Unajifanyia Jina la Aina Gani?

JE, UMEWAHI kusoma matangazo ya vifo katika gazeti la kwenu au kuona habari ndefu kuhusu maisha ya mtu aliyekufa na mambo aliyotimiza? Je, ulijiuliza, ‘Watu wangekuwa wanasema nini kunihusu?’ Ni watu wangapi hufikiria jinsi watakavyokumbukwa baada ya kufa? Basi fikiria maswali haya ya unyofu: Watu wangekuwa wanasema nini leo kukuhusu kama ungalikufa jana? Unajifanyia sifa ya aina gani? Ungependa ukumbukweje na Mungu na wale wanaokujua?

Mwandikaji mwenye hekima wa kitabu cha Biblia cha Mhubiri alisema: “Jina zuri ni jema kuliko marashi ya damani; na siku ya kufa ni njema kuliko siku ya kuzaliwa kwa mutu.” (Mhubiri 7:1, Zaire Swahili Bible) Kwa nini siku ya kufa kwa mtu ni bora kuliko siku ya kuzaliwa? Kwa sababu wakati wa kuzaliwa mtu huwa hajajifanyia sifa yoyote. Hana historia yoyote. Maisha yake yataonyesha kama atakuwa na sifa nzuri au mbaya. Kwa kweli, siku ya kufa ni bora kuliko siku ya kuzaliwa kwa wale ambao kwa miaka mingi wamejifanyia jina zuri.

Kwa hiyo, tunaweza kuchagua jina zuri au baya. Kwa kweli, kila siku mambo tunayochagua yataamua sifa tutakayokuwa nayo wakati wa kufa na hasa jinsi tutakavyokumbukwa na Mungu. Hivyo, Mwebrania huyo mwenye hekima aliandika: “Kuwakumbuka wenye haki huwa na baraka; bali jina la mtu mwovu litaoza.” (Mithali 10:7) Ni heshima iliyoje kukumbukwa na kubarikiwa na Mungu!

Ikiwa tuna hekima, basi mradi wetu utakuwa kumpendeza Mungu kwa kuishi kupatana na viwango vyake. Hiyo inamaanisha kufuata kanuni za msingi ambazo Kristo alieleza: “‘Lazima umpende Yehova Mungu wako kwa moyo wako wote na kwa nafsi yako yote na kwa akili yako yote.’ Hii ndiyo amri kubwa zaidi sana na ya kwanza. Ya pili, kama hiyo, ni hii, ‘Lazima umpende jirani yako kama wewe mwenyewe.’ Juu ya amri mbili hizi Sheria yote yaning’inia, na Manabii.”—Mathayo 22:37-40.

Wengine wanakumbukwa kwa kuwa wafadhili, kuwatendea wengine mema, na kutetea haki za raia, au kwa mambo ambayo wametimiza katika biashara, sayansi, tiba, na kadhalika. Hata hivyo, wewe ungependa ukumbukweje?

Mshairi Mskoti Robert Burns (1759-1796) alisema kwamba angependa Mungu atupatie uwezo wa kujiona kama vile wengine wanavyotuona. Je, unapojichanganua kwa unyofu unaweza kusema kwamba una sifa nzuri mbele ya Mungu na watu wengine? Mwishowe, uhusiano wetu pamoja na wengine kwa kweli ni muhimu kuliko mambo ya muda mfupi ambayo tunaweza kutimiza katika michezo na biashara. Kwa hiyo swali  ni: Je, jinsi tunavyowatendea wengine—mazungumzo yetu, tabia yetu, na ishara zetu za mwili—huwafanya wawe na maoni gani kutuhusu? Je, wanatuona kuwa watu wanaoweza kufikika au wasioweza kufikika? Wenye fadhili au wakali? Wenye kubadilikana au walio wagumu? Wachangamfu na wenye huruma au wenye ubaridi na wasiojali? Wachambuzi wenye kuvunja moyo au washauri wenye kujenga? Na tuchunguze mifano kadhaa ya zamani na ya siku hizi na tuone tunachoweza kujifunza.

[Picha katika ukurasa wa 3]

Robert Burns alisema kwamba angependa Mungu atupatie uwezo wa kujiona kama vile wengine wanavyotuona

[Hisani]

From the book A History of England