Mwafrika Mnyenyekevu Aliyependa Neno la Mungu

WAGENI wengi wanaotembelea bara la Afrika hushangaa sana kuona jinsi ilivyo rahisi kuanzisha mazungumzo ya Biblia na wenyeji. Watu wengi huvutiwa na maswali kama, “Ufalme wa Mungu ni nini?” au “Je, kuna utatuzi wa kudumu kwa matatizo kama vile njaa, magonjwa, vita, na uhalifu?” Wengi hukubali mgeni awaonyeshe majibu ya maswali hayo katika Biblia. Mara nyingi hilo huongoza kwenye funzo la Biblia la kawaida. Na wanafunzi hao wanapofanya maendeleo wanabatizwa na kuwa Wakristo.

Mmoja kati ya Waafrika wa kwanza kufanya hivyo anatajwa katika Biblia kwenye Matendo 8:26-40. Huyo alikuwa mwanamume Mwethiopia aliyekuwa ameenda Yerusalemu kumwabudu Mungu wa kweli, Yehova.

Kama unavyoweza kuona katika picha, mwanamume huyo Mwethiopia yuko kwenye gari, anarudi nyumbani huku akisoma kitabu cha kukunjwa. Mtu fulani amkaribia na kumuuliza: “Je, wewe kwa kweli unaelewa unayoyasoma?” Mwethiopia huyo anakubali kwa unyenyekevu kwamba anahitaji msaada na kumsihi mweneza-injili Filipo ajiunge naye kwenye gari. Kisha anamwomba Filipo amweleze maana ya Andiko ambalo amekuwa akisoma. Filipo anamweleza kwamba Andiko hilo ni unabii unaohusu kifo cha Masihi, Yesu Kristo. Filipo anamtangazia pia “habari njema juu ya Yesu,” pamoja na ufufuo wake.

Baada ya kusikia hizo habari njema, Mwethiopia huyo anataka kuwa mwanafunzi wa Yesu, na anauliza: “Ni nini kinachonizuia nisibatizwe?” Baada ya kubatizwa, Mwafrika huyo mnyenyekevu anaendelea na safari yake kwa furaha, nayo Biblia haimtaji tena.

Leo, Mashahidi wa Yehova wanawasaidia mamilioni ya watu ulimwenguni kujifunza “habari njema” hizohizo. Leo, watu milioni sita hivi wanajifunza Biblia bila malipo.