“Uaminifu Chini ya Majaribu”

MAPEMA Aprili 1951, serikali yenye nguvu ya Sovieti ilishambulia kikundi kisicho na hatia cha Wakristo, yaani, Mashahidi wa Yehova, walioishi magharibi mwa Muungano wa Sovieti. Maelfu ya familia, kutia ndani watoto wachanga, wanawake waja-wazito, na wazee, waliingizwa ndani ya mabehewa ya gari-moshi katika safari yenye kuchosha iliyochukua siku 20 kwenda Siberia. Walipelekwa uhamishoni hadi sehemu isiyo na ustaarabu na yenye hali mbaya sana ya hewa ambako wangekaa daima.

Mnamo Aprili 2001,wakati wa kuadhimishwa kwa mwaka wa 50 wa tukio hilo la kihistoria huko Moscow, video ambayo inaeleza kuhusu kukandamizwa kwa Mashahidi wa Yehova kwa miaka mingi katika ule uliokuwa Muungano wa Sovieti ilitolewa. Katika video hiyo, wanahistoria na watu waliojionea mateso hayo wanaeleza jinsi Mashahidi walivyookoka na hata kusitawi licha ya mikazo mingi.

Sasa mamilioni ya watu huko Urusi na kwingineko wametazama video hiyo yenye masimulizi halisi, Faithful Under Trials—Jehovah’s Witnesses in the Soviet Union ambayo imesifiwa sana na umma na pia wanahistoria. Maelezo yafuatayo yametolewa na wasomi wawili Warusi ambao wanaishi katika eneo ambako familia nyingi za Mashahidi zilipelekwa:

“Nilifurahia sana filamu hiyo. Sikuzote nimependezwa na wawakilishi wa dini yenu, lakini baada ya kutazama filamu hiyo, nimevutiwa nanyi hata zaidi. Filamu hiyo ilitayarishwa kwa ustadi sana. Nilipendezwa hasa na jinsi mlivyohoji mtu mmoja-mmoja. Ingawa mimi ni wa dini ya Othodoksi na sina nia ya kubadili dini yangu, ninapendezwa na Mashahidi. Ningependa idara yetu katika chuo iwe na nakala moja ya filamu hiyo. Mimi na walimu wenzangu tumeamua kuwaonyesha wanafunzi wetu filamu hii na kuitumia katika mojawapo ya masomo ya chuo hiki.”—Profesa Sergei Nikolayevich Rubtsov, mkuu wa idara ya historia katika Chuo Kikuu cha Taifa cha Ufundishaji cha Irkutsk, Urusi.

“Ninafurahia kutolewa kwa filamu hii. Mtu anapotayarisha filamu kuhusu ukandamizaji, sikuzote inakuwa vigumu kueleza habari kwa njia iliyo sahihi. Lakini mlifaulu kufanya hivyo. Tafadhali mjihisi huru kuniletea filamu zenu nyingine.”—Profesa Sergei Ilyich Kuznetsov, mkuu wa idara ya historia katika Chuo Kikuu cha Taifa cha Irkutsk, Urusi.

Mashahidi wa Yehova wanaoishi huko Siberia pia walifurahia sana video hiyo. Yafuatayo ni baadhi ya maelezo yao:

“Wakati matukio yanayoonyeshwa katika filamu hiyo yalipokuwa yakitukia, Warusi wengi walipewa habari zenye kupotosha kuhusu kazi ya Mashahidi wa Yehova. Lakini baada ya kutazama filamu hiyo, wanaweza kuona kwamba tengenezo letu si tu madhehebu fulani kama walivyofikiri mwanzoni. Wengine ambao wamekuwa  Mashahidi hivi karibuni wanasema: ‘Hatungeweza kufikiria kwamba tulikuwa tukiishi na kutumika pamoja na ndugu Wakristo ambao walivumilia mambo mengi hivyo!’ Baada ya kutazama filamu hiyo, Shahidi mmoja alionyesha nia yake ya kuwa painia, yaani, mhudumu wa wakati wote.”—Anna Vovchuk, aliyepelekwa uhamishoni Siberia.

