Ni Nani Atakayeulisha Ulimwengu?

KULINGANA na uchunguzi wa Shirika la Umoja wa Mataifa la Chakula Ulimwenguni linalofanya kazi ili kuzuia njaa, watu milioni 800, ambao wengi wao ni watoto, watakabiliwa na njaa hivi karibuni. Shirika hilo lilisema hivi karibuni kwamba mali na uangalifu ambao nchi nyingi zilizoendelea ungetoa ili kushughulikia hali hiyo ulielekezwa kwenye matatizo mengine, kama vile ugaidi. Kuenea kwa magonjwa ya kuambukiza kumeongeza tatizo hilo. Kichapo cha shirika hilo Global School Feeding Report kilisema hivi kuhusu nchi za Kiafrika ambako UKIMWI umeenea: “Kizazi kizima cha wazazi kinakufa. Watoto wanaoachwa mara nyingi hujitegemeza wenyewe, wengi wao wakiwa hawajui mambo ya msingi kuhusiana na ukulima na stadi kuhusu maisha ya kila siku ambazo kwa kawaida hupitishwa kutoka kizazi kimoja hadi kingine.”

Shirika la Chakula Ulimwenguni linategemeza mpango ambao unakusudia kuandaa angalau mlo mmoja kwa siku shuleni. Wazo si kupunguza tu njaa bali pia ni kuanzisha kupitia elimu ya kawaida programu nyingine ambazo zimekusudiwa kuzuia UKIMWI kati ya vijana.

Mahali ambako mpango huo umetekelezwa, watoto wamepokea chakula, mazoezi ya usafi, na misaada mingine. Pia imeripotiwa kwamba mahali ambako watu wanabadili mwenendo wao, kiwango cha virusi vya UKIMWI kinapungua.

Kwa kusikitisha, matokeo ya jitihada ya wanadamu mara nyingi ni ya muda tu na si ya kudumu. Lakini Biblia inatoa ahadi yenye kufariji kuhusu kutatuliwa kabisa kwa tatizo la njaa. Andiko la Zaburi 72:16 linasema hivi: “Kutakuwa na wingi wa nafaka duniani.” Chini ya Ufalme wa Mungu, watu wataweza kusema hivi kumhusu Yehova Mungu: “Umeielekezea dunia fikira zako, ili uipatie wingi . . . Wewe unatayarisha nafaka yao, kwa maana hivyo ndivyo unavyoitayarisha dunia.”—Zaburi 65:9.

[Hisani ya Picha katika ukurasa wa 32]

WFP/Y. Yuge