Jinsi ya Kushughulika na Kivunja-Moyo

JE, UMEVUNJIKA moyo? Katika kipindi hiki chenye wasiwasi na taabu, watu wengi wamevunjika moyo. Wengine wamevunjika moyo kwa sababu hawana kazi. Wengine wanakabiliana na maisha baada ya kupatwa na aksidenti. Na bado wengine wanakabiliana na matatizo ya familia, ugonjwa mbaya, au upweke.

Ikiwa umevunjika moyo, unaweza kupata msaada wapi? Mamilioni ya watu ulimwenguni wamepata faraja kwa kusoma Neno la Mungu, Biblia. Wanapata uhakikisho kutokana na maneno haya ya mtume Paulo, ambaye alisema: “Abarikiwe Mungu na Baba ya Bwana wetu Yesu Kristo, Baba ya rehema nyororo na Mungu wa faraja yote, ambaye hutufariji katika dhiki yetu yote.” (2 Wakorintho 1:3, 4) Kwa nini usisome mstari huo na mistari mingine katika Biblia yako? Ukisoma Biblia yako ‘utafarijika moyoni na kuimarika.’—2 Wathesalonike 2:17.

Msaada wa kukabiliana na kivunja-moyo unaweza kupatikana pia kwa kushirikiana na wale wanaomtumikia Yehova. Methali 12:25 inasema: “Hangaiko katika moyo wa mtu huufanya uiname, lakini neno jema huufanya ushangilie.” Tunapohudhuria mikutano ya Kikristo, tunasikia “neno [hilo] jema,” ambalo ni ‘tamu kwa nafsi na maponyo mifupani.’ (Methali 16:24) Kwa nini usihudhurie mkutano kwenye Jumba la Ufalme la Mashahidi wa Yehova ili ujionee jinsi mkutano huo unavyoweza kukuimarisha?

Pia unaweza kunufaishwa na nguvu za sala. Ukihisi kwamba unalemewa na mahangaiko ya maisha, mweleze “msikiaji wa sala” hisia zako za ndani kabisa. (Zaburi 65:2) Yehova Mungu, Muumba wetu, anatuelewa vizuri zaidi kuliko jinsi tunavyojielewa wenyewe. Tunaweza kuutegemea msaada wake. Neno lake linatuahidi hivi: “Mtupie Yehova mzigo wako, naye mwenyewe atakutegemeza. Hatamwacha kamwe mwadilifu atikisike.” (Zaburi 55:22) Naam, “wale wanaomtumaini Yehova watapata nguvu mpya.”—Isaya 40:31.

Yehova Mungu ametupa maandalizi yote muhimu ambayo yanaweza kutusaidia kukabiliana na kivunja-moyo kwa mafanikio. Je, utayatumia?