“Neno la Mungu Lina Nguvu Kwelikweli!”

“NENO la Mungu liko hai nalo lina nguvu.” (Waebrania 4:12) Ili kuthibitisha kwamba Neno la Mungu lina nguvu zisizozuilika, 2003 Kalenda ya Mashahidi wa Yehova ilizungumzia hali halisi za maisha ya watu sita kutoka sehemu mbalimbali ulimwenguni. Chini ya kichwa “Kabla na Baadaye,” kalenda hii inaonyesha jinsi kazi ya kuelimisha ya Mashahidi wa Yehova inavyowasaidia watu waboreshe maadili yao, waache maisha yenye kudhuru, waimarishe maisha yao ya familia, na kusitawisha uhusiano wa karibu pamoja na Mungu.

Barua kadhaa za uthamini zimepokewa kuhusu kalenda ya 2003. Yafuatayo ni baadhi ya maelezo ya uthamini:

“Kalenda hii inawathibitishia Wakristo wa kweli kwamba kuna watu wengine kama wao tu ambao wamelazimika kufanya pigano kali la imani. Sasa wanaweza kutazama picha na kukumbuka mabadiliko ambayo wengine wamefanya.”—Steven, Marekani.

“Ninafurahi sana kuwaandikia maneno haya machache ili kuwajulisha kwamba kalenda ya 2003 ilinigusa moyo sana. Hakuna kalenda nyingine ambayo imewahi kunigusa moyo hivyo. Nitakuwa nikiibeba kalenda hii mfukoni mwangu ili kuonyesha watu mifano halisi na uthibitisho wenye kutokeza unaoonyesha jinsi Biblia inavyoweza kuwa na uvutano juu ya watu.”—Marc, Ubelgiji.

“Kalenda hii ilinigusa moyo sana. Nilijawa na hisia nyingi niliposoma na kuona jinsi Yehova hubadili watu. Kwa sababu hiyo, nimechochewa kuendelea kufanya mabadiliko maishani mwangu. Sasa ninahisi nikiwa na uhusiano wa karibu zaidi na ndugu zangu ulimwenguni pote.”—Mary, Marekani.

“Yesu alisikitikia sana hali mbaya ya kiroho ya watu. Asanteni kwa kuiga kielelezo cha Kristo kwa kuchapisha masimulizi ya maisha katika kalenda ya 2003. Hakuna kalenda nyingine ambayo imewahi kunifanya nilie maishani mwangu.”—Cassandra, Marekani.

“Nilipokuwa na umri wa miaka 11, nilianza kuvuta sigara na baadaye nikaanza kutumia dawa za kulevya. Mara nyingi nilifikiria kujiua. Kumjua Yehova kulinisaidia kuacha mazoea hayo. Kalenda hii ni muhimu sana kwangu. Vielelezo vya ndugu na dada zangu ulimwenguni huniimarisha sana. Sasa ninajua kwamba siko peke yangu katika pigano hili na kwamba jambo muhimu zaidi ni kumpenda Yehova na kumtumikia kwa moyo wote.”—Margaret, Poland.

“Lo, Neno la Mungu lina nguvu kwelikweli! Nilipopata kalenda ya 2003, nilijizuia nisilie. Masimulizi hayo, pamoja na picha zilizomo, huimarisha imani sana.”—Darlene, Marekani.

“Maisha ya awali ya baadhi ya watu hawa yanafanana sana na maisha yangu ya zamani. Yehova amenipa nguvu kuacha mazoea ambayo huonekana kana kwamba ni magumu kuacha. Asanteni sana kwa masimulizi hayo kuhusu hali halisi za maisha.”—William, Marekani.