Kucheza Si Kupisha Wakati Tu

WATOTO hupenda kucheza. Lakini “kucheza si utendaji usio na maana,” kinaeleza kitabu The Developing Child. “Yaonekana kucheza humsaidia zaidi mtoto akue kiakili na kuelewa mazingira yake.” Kwa kucheza, watoto hujifunza kutumia hisi zao, kuelewa mazingira yao, na kushirikiana na wengine.

Kuanzia umri wa miaka minne au mitano, watoto huanza kuigiza watu wazima katika michezo. Wakati mmoja Yesu alizungumza kuhusu watoto waliokuwa wakicheza. Baadhi yao walitaka kuigiza “arusi,” wengine walitaka kuigiza “mazishi,” na kama vile ambavyo watoto hufanya nyakati nyingi, walibishana kwa sababu wengine kati yao hawakutaka kushiriki. (Mathayo 11:16, 17) Mchezo kama huo unaweza kukazia madaraka muhimu katika akili ya mtoto anayekua.

Watoto kwenye picha hizi wanaigiza mwalimu wa Biblia na mwanafunzi wake. Hili si funzo halisi la Biblia, lakini watoto hawa wanaelewa vizuri mpango wa kuwaeleza wengine ujumbe wa Biblia. Wanajifunza jambo zuri, kwa kuwa Yesu aliwaamuru wafuasi wake wote wafanye wanafunzi na kuwafundisha watu washike mambo yote ambayo aliwafunza.—Mathayo 28:19, 20.

Wazazi ambao watoto wao hupenda kuigiza jinsi ya kuongoza mafunzo ya Biblia, kutoa hotuba, au kuhubiri nyumba kwa nyumba wanapaswa kufurahi. Kwa kawaida, watoto huiga mambo ambayo wao huona watu wazima walio karibu nao wakifanya. Michezo ya watoto ya Biblia inaonyesha kwamba wanalelewa “katika nidhamu na mafundisho ya Kikristo.”—Waefeso 6:4, Biblia Habari Njema.

Yehova hutaka watoto washiriki ibada ya kweli. Alimwambia Musa awahusishe “watoto wadogo” wakati Sheria iliposomwa. (Kumbukumbu la Torati 31:12) Ikiwa watoto wanahisi kwamba wanahusishwa, yaelekea michezo yao itaonyesha jambo hilo. Naye mtoto anayeigiza mhudumu wa Mungu anachukua hatua ya kwanza kuelekea kuwa mhudumu pia.