Siri ya Maisha Marefu na Yenye Furaha

“INGAWA kila mtu anataka kuendelea kuishi, hakuna mtu anayetaka kuzeeka.” Watu wengi wanaokaribia kustaafu hutazamia kuwa na wakati mwingi zaidi na madaraka machache. Hata hivyo, wao huogopa kuishi maisha yasiyo na kusudi na yasiyo na maana. Wao pia huogopa upweke, kukosa furaha, na afya inayodhoofika.

Basi, ni nini siri ya kuwa na furaha maishani? Marafiki wazuri na familia yenye upendo husaidia kuwaletea furaha vijana kwa wazee. Lakini yale ambayo mzee anaweza kuwafanyia wengine ndiyo muhimu zaidi kuliko yale ambayo wengine wanaweza kufanya ili kuboresha maisha yake.

Uchunguzi wa muda mrefu uliofanyiwa wenzi wa ndoa wazee 423 ulionyesha kwamba “kusaidia watu wengine kunaweza kurefusha maisha yetu.” Stephanie Brown, aliyeongoza uchunguzi huo, anaeleza: “Matokeo hayo yanaonyesha kwamba katika mahusiano yetu na wengine, sisi hunufaika zaidi kwa kutoa wala si kwa kupokea.” Kutoa huko kunaweza kutia ndani kuwasaidia wengine katika kazi za nyumbani, kutunza watoto, kutumwa hapa na pale, kusaidia katika usafiri, au kumsikiliza mtu anayetaka kuzungumza nasi.

Miaka 2,000 hivi iliyopita, Yesu Kristo alisema: “Kuna furaha zaidi katika kutoa kuliko ilivyo katika kupokea.” (Matendo 20:35) Siri ya kuishi maisha marefu na yenye furaha si kuwa na pesa nyingi, wala tiba, au dawa na vyakula vya kuzuia uzee. Bali ni kuendelea kuwa na mengi ya kufanya na kutumia wakati na nguvu zako kuboresha maisha ya wengine.

Hata hivyo, hatuhitaji tu kufanya hayo ili kuepuka uzee, magonjwa, na kifo. Ufalme wa Mungu pekee ndio utakaoondoa mambo hayo. Chini ya utawala huo, ugonjwa utatoweka na hata “kifo hakitakuwapo tena.” (Ufunuo 21:3, 4; Isaya 33:24) Kwa kweli, wanadamu watiifu wataishi milele kwa furaha katika dunia paradiso. (Luka 23:43) Mashahidi wa Yehova wanafurahi kwamba wanaweza kuwasaidia wengine kujua siri inayotegemea Biblia ya kuishi maisha marefu na yenye furaha.