Je, Kuna Faida ya Kuwa Mshikamanifu?
Je, Kuna Faida ya Kuwa Mshikamanifu?
“UNALIPA pesa nyingi sana kwa ajili ya bima ya afya,” akasema Karl, mwakilishi wa kampuni moja ya bima. * “Ukianza kushirikiana na kampuni yetu, utaokoa dola 20 kila mwezi, na hizo ni pesa nyingi sana.”
“Huenda ni kweli,” akajibu Jens. “Lakini nimekata bima ya afya katika kampuni nyingine kwa miaka mingi. Walinisaidia sana wakati uliopita, na ninataka kuwa mshikamanifu kwao.”
Karl akamjibu: “Ushikamanifu ni sifa nzuri. Lakini, sifa hiyo inakugharimu sana!”
Karl alisema kweli. Mara nyingi kuwa mshikamanifu au mwaminifu kwa mtu mwingine huenda kukakugharimu. * Pia, kuwa mshikamanifu kunahitaji wakati, nguvu, na kujitoa. Je, kuna faida ya kuwa mshikamanifu?
Sifa ya Ushikamanifu Inathaminiwa Sana Lakini Haionyeshwi
Kulingana na uchunguzi uliofanywa huko Ujerumani na Taasisi ya Utafiti wa Maoni ya Watu ya Allensbach, asilimia 96 ya waliotoa maoni walisema kwamba uaminifu ni sifa yenye kuvutia. Uchunguzi wa pili wa Allensbach uliofanyiwa watu wa umri wa kati ya miaka 18-24 ulionyesha kwamba kwa kila watu 3 waliotoa maoni, 2 waliuona uaminifu kuwa sifa bora.
Ingawa ushikamanifu au uaminifu huthaminiwa sana, kuwa mwaminifu au mshikamanifu si jambo rahisi. Kwa mfano, katika nchi kadhaa huko Ulaya, mara nyingi wenzi wa ndoa au watu wa familia hukosa kuonyeshana ushikamanifu. Mara nyingi marafiki hukosa kuwa waaminifu kwa wenzao. Uaminifu uliokuwapo zamani kati ya wakubwa na wafanyakazi au kati ya kampuni na wateja wake, umetoweka kabisa. Kwa nini?
Wakati mwingine shughuli nyingi za maisha humfanya mtu asiwe na wakati au asitake kuanzisha uhusiano utakaohitaji awe mshikamanifu. Watu ambao wamewahi kukatishwa tamaa na wengine, huenda sasa wakaogopa kumwamini mtu yeyote. Huenda wengine wakapendelea uhusiano usiodumu ambao haumlazimu mtu kuwa mshikamanifu.
Kwa vyovyote vile, watu wanathamini sana sifa ya ushikamanifu lakini hawaionyeshi. Hivyo, acheni tufikirie maswali yafuatayo: Je, kuna faida ya kuwa mshikamanifu? Ikiwa ndivyo, tunapaswa kuwa washikamanifu kwa nani, na katika njia zipi? Kuna faida gani kuwa mshikamanifu?
[Maelezo ya Chini]
^ fu. 2 Majina fulani katika makala hii na ile inayofuata yamebadilishwa.
^ fu. 5 Ingawa maneno “ushikamanifu” na “uaminifu” hayatumiwi nyakati zote katika muktadha uleule, katika sehemu fulani za makala hizi yametumiwa kumaanisha jambo lilelile.
[Blabu katika ukurasa wa 3]
Watu wanathamini sana sifa ya ushikamanifu lakini hawaionyeshi