Wahitimu wa Gileadi Watiwa Moyo Waseme “Mambo Makuu”

UMATI mkubwa wa watu 6,635 kutoka nchi 52 walikuwapo wakati wa programu ya kuhitimu kwa darasa la 115 la Shule ya Biblia ya Gileadi ya Watchtower Septemba 13, 2003.

Walisikiliza kitia moyo kutoka katika Biblia kilichotolewa kwa wanafunzi 48 wa darasa hilo ili wapeleke “mambo makuu ya Mungu” kwa watu wa nchi 17. (Matendo 2:11) Huko ndiko wahitimu hao wangeendelea na kazi yao ya umishonari.

Katika maneno yake ya utangulizi, Stephen Lett, ambaye ni mshiriki wa Baraza Linaloongoza la Mashahidi wa Yehova na ambaye alikuwa mwenyekiti wa programu hiyo aliwakumbusha wanafunzi: “Mnapoenda kwenye migawo yenu, hata mwende wapi au mpatwe na mambo gani, wale walio pamoja nanyi ni wengi kuliko wapinzani wenu.” Kwa kutumia sura ya sita ya kitabu cha Pili cha Wafalme, Ndugu Lett aliwakumbusha wanafunzi kwamba wanaweza kutegemea msaada wa Yehova Mungu na malaika wengi wanapotangaza “mambo makuu ya Mungu.” (2 Wafalme 6:15, 16) Wakristo wa karne ya kwanza walikabiliana na upinzani na ubaridi katika kazi yao ya kuhubiri na kufundisha, nao mishonari wa Kikristo hukabili hali kama hizo leo. Hata hivyo, wanaweza kutegemea msaada kutoka mbinguni na pia kutoka kwa tengenezo la kidunia la Yehova.—Zaburi 34:7; Mathayo 24:45.

Sema “Mambo Makuu ya Mungu”

Baada ya maneno ya utangulizi ya mwenyekiti, mshiriki wa Halmashauri ya Ofisi ya Tawi ya Marekani, Harold Corkern, alizungumzia kichwa “Matazamio Yanayoweza Kutimizwa Ni Muhimu ili Kupata Furaha na Mafanikio Katika Utumishi.” Ndugu Corkern alisema kwamba matumaini yasiyotimizwa yanaweza kuvunja moyo, kama inavyoonyeshwa katika Methali 13:12. Hata hivyo, mara nyingi kuvunjika moyo husababishwa na kuwa na matazamio yasiyoweza kutimizwa. Wahitimu wanahitaji kuwa na usawaziko na maoni yanayofaa kujihusu na kuhusu wengine. Wanapaswa kutazamia kufanya makosa, lakini makosa hayo hayapaswi kuwafanya wahuzunike kupita kiasi wanapojitahidi kuwasaidia wengine waelewe “mambo makuu ya Mungu.” Ndugu Corkern aliwatia moyo mishonari wapya wamtegemee Yehova, “mthawabishaji wa wale wanaomtafuta kwa bidii.”—Waebrania 11:6.

Msemaji aliyefuata ni Daniel Sydlik, mshiriki wa Baraza Linaloongoza, aliyezungumzia kichwa “Tumaini la Kikristo Ni Nini?” Alisema: “Tumaini ni sifa nzuri ya Kikristo. Ni kiwango cha haki ambacho humwezesha mtu awe na uhusiano unaofaa na Mungu. Mtu ambaye si Mkristo hawezi kuwa na tumaini kama letu.” Ndugu Sydlik aliongezea kufafanua mambo mbalimbali yanayohusu tumaini la Kikristo ambayo hutusaidia tutazamie mema kujapokuwa magumu maishani. “Tukiwa na tumaini tunaweza kukabili maisha tukiwa na  bidii zaidi na roho ya ushindi.” Tumaini la Kikristo humsaidia kumwona Yehova kuwa Mungu wa kusudi na kufurahia kumtumikia.—Waroma 12:12.

