu alikuwa mfano bora?

Alikuwa mfano bora katika upendo wake kwa Yehova, fadhili-upendo kwa Naomi, na kwa kuwa mwenye bidii na mnyenyekevu. Kwa sababu hiyo, watu walimwona kuwa “mwanamke mwema.” (Ruthu 3:11)—4/15, ukurasa wa 23-26.

• Tunajuaje kwamba Yehova huwajali watu wa kawaida?

Aliwaambia Waisraeli ambao walitendwa kikatili huko Misri, wasiwaonee watu wa kawaida. (Kutoka 22:21-24) Yesu aliyemwiga Baba yake, alipendezwa kikweli na watu wa kawaida, nao wale aliowachagua kuwa mitume wake walikuwa watu “wasio na elimu na wa kawaida.” (Matendo 4:13; Mathayo 9:36) Tunaweza kumwiga Mungu kwa kuwajali wengine, kama vile vijana.—4/15, ukurasa wa 28-31.

• Tuna sababu gani ya kuamini kwamba Yehova huona yale tunayofanya?

Biblia inaonyesha kwamba Yehova anaona mambo ambayo wanadamu wanafanya. Aliona dhabihu iliyotolewa na Abeli, naye huona ‘dhabihu yetu ya sifa, yaani, tunda la midomo.’ (Waebrania 13:15) Yehova alijua kwamba Enoki alijitahidi sana kumpendeza kwa kuishi maisha safi kiadili. Naye aliona jinsi mwanamke fulani mjane wa Sarefathi asiye Mwisraeli alivyomgawia nabii Eliya chakula chake kidogo. Pia Yehova huona matendo yetu ya imani.—5/1, ukurasa wa 28-31.

• Kwa nini inaweza kusemwa kwamba baada ya siku ya Pentekoste ya 33 W.K., Wayahudi waliogeuka na kuwa Wakristo walipaswa kujiweka wakfu kwa Mungu?

Katika mwaka wa 1513 K.W.K., Waisraeli walikuwa na uhusiano na Yehova uliotegemea kuwekwa wakfu. (Kutoka 19:3-8) Wayahudi waliozaliwa baada ya hapo walikuwa sehemu ya taifa hilo lililokuwa limewekwa wakfu chini ya agano la Sheria. Lakini Yehova alikomesha agano la Sheria kupitia kifo cha Kristo mwaka wa 33 W.K.  (Wakolosai 2:14) Baadaye, Wayahudi waliotaka kumtumikia Mungu kwa njia inayokubalika walihitaji kujiweka wakfu kwake na kubatizwa katika jina la Yesu Kristo.—5/15, ukurasa wa 30-31.

• Je, kufukiza uvumba kunahitajiwa katika ibada ya kweli leo?

Kufukiza uvumba kulikuwa sehemu ya ibada ya kweli. (Kutoka 30:37, 38; Mambo ya Walawi 16:12, 13) Lakini agano la Sheria, kutia ndani agizo la kufukiza uvumba, lilikoma baada ya kifo cha Kristo. Wakristo wanaweza kuamua kama watatumia uvumba kwa sababu zisizo za kidini, lakini kufukiza uvumba si sehemu ya ibada ya kweli leo. Hisia za wengine zinapaswa kufikiriwa pia ili kuepuka kuwakwaza.—6/1, ukurasa wa 28-30.

• Ni habari gani ya karibuni iliyowafanya wengi wafikirie kwa uzito kwamba kwa kweli Yesu aliishi duniani?

Habari kuhusu sanduku fulani la mifupa lililopatikana nchini Israeli zimeenezwa sana. Yaelekea ni la karne ya kwanza, nalo lina maandishi haya: “Yakobo, mwana wa Yosefu, ndugu ya Yesu.” Watu fulani wamesema kwamba ‘mbali na Biblia, sanduku hilo lina uthibitisho wa zamani zaidi wa kiakiolojia’ kwamba Yesu aliishi duniani.—6/15, ukurasa wa 3-4.

• Mwanadamu hujifunzaje kuonyesha upendo?

Wanadamu hujifunza kwanza kuonyesha upendo kwa kuwaiga wazazi na kwa kuzoezwa nao. Mume na mke wanapopendana na kuheshimiana, watoto wanaweza kujifunza kuonyesha upendo. (Waefeso 5:28; Tito 2:4) Hata kama mtu hakulelewa katika familia yenye upendo, anaweza kujifunza kukuza upendo kwa kukubali uongozi wa Yehova ulio kama wa baba, kupata msaada wa roho takatifu, na kunufaika na tegemezo lenye shauku la undugu wa Kikristo.—7/1, ukurasa wa 4-7.

• Eusebius alikuwa nani, nasi tunajifunza nini kutokana na maisha yake?

Eusebius alikuwa mwanahistoria wa zamani ambaye katika mwaka wa 324 W.K., alikamilisha mabuku kumi yenye kichwa History of the Christian Church. Ingawa aliamini kwamba Baba alikuwapo kabla ya Mwana, Eusebius alikubali maoni tofauti kwenye baraza la Nisea. Yaelekea alipuuza takwa la Yesu kwamba wanafunzi Wake ‘wasiwe sehemu ya ulimwengu.’ (Yohana 17:16)—7/15, ukurasa wa 29-31.

• Je, Yehova amebadili maoni yake kuhusu ndoa za wake wengi?

Hapana, Yehova hajabadili maoni yake kuhusu ndoa za wake wengi. (Malaki 3:6) Mpango wa Mungu kwa mwanadamu wa kwanza ulikuwa kwamba mtu huyo ‘aambatane na mke wake’ nao wawe mwili mmoja. (Mwanzo 2:24) Yesu alisema kwamba yeyote anayemtaliki mke wake, ila kwa sababu ya uasherati, na kuoa mwingine anafanya uzinzi. (Mathayo 19:4-6, 9) Baada ya kutaniko la Kikristo kuanzishwa, Yehova hakuendelea kuvumilia ndoa za wake wengi.—8/1, ukurasa wa 28.