“Hawakubadili Msimamo Wao”

YESU KRISTO aliwaambia wanafunzi wake hivi: “Wenye furaha ni ninyi wakati watu wanapowashutumu na kuwatesa na kusema kwa uwongo kila namna ya jambo baya juu yenu kwa ajili yangu.” (Mathayo 5:11) Leo Mashahidi wa Yehova wana furaha kwa sababu, kupatana na mafundisho ya Kristo, wao hukataa kuwa “sehemu ya ulimwengu,” hudumisha msimamo wao wa kutojiingiza kabisa katika siasa, na hudumisha utimilifu wao kwa Mungu chini ya hali zote.—Yohana 17:14; Mathayo 4:8-10.

Kuhusu msimamo usiobadilika ambao Mashahidi wa Yehova walidumisha katika ule uliokuwa Muungano wa Sovieti, kutia ndani Estonia, mwanatheolojia wa Kilutheri na mtafsiri wa Biblia, Toomas Paul, anaandika hivi katika kitabu chake Kirik keset küla (Kanisa Lililo Katikati ya Kijiji): “Ni watu wachache sana ambao wamesikia yale yaliyotukia asubuhi na mapema, Aprili 1, 1951. Kampeni ilipangwa ili Mashahidi wa Yehova na wote wanaoshirikiana nao wafukuzwe. Kwa ujumla watu 279 walikamatwa na kupelekwa uhamishoni huko Siberia . . . Waliambiwa watie sahihi fomu moja ili waikane imani yao na hivyo kuepuka kupelekwa uhamishoni au kutiwa gerezani. . . . Tukijumlisha wale waliotangulia kukamatwa, kulikuwa na watu 353 waliowekwa kizuizini, kutia ndani watu 171 hivi ambao walikuwa wakishirikiana tu na makutaniko. Hawakubadili msimamo wao hata walipokuwa Siberia. . . . Si waumini wengi wa Kanisa [la Kilutheri la Estonia] waliokuwa na imani kama ile ya Mashahidi wa Yehova.”

Mashahidi wa Yehova ulimwenguni pote humtumainia Mungu awasaidie kubaki waaminifu na watiifu kwake licha ya mateso. Wanashangilia kujua kwamba watapata thawabu kubwa kwa ajili ya uaminifu wao.—Mathayo 5:12.