“Walinionyesha Urafiki, Upendo, na Hangaiko”

“KWA jambo hili wote watajua kwamba ninyi ni wanafunzi wangu, mkiwa na upendo kati yenu wenyewe.” (Yohana 13:35) Kupatana na maneno ya Yesu, upendo ndio uliowatambulisha ndugu wa Kikristo wa mapema. Tertullian, aliyeandika zaidi ya miaka mia moja baada ya kifo cha Kristo, alinukuu maneno haya yaliyosemwa na watu waliowatazama Wakristo: ‘Ona jinsi wanavyopendana na jinsi walivyo tayari kufa kwa ajili ya mmoja na mwenzake.’

Je, upendo kama huo ungali unapatikana ulimwenguni leo? Ndiyo. Kwa mfano, ona barua iliyoandikiwa ofisi ya tawi ya Mashahidi wa Yehova huko Brazili. Barua hiyo iliyoandikwa na mwanamke ambaye anaitwa Marília inasema:

“Nilipokuwa nikiishi Villa Mercedes, huko Argentina mama yangu ambaye ni Shahidi wa Yehova alishikwa na ugonjwa wa mifupa unaoathiri maungio na kufanya apooze kuanzia kiunoni kwenda chini. Miezi minane baada ya kushikwa na ugonjwa huo, Mashahidi wa Villa Mercedes walimtunza Mama kwa upendo na kwa fadhili. Walishughulikia kila kitu, kutia ndani kusafisha nyumba na kupika. Hata alipokuwa hospitalini, sikuzote kulikuwa na mtu wa kumshughulikia Mama mchana na usiku.

“Mimi na Mama yangu tumesharudi Brazili, ambako anaendelea kupata nafuu. Mashahidi wa mahali tunapoishi sasa wanafanya yote wawezayo kumsaidia Mama apone.”

Marília anamalizia barua yake kwa kusema: “Ninakiri kwamba mimi si Shahidi, lakini Mashahidi walinionyesha urafiki, upendo, na hangaiko.”

Naam, bado kuna watu ambao huonyesha upendo wa kweli wa Kikristo. Kwa kufanya hivyo, wanaonyesha jinsi mafundisho ya Yesu yanavyoweza kuwa na uvutano juu ya maisha yetu.