Mwenendo Mzuri ‘Hupamba Fundisho la Mungu’

MARIA mwenye umri mchanga, anayeishi Kransnoyarsk, Urusi, huimba vizuri sana hivi kwamba mwalimu wake alimweka katika kwaya ya shule. Muda mfupi baadaye, Maria alimwendea mmoja wa walimu wake, na kwa heshima akamweleza kwamba hawezi kuimba nyimbo fulani. Kwa nini? Kwa sababu kuimba nyimbo za kidini kulipingana na imani yake inayotegemea Biblia. Mwalimu huyo alishangaa na kujiuliza, ‘Kuna ubaya gani wa kumtukuza Mungu kwa kumwimbia wimbo?’

Ili kuonyesha sababu ya kutoimba wimbo unaohusu Mungu wa Utatu, Maria alifungua Biblia na kueleza kwamba Mungu na Yesu Kristo si Mungu mmoja, na kwamba roho takatifu ni nguvu ya utendaji ya Mungu. (Mathayo 26:39; Yohana 14:28; Matendo 4:31) Maria anasema: “Hilo halikuathiri uhusiano wangu pamoja na mwalimu huyo. Kwa ujumla, tuna walimu wazuri sana katika shule yetu. Wanataka tuwe wanyoofu.”

Katika mwaka wote ambao Maria alikuwa shuleni, msimamo wake ulifanya aheshimiwe na walimu na pia wanafunzi wenzake. Maria anasema: “Kanuni za Biblia hunisaidia maishani. Mwishoni mwa mwaka wa shule, nilipokea zawadi ya kuwa mnyoofu na mwenye utaratibu, nao wazazi wangu wakapokea barua rasmi ya kuwashukuru kwa kumlea binti yao vizuri.”

Maria alibatizwa Agosti 18, 2001. Anasema: “Ninafurahi kwamba ninaweza kumtumikia Mungu mzuri sana kama Yehova!” Vijana wengi ambao ni Mashahidi wa Yehova ulimwenguni pote wanatimiza maneno haya ya Tito 2:10, ambapo tunasoma: ‘Pambeni fundisho la Mwokozi wetu, Mungu, katika mambo yote.’

 [Picha katika ukurasa wa 32]

Maria na wazazi wake baada ya kubatizwa

[Picha katika ukurasa wa 32]

Barua ya uthamini na cheti cha sifa njema