“Tungependa Kumjibu, ‘Ndiyo!’”

HIVI karibuni ofisi ya tawi ya Mashahidi wa Yehova huko Nigeria ilipokea barua ambayo, kwa sehemu, inasema yafuatayo:

“Mwana wetu, Anderson, alikufa alipokuwa na umri wa miaka 14. Kabla ya kufa alikuwa anafuga kuku wawili. Alitaka kuwauza na kutuma pesa hizo kwenye ofisi ya tawi kama mchango kwa ajili ya kazi ya ulimwenguni pote ya kuhubiri. Lakini alikufa kabla ya kuku hao kuuzwa.

“Kupatana na tamaa yake, sisi wazazi wake, tulifuga kuku hao na kuwauza. Tunawatumia pesa hizo zikiwa mchango wa Anderson. Kwa sababu ya ahadi ya Yehova, tuna hakika kwamba hivi karibuni—ndiyo karibuni sana—tutamwona tena Anderson. Tungependa kumjibu, ‘Ndiyo!’ atakapotuuliza kama tulituma pesa hizo kwenye ofisi ya tawi kama alivyotamani sana kufanya. Kwa kweli, tunatarajia kwa hamu kuona si Anderson tu bali pia ‘wingu kubwa la mashahidi’ ambao watafufuliwa.”—Waebrania 12:1; Yohana 5:28, 29.

Kama inavyoonyeshwa wazi katika barua hiyo, imani katika ufufuo ni tumaini ambalo huwaimarisha Wakristo wa kweli. Kama vile familia ya Anderson, mamilioni ya familia zitafurahi sana zitakapowakaribisha wapendwa wao waliokufa!—1 Wakorintho 15:24-26.

Neno la Mungu linatoa tumaini hilo lenye kufariji la ufufuo likiwa mojawapo ya mambo mazuri sana ambayo yatatukia hivi karibuni katika ulimwengu mpya chini ya Ufalme wa Mungu. (2 Petro 3:13) Biblia inasema hivi kuhusu yale ambayo Mungu atawafanyia watu wake wakati huo: “Atafuta kila chozi kutoka katika macho yao, na kifo hakitakuwapo tena, wala maombolezo wala kilio wala maumivu hayatakuwapo tena. Mambo ya zamani yamepitilia mbali.”—Ufunuo 21:4.