Msaada wa Kweli kwa Maskini

YESU KRISTO, Mwana wa Mungu, alipokuwa duniani, alipendezwa kikweli kuwasaidia maskini. Mtu aliyejionea mwenyewe alisema hivi kuhusu huduma ya Yesu: “Vipofu wanaona tena, na vilema wanatembea huku na huku, wenye ukoma wanasafishwa na viziwi wanasikia, na wafu wanafufuliwa, na maskini wanatangaziwa habari njema.” (Mathayo 11:5) Hata hivyo, namna gani mamilioni mengi ya watu maskini leo? Je, kuna habari zozote njema kwa ajili ya watu hao? Ndiyo, kuna ujumbe wa tumaini!

Ingawa mara nyingi maskini hupuuzwa na kusahauliwa na ulimwengu kwa ujumla, Neno la Mungu, Biblia, linaahidi hivi: “Kwa maana mhitaji hatasahauliwa daima; matumaini ya wanyonge hayatapotea milele.” (Zaburi 9:18) Maneno hayo yenye kufariji yatatimizwa wakati Ufalme wa Mungu, ambao ni serikali halisi ya kimbingu, utakapochukua mahali pa serikali zote za wanadamu. (Danieli 2:44) Akiwa Mfalme wa serikali hiyo ya kimbingu, Yesu “atamhurumia aliye dhaifu na maskini, na nafsi za wahitaji ataziokoa. Atawakomboa nafsi zao na kuonewa na udhalimu, na damu yao ina thamani machoni pake.”—Zaburi 72:13, 14.

Maisha yatakuwaje Kristo atakapoitawala dunia? Wale watakaoishi chini ya utawala wa Kristo wataifurahia kazi ya mikono yao. Biblia husema hivi kwenye Mika 4:3, 4: “Wataketi kila mtu chini ya mzabibu wake, na chini ya mtini wake; wala hapana mtu atakayewatia hofu; kwa kuwa kinywa cha BWANA wa majeshi kimesema hivi.” Ufalme wa Mungu utaondoa hata magonjwa na kifo. (Isaya 25:8) Huo utakuwa ulimwengu ulio tofauti kama nini! Tunaweza kuamini ahadi hizo za Biblia kwa sababu ziliandikwa chini ya mwongozo wa roho ya Mungu mwenyewe.

Mbali na kutupa ujumbe wa tumaini, Biblia hutusaidia kukabiliana na magumu ya kila siku, kama vile kushinda tatizo la kutojiheshimu, ambalo linaweza kusababishwa na umaskini. Kwa kujifunza Biblia, Mkristo ambaye ni maskini anatambua kwamba yeye ni mwenye thamani machoni pa Mungu kama Mkristo tajiri. Kitabu cha Biblia cha Ayubu kinasema kwamba Mungu ‘hawajali matajiri kuliko maskini, kwani wote ni kazi ya mikono yake.’ (Ayubu 34:19) Mungu huwapenda hao wote bila ubaguzi.—Matendo 10:34, 35.