Wallace Liverance, msajili wa Shule ya Gileadi aliwatia moyo wanafunzi ‘Waendelee Kutembea kwa Roho.’ (Wagalatia 5:16) Alionyesha jinsi Baruku, mwandishi wa Yeremia, alivyokuwa karibu kuacha kutembea kwa roho. Pindi moja, Baruku alichoka na kuanza kujitafutia makuu. (Yeremia 45:3, 5) Kisha Ndugu Liverance akasema kwamba watu fulani waliacha kumfuata Yesu na kukataa kweli ya kiroho ambayo ni muhimu kwa wokovu. Hiyo ni kwa sababu hawakuelewa mafundisho yake, nao walikata tamaa kwa sababu matazamio yao ya kimwili hayakutimizwa wakati huo. (Yohana 6:26, 27, 51, 66) Mishonari, ambao kazi yao ni kuwaelekeza watu kwa Muumba na kusudi lake, wanaweza kujifunza nini kutokana na habari hizo? Wanafunzi hao walitiwa moyo wasijishughulishe na kupata madaraka na kusifiwa na watu, au kutumia mgawo wa kiroho kujinufaisha.

Mark Noumair, ambaye ni mwalimu wa Gileadi, alizusha swali hili, “Je, Utakuwa Mtoaji au Mpokeaji?” Mazungumzo yake yalitegemea andiko la Waamuzi 5:2, ambapo Waisraeli  mmoja-mmoja walisifiwa kwa kujitoa bila ubinafsi kutumika katika jeshi la Baraka. Wanafunzi wa Gileadi walisifiwa kwa roho yao ya kuitikia mwito wa Baraka Mkuu, Yesu Kristo, wa kujihusisha zaidi na vita vya kiroho. Askari wa Kristo wanapaswa kupendezwa kupata kibali cha yule aliyewaandikisha katika jeshi. Ndugu Noumair aliwakumbusha wanafunzi hivi: “Tunapoanza kukazia fikira kujipendeza, tunaacha kupigana na adui. . . . Utumishi wa mishonari hauhusu mtu binafsi. Unamhusu Yehova, enzi yake kuu, na kutimizwa kwa mapenzi yake. Hatutumikii tukiwa mishonari kwa sababu tunataka Yehova atufurahishe, bali tunamtumikia kwa sababu tunampenda.”—2 Timotheo 2:4.

Kisha mwalimu wa Gileadi Lawrence Bowen akaongoza wa mazungumzo yenye kichwa “Watakase kwa Njia ya ile Kweli.” (Yohana 17:17) Alisema kwamba wanafunzi wa darasa la 115 ni wahudumu wa Mungu waliotakaswa. Walipokuwa shuleni walihubiri, wakitafuta watu wanyoofu wanaoipenda kweli. Kama Yesu na wanafunzi wake wa mapema, wanafunzi hao hawakusema kutokana na ‘msukumo wao wenyewe.’ (Yohana 12:49, 50) Walihubiri kwa bidii neno la kweli lililoongozwa kwa roho na lenye kutoa uhai. Maigizo na mambo yaliyoonwa na wanafunzi yalionyesha jinsi Biblia ilivyokuwa na uvutano mkubwa juu ya wale waliowahubiria.

Shauri na Uzoefu Zatia Moyo

Anthony Pérez na Anthony Griffin, washiriki wa Idara ya Utumishi ya ofisi ya tawi ya Marekani waliwahoji washiriki wa Halmashauri za Ofisi ya Tawi kutoka sehemu mbalimbali duniani. Ndugu hao walizungumzia magumu ambayo mishonari wapya hukabili na wakatoa shauri lenye kutumika linalotegemea mambo yaliyowapata. Baadhi ya magumu hayo ni tofauti za kitamaduni, joto la mwaka mzima, hali ya kidini au ya kisiasa ambayo ni tofauti na ile ambayo wanafunzi wamezoea. Nini kinachoweza kuwasaidia mishonari wapya kukabiliana na hali zao mpya? Upendo kwa Yehova, kwa watu, kutoangalia nyuma, na kutotenda haraka-haraka. Mshiriki mmoja wa halmashauri alisema: “Watu katika mgawo wetu wameishi huko kwa miaka mingi sana hata kabla hatujatumwa huko. Bila shaka tunaweza kuishi huko na kuzoea. Tulipopatwa na magumu, tuliyaona kama nafasi ya kuboresha sifa zetu. Ukitegemea sala na roho ya Yehova, utaona ukweli wa maneno haya ya Yesu, ‘Nipo pamoja nanyi.’”—Mathayo 28:20.

