Je, Unatamani Ulimwengu Usio na Woga?

‘Tunaishi katika hali ya tahadhari daima huku tukiwa hoi kwa sababu tunakabili hatari isiyotambuliwa kwa urahisi na ambayo inaweza kutokea wakati wowote, kwa njia yoyote ile, na bila onyo.’

MANENO hayo, yaliyonukuliwa mwaka jana katika gazeti Newsweek, yanaonyesha maoni ya watu wengi wanaoishi katika ulimwengu huu wenye msukosuko. Yesu Kristo alionyesha kwamba hisia kama hizo zingeongezeka wakati ujao ulio karibu. Alitabiri kwamba kungekuwa na wakati ambapo mataifa yangekuwa na maumivu makali yasijue njia ya kutokea, nao watu wangezimia kwa woga na tarajio la mambo yanayokuja juu ya dunia. Hata hivyo, hatutahitaji kuogopa au kuwa hoi, kwa sababu Yesu aliongeza kusema: “Mambo haya yanapoanza kutukia, simameni wima na kuinua vichwa vyenu, kwa sababu ukombozi wenu unakaribia.”—Luka 21:25-28.

Akionyesha jinsi hali za maisha ya watu wake hapa duniani zingekuwa baada ya ukombozi huo, Yehova Mungu alitangaza hivi: “Watu wangu watakaa katika makao yenye amani na katika makao ya uhakika kamili na katika mahali pa kupumzika pasipo na usumbufu.” (Isaya 32:18) Kupitia nabii wake Mika, Yehova alisema hivi: “Wataketi, kila mtu chini ya mzabibu wake na chini ya mtini wake, wala hakutakuwa na mtu yeyote anayewatetemesha.”—Mika 4:4.

Hali hiyo ni tofauti sana na maisha ya leo. Hakuna hatari isiyotambuliwa ambayo itawatisha wanadamu. Badala ya kuishi katika hali ya tahadhari daima na kuwa hoi, kutakuwa na amani na furaha isiyo na mwisho.