“Filamu hiyo ilipoonyesha polisi wa siri wakibisha mlango wa nyumba ya Shahidi mmoja, nilitetemeka. Ilinikumbusha wakati polisi walipobisha mlango wetu, nami ninakumbuka mama yangu akisema: ‘Pengine kuna moto mahali fulani.’ Lakini filamu hiyo inanikumbusha pia kwamba Mashahidi wengi waliteseka zaidi kuliko nilivyoteseka. Habari zote hizo zinatupa nguvu zaidi na bidii ya kuendelea kumtumikia Yehova.”—Stepan Vovchuk, aliyepelekwa uhamishoni Siberia.

“Mimi ni mwana wa Mashahidi waliopelekwa uhamishoni. Kwa hiyo, nilifikiri kwamba nilikuwa tayari nimesikia mengi kuhusu nyakati hizo. Lakini baada ya kuitazama filamu hiyo, nilitambua kwamba sikujua lolote. Nilipokuwa nikisikiliza mahojiano, macho yangu yalijaa machozi. Sasa mambo hayo yaliyoonwa si hadithi tu kwangu bali ni habari halisi. Filamu hiyo imeimarisha uhusiano wangu pamoja na Mungu nayo imenisaidia kujitayarisha kuvumilia magumu yote ya wakati ujao.”—Vladimir Kovash, Irkutsk.

“Filamu hiyo imenichochea zaidi kuliko masimulizi yaliyoandikwa. Nilipotazama na kusikiliza ndugu wakihojiwa, nilihisi kana kwamba niliteseka pamoja nao. Kielelezo cha ndugu aliyechora postikadi kwa ajili ya binti zake wachanga wakati alipokuwa gerezani hunichochea nijaribu kufikia mioyo ya watoto wangu na kweli za Biblia. Asanteni! Filamu hiyo imefanya Mashahidi wa Yehova huko Urusi wahisi sasa kuliko wakati mwingine wowote kwamba wao ni sehemu ya tengenezo la Yehova la ulimwenguni pote.”—Tatyana Kalina, Irkutsk.

“Usemi, ‘Ni afadhali kuona mara moja kuliko kusikia mara mia moja’ kwa kweli unahusu filamu hiyo. Filamu hiyo ni wazi sana, ni halisi, na inatuhusu sisi! Baada ya kuitazama, nilihitaji wakati mwingi kuifikiria. Filamu hiyo iliniwezesha kujiweka katika hali ya Mashahidi waliopelekwa uhamishoni. Sasa ninapolinganisha hali zangu na zao, ninasaidiwa kuwa na maoni tofauti kuhusu matatizo ya siku zetu.”—Lidia Beda, Irkutsk.

Kufikia sasa, video Faithful Under Trials imetolewa katika lugha 25 nayo inapokelewa vizuri ulimwenguni pote. * Video yote nzima imeonyeshwa na vituo vya televisheni huko St. Petersburg, Omsk, na katika majiji mengine huko Urusi, na pia katika majiji ya Ukrania ya Vynnytsya, Kerch, Melitopol na katika eneo la Lviv. Pia imetambuliwa na mabaraza ya kimataifa ya kukagua filamu.

Nguvu ya ujumbe wa video hiyo inaonekana katika vielelezo vizuri vya maelfu ya watu wa kawaida ambao walionyesha ujasiri usio wa kawaida na nguvu za kiroho muda wote wa miaka hiyo ya mateso. Kwa kweli, Mashahidi wa Yehova katika Muungano wa Sovieti walionyesha uaminifu wao chini ya majaribu. Ikiwa ungependa kuona video hiyo, Mashahidi wa Yehova watafurahi kukuletea. Tafadhali wasiliana na mmoja wao katika eneo lenu.

[Maelezo ya Chini]

[Picha katika ukurasa wa 8]

Stalin: U.S. Army photo

[Hisani ya Picha katika ukurasa wa 9]

Stalin: U.S. Army photo