Programu hiyo ilifikia kilele wakati Samuel Herd, mshiriki wa Baraza Linaloongoza, alipotoa hotuba yenye kichwa, “Endeleeni Kusema Kuhusu Mambo Makuu ya Mungu.” Kumwagwa kwa roho takatifu katika siku ya Pentekoste 33 W.K. kuliwatia nguvu wanafunzi wa Yesu waseme kuhusu “mambo makuu ya Mungu.” Ni nini kinachoweza kuwasaidia mishonari wapya leo kusema kuhusu Ufalme wa Mungu kwa bidii kama hiyo? Roho hiyohiyo. Ndugu Herd aliwatia moyo wanafunzi hao wenye kuhitimu ‘wawake roho,’ watazamie migawo yao kwa hamu, na wasisahau mazoezi waliyopewa. (Waroma 12:11) “Biblia ni jambo kuu la Mungu,” akasema Ndugu Herd. “Usiipuuze. Ujumbe wake ni hai. Hupenya ndani kabisa. Itumieni kunyoosha mambo maishani mwenu. Acheni ibadili jinsi mnavyofikiri. Linda uwezo wako wa kufikiri kwa kujifunza, kusoma, na kutafakari Maandiko . . . Uwe na mradi na azimio la kutumia mazoezi uliyopata Gileadi ili kuendelea kusema ‘mambo makuu ya Mungu.’”

Baada ya kusoma salamu kutoka sehemu mbalimbali za dunia na kutolewa kwa diploma, mwanafunzi mmoja alisoma barua ya darasa ya kushukuru kwa ajili ya mazoezi waliyopokea. Ndugu Lett alimalizia pindi hiyo yenye furaha kwa kutaja 2 Mambo ya Nyakati 32:7 na Kumbukumbu la Torati 20:1, 4. Akihusianisha maelezo yake ya mwisho na yale ya utangulizi, alimalizia hivi: “Kwa hiyo, wahitimu wapendwa, kumbukeni kwamba mnapoenda katika migawo yenu mipya, Yehova atakuwa pamoja nanyi. Msisahau kamwe kwamba walio pamoja nanyi ni wengi kuliko wapinzani wenu.”

[Sanduku katika ukurasa wa 25]

TAKWIMU ZA DARASA

Idadi ya nchi zilizowakilishwa: 7

Idadi ya nchi ambako wametumwa: 17

Idadi ya wanafunzi: 48

Wastani wa umri: 33.7

Wastani wa miaka katika kweli: 17.8

Wastani wa miaka katika huduma ya wakati wote: 13.5

[Picha katika ukurasa wa 26]

Darasa la 115 Lililohitimu la Shule ya Biblia ya Gileadi ya Watchtower

Katika orodha iliyo chini, nambari za safu zinaanzia mbele kuelekea nyuma, na majina yameorodheshwa kuanzia kushoto kuelekea kulia katika kila safu.

(1) Brown, T.; Goller, C.; Hoffman, A.; Bruzzese, J.; Trahan, S. (2) Smart, N.; Cashman, F.; Garcia, K.; Lojan, M.; Seyfert, S.; Gray, K. (3) Beckett, M.; Nichols, S.; Smith, K.; Gugliara, A.; Rappenecker, A. (4) Gray, S.; Vacek, K.; Fleming, M.; Bethel, L.; Hermansson, T.; Hermansson, P. (5) Rappenecker, G.; Lojan, D.; Dickey, S.; Kim, C.; Trahan, A.; Washington, A.; Smart, S. (6) Goller, L.; Burghoffer, T.; Gugliara, D.; Nichols, R.; Washington, S.; Kim, J. (7) Beckett, M.; Dickey, J.; Smith, R.; Garcia, R.; Hoffman, A.; Seyfert, R.; Brown, H. (8) Fleming, S.; Bruzzese, P.; Burghoffer, W.; Bethel, T.; Cashman, J.; Vacek, K.