‘Kama Jiwe Jekundu la Thamani’

MTUME Yohana aliona maono ya kiti kitukufu cha ufalme mbinguni. Yule aliyeketi juu ya kiti hicho alionekana “kama jiwe la yaspi.” Pia alikuwa kama “jiwe jekundu la thamani.” (Ufunuo 4:2, 3) Hayo yalikuwa mawe gani?

Hayo hayakuwa mawe yenye kung’aa yasiyopenya nuru. Nyakati za kale, neno la Kigiriki lililotafsiriwa “yaspi” lilitumiwa kumaanisha mawe ya rangi mbalimbali, kutia ndani mawe yenye thamani yaliyokuwa maangavu. “Jiwe la yaspi” linalotajwa kwenye Ufunuo 4:3 “bila shaka halikuwa kama jiwe la yaspi linalopatikana leo ambalo huuzwa kwa bei rahisi,” anasema A. T. Robertson katika kichapo Word Pictures in the New Testament. Isitoshe, baadaye katika kitabu cha Ufunuo, Yohana anafafanua Yerusalemu, jiji la kimbingu, akisema: “Mwangaza wake ulikuwa kama jiwe la thamani zaidi, kama jiwe la yaspi lenye kung’aa kwa uangavu kama fuwele.” (Ufunuo 21:10, 11) Yaonekana mawe ambayo Yohana anataja yangeweza kupenyeza nuru.

Katika maono ya Yohana, Yehova Mungu, yule Mtu mtukufu zaidi katika ulimwengu wote, ndiye anayewakilisha yule anayeonekana kuwa ameketi juu ya kiti cha ufalme. Yehova ndiye aliyetakata na mtakatifu zaidi katika ulimwengu wote. Kupatana na hilo, mtume Yohana aliandika hivi: “Mungu ni nuru na hakuna giza kamwe katika muungano na yeye.” (1 Yohana 1:5) Hivyo, Yohana aliwahimiza waamini wenzake ‘wajitakase wenyewe kama vile Yehova alivyo mwenye kutakata.’—1 Yohana 3:3.

Tunapaswa kufanya nini ili tuonwe na Mungu kuwa wenye kutakata? Ni lazima tuwe na imani katika damu ya Kristo iliyomwagwa kwa ajili ya msamaha wa dhambi zetu. Pia tunapaswa kuendelea ‘kutembea katika nuru’ kwa kujifunza Biblia kwa ukawaida na kuishi kupatana na mafundisho yake.—1 Yohana 1:7.